Ekaarta yanaaveeli ya Akorinto 9:1-15
9 Woohima sa muteko woowaakhavihera atthu oororomeleya, khanintthuneya woolepelani etthu,
2 woona weera koosuwela mukhalelo anyu wootthuna okhavihera, kinnuuluma eyo kiittottopelaka ni atthu a oMasedonia weera nyuwo asinna a wAkhaya yoovira eyaakha emoha mureene oolikaneene weera mukhavihere, ni mwaha woowiivaherera wanyu, antxipale a yaawo-tho ahiivaherera.
3 Mene vano, kinnaarumiha asinna ala weera wiittottopela wahu mwaha wa nyuwo woohima sa mwaha ene yoola ohikhale weethiru. Ni nyuwo mukhale oolikaneene ntoko miyo koolenlaakani weera mukhale oolikaneene.
4 Opwaha mwa yeeyo, pooti weera atthu a oMasedonia enaawe vamoha ni miyo ni enimoonelela weera nyuwo khamukhanle oolikaneene. Eyo yeereya vale, hiyo naamuuliwa muru mwaha woowoororomelani nyuwo ni nyuwo-tho mwaamuuliwa muru.
5 Tivawonto konnaaka okhala wootthuneya woorumihelani toko asinna weera yooxekureni weera ethukumanye soovaha sanyu iye muhimmaanyu. Nto naphiya vale iwo, soovaha iyo sinrowa okhala soolikaneene ni munimoonihera weera khamunvaha soovaha iyo mwaha wooweera nnimoonyesererihani opaka eyo, mene nyuwo munvaha ni murima wootheene.
6 Nto woohima sa mwaha ola, ole onaala eso vakhaaniini onhepha vakhaaniini, ole onaala eso yintxipale, onhepha vantxipale.
7 Mutthu ti mutthu avaheke ele olakenlaawe vamurimani vawe, ohiya anyoonyinweene naari mwaha woonyesereriwa, woona weera Muluku onnamusivela ole onvaha moohakalala.*
8 Opwaha mwa yeeyo, Muluku pooti woovahani oreera wawe murima otokweene weera okhale ni nyuwo, tivawonto, ikwaha sootheene nyuwo muneereke okhalano itthu sootheene munhaawelaanyu, nyuwo munookhalano itthu sootheene sintthuneya weera nvare muteko wootheene wooreera.
9 (Ntoko hiiha elempwalaaya: “Owo onnavaha moomalela; onnaavaha atthu oohaawa. Ni exariya awe ennakhala wa mahiku ootheene.”
10 Muluku yoowo onanvaha eso mulipa oowaala, ni onnaavaha atthu epaawu weera ekhuureke, ni owo onrowa woovahani eso weera mwaale ni onkela opuhuwiha.* Nave onimwaatxeerera itthu munkelaanyu ohepha mwaha wa miteko sanyu sa exariya.)
11 Muluku ohooreelihani nyuwo vantxipale weera nvaheke, moorweela mwa wiilipihera wahu ovaha, onnaweeriha atthu akina omuxukurela Muluku;
12 mwaha wooweera muteko ola woowaakhavihera atthu, khonvareliwa paahi weera waakhavihereke atthu ale oororomeleya, mene-tho onnaweeriha atthu antxipale omuxukurela Muluku.
13 Awo ennanvuwiha Muluku mwaha wooweera nikhavihero munaavahaanyu ninnoonihera weera nyuwo munniiwelela mitthenka sooreera woohima sa Kristu seiyo nyuwo munlaleyaanyu, nave mwaha wooweera munnaakhavihera arumeyi oororomeleya ni atthu ootheene.
14 Nave-tho, awo ennoosivelani ni enimoovekelelani* wa Muluku, mwaha wa oreera murima otokweene wa Muluku, ori ni nyuwo.
15 Ninnamuxukurela Muluku mwaha wa itthu sootikhiniha* onnivahaawe.
