Ekaarta yanaaveeli ya Akorinto 13:1-14
13 Ela ekwaha yanaararu kiniirehereraaka weera kiwe wooxekurani. “Weera esuweliwe waari weera ele enhimmwa ekhaikhai naari hooye, ontthuneya okhalavo anamoona eeli* naari araru.”
2 Nnaamweera miyo kihikhanleene ni nyuwo, mene ele kinhimaaka mooneke ntoko weera miyo kiri iwo ni nyuwo mwa ekwaha yanaaveeli. Ni kinnaaleela varaatxiru* atthu ale etthenke ni atthu akina ootheene weera, wakhala weera miyo kinootthikela iwo, khaavo onkela owera otthawa ottaruxiwa,
3 kapaka eyo, kinimoonihera weera Kristu onuuluma okivarelaka muteko miyo nave Kristu owo khaiyene toohilipa variyari vanyu, mene owo onnoonihera owera wawe otokweene.
4 Mweekhaikhai, ntoko mutthu oohilipa, owo ohiiviwa vamwirini, mene ookhalihiwa mukumi mwaha wa owera wa Muluku. Ekhaikhai weera hiyo vamoha ni owo khanlimpe, mene nnookhala akumi vamoha nuuwo mwaha wa owera wa Muluku weiwo ori ni nyuwo.
5 Nvirelele wiiwehexexa weera musuwele waari weera nlelo munneettela nroromelo, nvirelele woona mutthu a moota heeni nyuwo muraanyu. Naari khamusuwenle weera Yesu Kristu ori oowiiraana vamoha ni nyuwo? Ohikhanle weera muroohiya waakhuleliwa ni Muluku.
6 Miyo kinweherera weera nyuwo musuwele weera hiyo khaniyelenle waakhuleliwa wahu ni Muluku.
7 Hiyo ninnanvekela Muluku weera muhipake etthu yoonanara, khanimpaka eyo weera nikhaleke ntoko atthu oowaakhuleliwa, mene weera nyuwo mpakeke etthu yooreera, nnaamweera mukhalaka ntoko mooyeleela waakhuleliwa wanyu ni Muluku.
8 Hiyo khaninwera ovaanyiha ekhaikhai ohikhanle waakhulela paahi.
9 Hiyo ninnahakalala ikwaha sootheene vaavo nihinlipaahu ni nyuwo munlipaanyu. Etthu nnanvekelaahu Muluku mmavekeloni mwahu, ti yooweera nyuwo mookololiwe.
10 Tivawonto kinoolepelaakani itthu iya nlelo kihinaayeene owa iwo, weera kawa vale iwo kihoottaruxeni mootepaxa vaavo kinkelaaka ovarela muteko owera Apwiya ekivanhaaya, weera koolipiheni ohiya weera woomorihani.
11 Vanonto asinna, nvirelele ohakalala emaara yeeyo munookololiwaanyu, mwaalipihiwaka ni okhalano muupuwelo mmoharu, okhalano murettele; ni Muluku a nsivelo ni a murettele onookhala ni nyuwo.
12 Muulumihaneke mukina ni mukhwaawe nvahanaka epeexu.
13 Atthu ootheene oororomeleya ennoovahani isalaamu.
14 Oreera murima otokweene wa Apwiya ahu Yesu Kristu, nsivelo na Muluku ni na munepa wootteela nivahinwaahu ootheene hiyo, nikhale ni nyuwo.
