Xoossaa Sambbata SHemppuwau Gelidetii?

“Xoossaa qaalai paxa de7eesinne oottees.”—IBR. 4:12.

1. Xoossaa sambbata shemppuwau nuuni ha wodiyan gelana danddayiyo issi ogee awugee, hegaadan oottiyoogee haasayiyoogaappe deexxiyaaba gididoy aybissee?

XOOSSAA halchuwaara moggiya ogiyan azazettiyoogaaninne oottiyoogan Yihoowa sambbata shemppuwau gelana danddayiyoogaa hagaappe kasetiya huuphe yohuwan beˈida. SHin hegaadan oottiyoogee haasayiyoogaa mala metennaba gidenna. Leemisuwau, nuuni dosiyo issibay Yihoowa ufayssennaagaa akeekiyo wode, ayyo azazettiyoogee metiyaaba gidana danddayees. Hegaa mala hanotay gakkiyo wode, nuuni ‘ero gaanau’ giigettidaageeta gidana koshshees. (Yaaq. 3:17) Nuuni Xoossaa halchuwaara moggiya ogiyan ero giidi wozanappe azazettiyaageeta gidiyoogaa woy aggiyoogaa eranau maaddiya hanotatuppe amaridaageeta ha huuphe yohuwan tobbana.

2, 3. Yihoowa ufayssanau, nuuni ubbatoo ay oottana bessii?

² Geeshsha Maxaafaappe zoree intteyyo imettiyo wode waati ekkana koshshii? Xoossay “kawotettatu ubban de7iya [“alˈˈo aquwaa, NW”]” bau shiishshanau koyiyoogaa Geeshsha Maxaafay yootees. (Hag. 2:7) Nuuppe daroti koyro tumaa eriyo wode, alˈˈo aqo gidennaagee tuma. SHin Xoossaanne a Naˈaa siiqiyoogee kumetta hanotan Xoossaa ufayssanau, qofaaranne eeshshaara gayttidaagan nuuni keehippe laamettanaadan oottiis. Koshshiya laamiyaa oottanau Yihooway maaddanaadan woossidi, hegaara moggiyaabaa oottanau baaxetida; yaatidi, xammaqettiyoogan Xoossaa ufayssiyaabaa  oottida.—Qolasiyaasa 1:9, 10 nabbaba.

³ SHin nuuni xammaqettikkokka, polotettaa pacaara baaxetoos. Nuuni polo gidana gakkanaashin polotettaa pacaara baaxetiyoogee attenna. Gidikkokka, nuuni hegaadan ubbatoo baaxetikko, qassi Xoossaa ufayssanau kaseegaappe aaruwan murttikko, Yihooway nu oottiyoobaa anjjanaagaa ammanettoos.

Zoree Koshshiyo Wode

4. Geeshsha Maxaafaa zoriyaa nuuni demmana danddayiyo heezzu ogeti awugeetee?

⁴ Nu deˈuwan issi issibaa giigissanaappe kase, giigissana koshshiyoobata erana bessees. Kawotettaa Addaraashan shiiqiya wozanaa denttettiya haasayay woykko nu xuufetuppe issuwan kiyiya oosuwau denttettiya qofay, nuuni giigissana koshshiyoobay deˈiyoogaa bessana danddayees. Qassi, nuuni shiiqida haasayaa loytti akeekibeennaba woykko xuufiyan kiyida zoriyaa oosuwan peeshshibeennaba gidikko, giigissana koshshiyoobaa nuuni akeekana mala Yihooway nu mala Kiristtaaniyaa goˈettana danddayees.—Galaatiyaa 6:1 nabbaba.

5. Nuuyyo zoree imettiyo wode ufayttennaagaa bessana danddayiyo issi issi ogeti awugeetee? Gubaaˈiyaa cimati nuna maaddanau ubbatoo baaxetana koshshiyoy aybissakko qonccissa.

