Ekaarta yanaaveeli ya Akorinto 1:1-24
1 Miyo Paulo, kiri murummwa a Kristu Yesu mwaha wa yootthuna ya Muluku, ni munnihu Timotiyu, kinlepela ekaarta ela muloko wa Muluku ori oKorinto. Opwaha mwa yeeyo, ekaarta ela kinaalepela atthu ootheene oororomeleya eri wAkhaya:
2 Oreera murima otokweene wa Muluku ni murettele onkhuma wa Muluku Tiithi ahu, ni wa Pwiya ahu Yesu Kristu, okhale ni nyuwo.
3 Munvuwihe Muluku yoowo ori Tiithi Aapwiya ahu Yesu Kristu, yoowo ori Tiithi oomoriwa ikharari vantxipale ni Muluku onnimaaliha mwa mikhalelo sootheene,
4 yoowo onnimaaliha* mwa maxupo ahu ootheene, ni weera nnimaaliho nenno Muluku onnivahaawe, hiyo-tho niwereke waamaaliha atthu akina mwa maxupo ootheene eneeraaya ekumanekeno.
5 Ntoko atthareli a Kristu, ninnaviriha maxupo mantxipale. Ni mwaha-tho wa Kristu, ninnamaalihiwa vantxipale.
6 Vano, waari weera ninnaviriha maxupo, ninviriha weera mmaalihiwe ni nvuluxiwe; nave, naavahinweene nimaaliho, nivahinwe weera nyuwosa-tho, mmaalihiwe. Nimaaliho nno, nnimookhaviherani nyuwo-tho ovilela maxupo yaawo hiyo ninvirihaahu.
7 Ni hiyo, ninnoororomelani nyuwo ni murima ahu wootheene, weera ntoko hiiho munvirihaanyu maxupo ntoko hiyo, munimwaakhela-tho nimaaliho ntoko hiyo.
8 Asinna, nintthuna weera musuwele weera nooviriha maxupo mantxipale emaara naaraahu eprovinsiya ya wAsia. Hiyo nooviriha maxupo ootepaxa yaawo nahaaweraahu oviriha ni ikuru sahu, ni hiyo naaheera: moohihovela nnimookhwa.
9 Mweekhaikhai, hiyo nuupuwela weera nnimookhwa. Eyo yeereñye weera nihiiroromeleke mwaneene ahu, mene nimuroromeleke Muluku yoowo onaavinyereriha atthu ookhwa.
10 Owo oonivuluxa vaavo naahalenlaahu okhwa ni onkela onivuluxa. Nave hiyo nookhalano yooweherera weera owo aneereke ovirelela onivuluxa.
11 Nyuwosa-tho pooti onikhavihera wakhala weera munoonivekelela. Mpakeke eyo weera atthu antxipale emuxukureleke Muluku mwaha wa onamoona onnivahaawe hiyo mwaha wa mavekelo aatthu antxipale.
12 Hiyo ninniittottopela mwaha woosuwela weera mulaponi, otepaxa wene vamaithoni vanyu neettenle mikhalelo sooreera ni ekhaikhai enkhuma wa Muluku. Opwaha mwa yeeyo, khaninkhala moovarihana ni osuwela wa elapo, mene moovarihana ni oreera murima otokweene wa Muluku. Yoosuweliha ya murima ahu yooreera ennahelela onamoona etthu eyo.
13 Opwaha mwa yeeyo, hiyo khanoolepenleni etthu muneeraanyu muhiwere osoma naari wiiwexexa, nave kinweherera weera nvireleleke wiiwexexa nnene sene itthu iya.
14 Nyuwosa moosuwela weera hiyo nthowa ninweerihani nyuwo wiittottopela. Hiiho-tho, hiyo ninkela wiittottopela mwaha wa nyuwo, nihiku na Apwiya ahu Yesu.
15 Ni nroromelo nna kiraakano, miyo kannatthuna owa toko iwo wooxekurani, weera mukhaleno-tho ohakalala ekwaha yanaaveeli;
16 miyo kannatthuna wooxekurani kaarowaka oMasedonia ni kaatthikaka oMasedonia. Ni ohooliwa vakhaaniini ni nyuwo mphironi kaarowaka oYudeya.
17 Menento vaavo kaapankaaka yoothanla ela, nkonne ntoko etthu yooramuseya, hooye. Naari neereke kinampaka palano aka moovarihana ni yootthuna aka? Weera keereke “aani, aani” ni avinyaka keereke “hooye, hooye.”
18 Mene hiiho ntoko Muluku oraawe oororomeleya, etthu nnooleelaahuni, khaninhima “aani” ni etempu emoharu yeeyo nnahima “hooye”.
19 Yesu Kristu, Mwaana a Muluku, yoowo hiyo, eyo tiiyo, miyo, Silvano* ni Timotiyu noolalenraahuni nyuwo, khanhima “aani” ni etempu emoharu yeeyo aneera “hooye”. Mene owo ahima “aani” onkhala “aani” yoowo.
20 Nihipwatthaka itthu ikavi Muluku olaihenraawe, sootheene iyo sinookhala “aani” moorweela mwa Yesu. Tivawo nneeraahu “amem” wa Muluku mwa nsina na Yesu, weera Muluku avuwihiwe moorweela mwa hiyo.
21 Mene, Muluku onithanlale, oniroromelinhe hiyo ni nyuwosa weera nri vamoha ni Kristu, ni ti yoowo onithanlale.
22 Owo-tho oonihela hiyo yoororomeliha awe yoororomeliha ene eyo, munepa wootteela ori vamurimani vahu eri yoolaihera* awe wa yeele enkela owa muhoolo.
23 Nlelo nkiwiiye oKorinto iwo weera kihiwaatxeerereni oriipiwa murima, Muluku namoona a etthu ela.*
24 Khaiyene weera hiyo nrookhala asineene nroromelo nanyu. Mene hiyo atthu paahi ninvara muteko vamoha ni nyuwo weera muhakalaleke. Woona weera nyuwo mwaalimpeene, mwaha wa nroromelo nanyu.
