Ekaarta yanaaveeli ya Akorinto 2:1-17

  • Paulo onnatthuna owiihera ohakalala (1-4)

  • Namattheka onnaleveleliwa ni onnatthikiheriwa mmulokoni (5-11)

  • Paulo areene oTrowade ni oMasedonia (12, 13)

  • Muteko wa Muluku, onnawina vantxipale (14-17)

    • Hiyo khanikhanle ntoko atthu akina eri anamatumiha a masu a Muluku (17)

2  Koolakela weera ekwaha ekina miyo kinwaaka wooxekurani nkinkela wooriipihani murima. 2  Mwaha wooweera wakhala weera miyo kinimooriipihani murima, taani onrowa okhala iwo weera akihakalalihe ehikhanle yaale kaariipinhaaka murima? 3  Tivanto miyo kilakenlaaka woolepelani nyuwo, weera miyo kawa vale, kihiriipiwe murima mwaha wa nyuwo.* Woona weera kinnaroromela weera itthu sinkiphwanyiha* ohakalala miyo, sinnoohakalalihani ootheene nyuwo. 4  Vaavo koolepelaakani, koolepelani kixupeñyeene, mooriipiwa murima vantxipale ni kimorihaka maithori. Mene nkoolepenleni ni yootthuna weera kooriipiheni murima, mene weera musuwele moota kinoosivelaakani vantxipale nyuwo. 5  Wakhala weera mutthu ohaariipiha murima atthu akina, owo khakiriipinhe murima miyo, mene oriipinhe murima wa ootheene nyuwo. Mene miyo nkintthuna wuuluma vantxipale woohima sa mwaha ola. 6  Nyuwosa* moomuttaruxa mutthu otthenke, nto vano muhimukhootte; 7  mene vano, nyuwo ontthuneya omulevelela mooreera murima ni omulipiha weera ahikhulumuwe mwaha wooriipiwa murima vantxipale. 8  Menento vano, kinnawoopererani weera mmoonihere mulopwana owo weera nyuwo munnamusivela. 9  Tivawo koolepenlaakani: weera koone waari weera munniiwelela mwa itthu sootheene. 10  Wakhala weera moomulevelela mutthu mwaha wa etthu emoha, miyo-tho koomulevelela. Mweekhaikhai, wa yeele eri etthu kilevelenlaaka (wakhala weera koolevelela etthu), kimpaka eyo weera mphwanye mureerelo vamaithoni va Kristu, 11  weera nihiwokiwe* ni Satana, woona weera hiyo noosuwela* etthu ontthunaawe.* 12  Emaara kaaphiñyaaka oTrowade weera kalaleere mitthenka sooreera woohima sa Kristu, kaakhalano eparakha* yoovara muteko wa Apwiya. 13  Nkaakhanle oomaaleleya mwaha wooweera nkamphwannye munnaka Tito. Mwa yeeyo, miyo kaahaalaxera asinna a iwe ni kinarowa oMasedonia. 14  Nimuxukurele Muluku yoowo onneettiha ntoko anakhotto entthika okhottoni ehakalanleene mwaha woowina vamoha ni Kristu. Osuwela wawe onkhala ntoko winkhela ni moorweela mwa muteko ahu, owo onnamwaramwara mapuro ootheene. 15  Hiyo ninlaleya woohima sa Kristu, nnoolikana ni etthu yoowinkhela ohoolo wa Muluku. Winkhela iwo, onnaaphwanya atthu ale enrowa ovuluxiwa ni atthu ale enrowa onyaanyiwa. 16  Woohima sa ale enkela onyaanyiwa, onaaphwanya winkhela onroiha wookhwaani. Mene woohima sa ale enkela ovuluxiwa, onaaphwanya winkhela onroiha wookumini. Vanonto, taani ophwanenle ovara muteko owo? 17  Hiyo ninnaphwanela, woona weera hiyo khanikhanle ntoko atthu akina eri anamatumiha a masu a Muluku, mene nnuuluma ekhaikhai vamaithoni va Muluku ntoko arummwa a Kristu ni nirummwale ni Muluku yoowo.

Footnotes

^ Naari: “ale yeera ekihakalalihe murima.”
^ Naari: “sinkiwiihera.”
^ Masu ala ooweera “nyuwosa” ehimmwale eversu ela, onhimmwa muloko.
^ Naari: “nihiweriwe.”
^ Naari: “khanintikhina.”
^ Naari: “miraakho sawe.”
^ Eyo tiiyo, mulako waahuleya. Ni Ekereku: Mulako wa Apwiya.

Copyrights for this publication