1 Tesalonica 1:1-10
1 Tikang kan Pablo ngan kanda Silvano ngan Timoteo, para ha kongregasyon han mga taga-Tesalonica nga kahiusa han Dios nga Amay ngan han Ginoo nga hi Jesu-Kristo:
Makarawat unta niyo an diri-matupngan nga pagkabuotan ngan kamurayawan.
2 Pirme kami nagpapasalamat ha Dios kon igin-uupod namon kamo ngatanan ha amon mga pag-ampo,
3 kay diri gud namon nangangalimtan an iyo buhat tungod han pagtoo ngan an iyo pangalimbasog tungod han gugma ngan an iyo pagpailob tungod han paglaom ha aton Ginoo nga hi Jesu-Kristo ha presensya han aton Dios ngan Amay.
4 Mga kabugtoan nga hinigugma han Dios, maaram kami han pagpili niya ha iyo,
5 kay an maopay nga sumat nga iginsasangyaw namon waray umabot ha iyo pinaagi la han pulong kondi pinaagi liwat han gahum ngan han baraan nga espiritu ngan marig-on nga pasarig. Ngan maaram gud kamo kon nagin ano nga klase kami hin mga tawo para ha iyo kaopayan.
6 Salit ginsubad niyo kami ngan an Ginoo, kay pinaagi han baraan nga espiritu malipayon nga ginkarawat niyo an pulong bisan kon nakakaeksperyensya kamo hin damu nga kasakitan,
7 ngan nagin susbaranan kamo ha ngatanan nga tumuroo ha Macedonia ngan ha Acaya.
8 Ha pagkamatuod, diri la ha Macedonia ngan Acaya nabatian tikang ha iyo an pulong ni Jehova, kondi ha tagsa nga lugar an mga tawo nakabati mahitungod han iyo pagtoo ha Dios, salit waray na kami masisiring pa.
9 Hira mismo an nagpipinanumat kon paonan-o namon kamo siyahan nga nakaistorya ngan kon paonan-o niyo ginbayaan an iyo mga dios-dios basi magpauripon ha buhi ngan totoo nga Dios,
10 ngan maghulat han iya Anak tikang ha langit, an iya ginbanhaw nga hi Jesus, nga magtatalwas ha aton tikang ha tiarabot nga kangalas han Dios.