⁵ Issi uri nuna siiquwaaninne kehatettan zoriyo wodekka, he zoriyaa ufayttidi ekkennan aggana danddayoos. SHin Galaatiyaa 6:1y yootiyoogaadan, ayyaanaaban wozannaama gididaageeti nuna suurissanau baaxetiyo wode, hegaa “ashkketetta ayyaanan” eti oottana mala Yihooway azaziis. Nuuni he zoriyaa siyiyaaba gidikko, Xoossaayyo kaseegaappe aaruwan ‘alˈˈo aqo’ gidoos. Yihoowakko woossiyo wode, nuuni polo gidennaagaa qottennan au yootiyoogee tuma. SHin issi uray nu mooruwaa yootidi zoriyo wode, hegau gaasuwaa shiishshanau, hegee gita mooro gidennaagaa ammanttanau, zoriya uray siiqoy denttettin zoribeenna giidi siranau woy zoree immettido ogiyaa dosennaagaa qonccissanau malana danddayoos. (2 Kaw. 5:11) Woy nu buzo allaalliyaara gayttidaagan zoree imettiyo wode, keehi lanccana danddayoos; leemisuwau hegee, nu soo asaappe issoy oottido moorobaara, nu maayiyoonne alleeqettiyo ogiyaara, nu bollaa geeshshatettaara woy Yihooway ixxiyo, wodiyaa aattiyoobaara gayttidaagaa gidana danddayees. Hegan lancciyoogee, nunakka zoriya uraakka azzanttana danddayees. SHin nu hanqqoy zarbbiyo wode, darotoo he zoree nuna keehi maaddiyoogaa akeekoos.

6. Xoossaa qaalay “wozanan de7iya koshshaanne qofaa” waati qonccissii?

⁶ Xoossaa qaalay ‘oottiyoogaa’ ha huuphe yohoy baasettido xiqisee qonccissees. Ee, Xoossaa qaalay asaa deˈuwaa laammanau danddayissiya hanotan oottees. Xoossaa qaalay nuuni xammaqettanaappe kase issi issi tangguwaa ekkanau maaddidoogaadan, haˈˈikka koshshiya hanotan laamettanaadan maaddees. PHauloosi Ibraawe Kiristtaanetussi xaafido dabddaabbiyan, Xoossaa qaalay “shemppoinne ayyaanai, kureenne kolzzee issippe gaittiyoosaa shaakkana gakkanaassi caddees. Qassi asa wozanan de7iya koshshaanne qofaa i shaakkees” yaagidikka yootiis. (Ibr. 4:12) Xoossay nuuyyo halchidobaa loytti akeekidi, hegau immiyo zaaroy nu wozanan deˈiyaabaa qonccissees. Issi issitoo, beettiya nu hanotaanne (‘shemppuwaa’) nu garssa oonatettaa (‘ayyaanaa’) giddon dummatetti deˈanee? (Maatiyoosa 23:27, 28 nabbaba.) Kaalliya hanotatun intte ay oottanaakko qoppite.

Yihoowa Dirijjitiyaara Issippe Hemettite

7, 8. (a) Issi issi Ayhuda Kiristtaaneti issi issiban Muuse Higgiyaa kaallanaadan denttettiday ayba gidana danddayii? (b) Eti Yihoowa halchuwaara moggennabaa oottidoy ayba ogiyaanee?

⁷Leemiso 4:18y, “Xillotu ogee gallassai seetana gakkanaashin, gujji gujji poo7iya maallado xalqqiyaa mala” yaagiyoogaa nuuppe daroti hassayana danddayoos. Hegaa giyoogee, wodiyaappe wodiyan nu eeshshay loˈˈi loˈˈi, qassi  Xoossaa halchuwaara gayttidaagan nu eray gujji gujji bees giyoogaa.

⁸ Hagaappe kasetiya huuphe yohuwan beˈidoogaadan, Yesuusi hayqqi simminkka, daro Ayhuda Kiristtaaneti Muuse Higgiyaa kaalliyoogaa agganau metootidosona. (Oos. 21:20) Kiristtaaneti Muuse Higgiyaa kaallana bessennaagaa PHauloosi qoncciyan yootikkokka, ayyaanaa kaaletuwan i yootidobaa issoti issoti siyanau koyibookkona. (Qol. 2:13-15) Higgiyaappe amaridaagaa azazettikko, Ayhuda ammanuwaa kaalliyaageetuppe yedetay gakkenna giidi qoppennan aggokkona. SHin PHauloosi Ibraawe Kiristtaanetuyyo xaafido dabddaabbiyan, eti Xoossaa halchuwaara moggiya ogiyan deˈennaba gidikko, Xoossaa sambbata shemppuwau gelana danddayennaagaa qoncciyan yootiis. * (Ibr. 4:1, 2, 6; Ibraawe 4:11 nabbaba.) Eti Xoossan nashettanau, i koyiyo ogiyan ayyo goynnana koshshiyoogaa ammanana bessees.

9. Geeshsha Maxaafaa timirttiyaara gayttidaagan ammanettida wozannaama ashkkaray issi issibaa giigissiyo wode nuuyyo aybi siyettana koshshii?

⁹ Ha wodiyan, amarida Geeshsha Maxaafaa timirttetun issi issibay giigiis. Hegee nuuni azzananaadan gidennan, ammanettida wozannaama ashkkaran ammanettanaadan denttettana koshshees. Ammanettida wozannaama ashkkaraa kalˈˈatiya, Bollaara Heemmiyaagee tumaara gayttidaagan issi issibaa nuuni akeekiyo ogiyan giigissoy koshshiyaaba gidikko, hegaa malabaa giigissanau guyye geenna. Ammanettida wozannaama ashkkaraa keehippe qofissiyay, asay woyganee giyoogaa gidennan, Xoossaa halchuwaara moggiyaabaa oottiyoogaa. Geeshsha Maxaafaa timirttiyaara gayttidaagan ammanettida wozannaama ashkkaray issi issibaa giigissiyo wode intteyyo aybi siyettii?—Luqaasa 5:39 nabbaba.

10, 11. Mishiraachuwaa sabbakiyo hara ogee odettido wode, issotu issootuyyo aybi siyettidee, hegaappe nuuni ay tamaariyoo?

¹⁰ Ane hara leemisuwaakka beˈoos. Xeetu laytta gidiya wodeppe kase, dere haasayaa loytti shiishshiya, Geeshsha Maxaafaa Tamaaretuppe amaridaageeti, banttana nashshiya asau dere haasayaa loytti giigettidi shiishshiyoogaa xallan, sabbakanau imettida oosuwaa poliyaabadan qoppidosona. Eti haasayaa shiishshiyoogan ufayttoosona; qassi etappe issoti issoti asay sabbanaadan koyidosona. Gidikkokka, sooppe soo biyoogaa gujjin, dumma dumma ogiyan ba asay sabbakanaadan Yihooway koyiyoogee guyyeppe erettiis. Dere haasayaa loyttidi shiishshiyaageetuppe issoti issoti sooppe soo biidi sabbakanau koyibookkona. Eta haasayay eti Yihoowa siiqiyaabadaaninne azazettiyaabadan harati qoppanaadan oottiis. SHin sabbakiyo oosoy Xoossaa halcho gidiyoogaara gatti xeelliyo wode, eta qofay, koshshaynne eta denttettiyaabay aybakko qoncciis. Eta hanotan Yihooway ufayttibeenna gishshau, eta anjjibeenna. Yihoowa dirijjitiyaappekka kiyidosona.—Maa. 10:1-6; Oos. 5:42; 20:20.

¹¹ Koyro heeran, sooppe soo biidi sabbakiyoogee, Yihoowa dirijjitiyau ammanettida darotuyyo he wode deexxidaba. Gidikkokka, eti azazettidosona. Guyyeppe eti yayyiyoogaa aggidosona; Yihoowaykka eta daro anjjiis. Kase intte meezetibeenna haggaazo qommuwan sabbakanaadan odettikko, intte ayba zaaro immanee? Hegee deexxiyaaba gidikkokka eeno giidi azazettanee?

Siiqiyo Uri Yihoowayyo Goynniyoogaa Aggiyo Wode

12, 13. (a) Ba nagaraappe simmenna uray bohettiyoogaara gayttidaagan nuuni ay oottanaadan Yihooway koyii? (b) Issi issi yelida Kiristtaanetussi paace gidiyaabay aybee, hegee keehippe deexxanaadan oottiyaabay aybee?

¹² Xoossaa ufayssanau asatettaaban, kandduwaabaaninne ayyaanaaban geeshsha gidanaadan odettida maaraara nuuni ubbay moggidi deˈana bessiyoogee qoncce. (Tiitu  2:14 nabbaba.) Gidikkokka, ha hanotatuura gayttidaagan Xoossaa ufayssiyaabaa oottanau issi issitoo metootana danddayoos. Leemisuwau, loˈˈo Kiristtaane gidida aawaassinne aayeessi deˈiya, mexi issi naˈay tumaa aggidabadan qoppite. He yelagay, Yihoowaaranne Xoossau aqida bana yelidaageetuura deˈiya dabbotaappe ‘nagaran guutta wodiyaa ufayttanau’ koyidi gubaaˈiyaappe bohettiis.—Ibr. 11:25.

¹³ A yelidaageeti keehippe azzanoosona. Bohettida uraa xeelliyaagan Geeshsha Maxaafay, “Ishantta ha77i geetettiyaageetuppe issoinne shaaramuxana qaaqqatiyaagaa woi miishshaa amottiyaagaa woi eeqassi goinniyaagaa woi cayiyaagaa woi mattottiyaagaa woi bonqqiyaagaa gidikko, intte aara issippe gaittenna mala, . . . hegaa malaara harai atto, qumaakka mooppite” yaagiyoogaa eti eroosona. (1 Qor. 5:11, 13) Ha xiqisiyan “issoynne” giya qaalay, etaara issi keettan deˈenna so asaa yamiyaa gujjiyoogaakka eroosona. SHin eti bantta naˈaa keehippe siiqoosona. Hegee eti kaallidi deˈiyaagaadan qoppanaadan oottana danddayees: ‘Nuuni aara mule gayttennaba gidikko, nu naˈay Yihoowakko simmanaadan waatidi maaddana danddayiyoo? Nu naˈaara issi issitoo gayttiyoogan hegaadan oottana danddayokkoo?’ *

14, 15. Bohettida naˈi deˈiyo Kiristtaaneti oottana bessiyaabay aybee?

¹⁴ He Kiristtaanetu hanotay nunakka azzanttees. Eta naˈay etaaranne hara Kiristtaanetuura deˈiya dabbotaappe iita ogiyan sinttau suganau dooriis. I hegaadan oottanau doorido gishshau, yelidaageeti a maaddana danddayibookkona. Eti keehippe azzaniyoogee garamissenna!

¹⁵ SHin he Kiristtaaneti ay oottanee? Qoncce gidida Yihoowa azazuwaa azazettanee? Woy hegee “nu soo allaalle” giidi qoppiyoogan, bohettida naˈaara ubbatoo gayttanee? Hegaara gayttidabaa kuuyiyo wode, eti oottiyooban Yihoowau aybi siyettiyaakko qoppana bessees. Yihooway ba dirijjitee geeshsha gidanaadaaninne nagaraa oottida uray bala ogiyaa aggidi gubaaˈiyau simmanaadan maaddanau koyees. He Kiristtaane aawaynne aayyiyaa Yihoowagaa mala qofay deˈiyoogaa waatidi bessana danddayiyoonaa?

16, 17. Aaroona gakkidabaa wotti denttidi qoppiyoogan ay timirtte demmiyoo?

¹⁶ Muuse ishaa Aarooni ba naatuppe naaˈˈati oottidoban keehi unˈˈettiis. A naati Naadaabinne Abiihu, Yihooway azazibeenna yarshshuwaa shiishshin, i eta worido wode Aaroonayyo aybi siyettidaakko qoppite. Hegaa gishshau, eti bantta soo asaappe muleera shaahettidoogee qoncce. SHin qoppana koshshiya harabaykka deˈees. Yihooway Aaroonanne ammanettida a naata, “Intte haiqqenna malanne, [Yihooway] maabara ubbaa bollan hanqqettenna mala, intte huuphiyaa meedissoppite; [kayyottidi] intte maayuwaakka pooshshoppite” yaagiis.  (Wog. 10:1-6) Yihooway yootidobay qoncce. Nuuni mintti siiqana bessiyoy, ammanettibeenna nu soo asaa gidennan, Yihoowa gidana koshshees.

¹⁷ Ha wodiyan, Yihooway ba higgiyaa kanttiyaageeta sohuwaara qaxxayenna. Eti bantta iita oosuwaappe simmanaadan Yihooway siiquwan hanotaa injjeyees. SHin ba nagaraappe simmenna naˈi deˈiyoogeeti, bohettida bantta naˈaara woykko naˈeera bessenna ogiyan gayttiyaaba gidikko, Yihoowayyo aybi siyettii?

18, 19. Bohettida so asaa yamiyaara gayttidaagan Yihoowa azazuwaa kaalliyoogee he soo asau ayba anjjuwaa demissii?

¹⁸ Bohettidi guyyeppe gubaaˈiyau simmidaageeti, bantta laggetinne so asay Yihoowayyo azazettiyoogan bessiyaabaa oottidoogee, eta maaddidoogaa yootoosona. Bohettida issi yelagiyaa ba iita oosuwaa aggada gubaaˈiyau simmanaadan maaddidabaappe “issoy, bohettida uraara gayttida azazuwaa i ishay kaallidoogaa” gidiyoogaa gubaaˈiyaa cimati qonccissidosona. “Geeshsha Maxaafaa azazuwaa i ammanettidi kaallidoogee, a gubaaˈiyau simmanaadan maaddidoogaa” yootaasu.

¹⁹ Yaatiyo gishshau, nu kuushshay ayba gidana koshshii? Geeshsha Maxaafaa zoriyaa kaallennaadan xubbiya, polo gidenna nu wozanaa koshshaa eqettana bessees. Issibaa Xoossay koyiyo ogiyan oottiyoogee ubbatoo aybippenne aaruwan loˈˈo gidiyoogaa kumetta hanotan ammanana bessees.

‘Xoossaa Qaalay Paxa Deˈees’

20. Ibraawe 4:12n deˈiya qofaa akeekana danddayiyo naaˈˈu ogeti awugeetee? (Tohossa qofaa xeella.)

²⁰ ‘Xoossaa qaalay paxa deˈees’ giidi xaafiyo wode, PHauloosi gaana koyidoy Geeshsha Maxaafaa xeelliyaagaana gidenna. * PHauloosi giidoy, Xoossay gelido qaalaa gidiyoogaa yuushuwan deˈiya qofay qonccissees. PHauloosi yootidobay, Xoossay ba gelido qaalaa polennan aggennaagaa bessees. Yihooway hananabaa yootiya Isiyaasa baggaara, “Ta doonaappe kiyiya [qaalai] . . . taani halchchidoogaa polana; qassi kiittidoogaa oottanaappe attin, taakko coo simmenna” yaagidi hegaa qonccissiis. (Isi. 55:11) Hegaa gishshau, issibay nuuni koyidoogaadan sohuwaara polettenna wodekka, danddayana koshshees. Yihooway ba halchoy polettanaadan ‘ubba wode oottiiddi’ deˈees.—Yoh. 5:17.

21. Ibraawe 4:12y cimidaageeti Yihoowayyo oottiyoogaa aggennaadan waati maaddana danddayii?

²¹ ‘Zawi baynna daro asaappe’ daroti unddenna layttau Yihoowayyo ammanetti oottidosona. (Ajj. 7:9) Eti ha siraatan hegaa keena daro layttau deˈana giidi mule qoppibookkona. Gidikkokka, eti hidootaa qanxxibookkona. (Maz. 92:14) Xoossay gelido qaalay coo attennaagaa, giishin paxa deˈiyoogaa, qassi Yihooway hegaa polanau oottiiddi deˈiyoogaa eti eroosona. Xoossay ba halchuwaa xoqqu oottidi xeelliyo gishshau, nuunikka aagaadan xeelliyo wode i ufayttees. Yihooway shemppiiddi deˈiyo ha laappuntta gallassi, i ba halchuwaa polennaadan diggiya aybinne baawa. Ba asaykka cita xekkan he halchuwaara moggiyaabaa oottanaagaa erees. Intte shin, Yihoowa sambbata shemppuwau gelidetii?

[Tohossa qofata]

Hassayay?

• Nuuni ha wodiyan Xoossaa sambbata shemppuwau gelanau ay oottana koshshii?

• Geeshsha Maxaafaa zoriyaa nuuni ekkiyoogaaninne Xoossaa halchuwaa giddon ayba gaytotetti deˈii?

• Geeshsha Maxaafaa kaaletuwaa azazettiyoogee metiyoy ayba hanotaanee, shin nuuni azazettiyoogee keehippe koshshiyoy aybissee?

• Ibraawe 4:12n deˈiya qofaa akeekana danddayiyo naaˈˈu ogeti awugeetee?

[Oyshata]

[Sinttaa 31n deʼiya misiliyaa qonccissuwaa]

Yelidaageeti keehippe azzanoosona