Ekaarta yanaaveeli ya Akorinto 5:1-21
5 Woona weera noosuwela weera empa ya elapo ela ya vathi, etenta ela, enoonyaanyiwa.* Ni Muluku onoonivaha empa wiirimu yeeyo ehipakinwe ni matata aatthu.
2 Mweekhaikhai, ninnuupulela vaava nraahu empa ela ya vathi, nitthunaka vantxipale empa nireherelinwaahu wiirimu,
3 weera etempu ninkelaahu owara, nihiphwanyiwe nihiwanre.
4 Mweekhaikhai, hiyo nri etenta ela ninnuupulela moohooxiwa, nihitthunaka ohiya empa ela, mene nintthuna okhalano empa enyowani ya wiirimu, weera ekumi yoohimala eranttele irutthu sahu sihinkhwa.
5 Muluku oonivaha munepa wootteela, apakaka eyo, ooniroromeliha onivaha mareeliho a muhoolo.
6 Vano, ninnaroromela weera vaava nlelo nraahuno erutthu ela, nri ottayi wene ni Apwiya,
7 woona weera nneetta ni nroromelo ohiya ni itthu sinooneya.
8 Mene ninnaroromela vantxipale ni nri oohakalala mwaha woohiya erutthu ela ni opaka empa ahu* ni Apwiya.
9 Nikhale vamoha nuuwo, nikhale ottayi wene nuuwo, yootthuna* ahu omuhakalaliha.
10 Tthiri ootheene hiyo nnookela okhala ohoolo wa Kristu vanipuroni vaavo onuulumaawevo milattu, weera yoole ori mutthu aakhele ele omphwanelaawe, moovarihana ni miteko ovanraawe emaara aaraawe mweerutthuni, sikhale miteko sooreera naari soonanara.
11 Vano, woona weera noosuwela etthu entaphulelaaya owoova Apwiya, nivireleleke oweeriha atthu akina ororomela, mene hiyo noosuweliwa nnene ni Muluku. Nto, kinweherera-tho weera yoosuweliha anyu ya murima enisuwele nnene.*
12 Hiyo khanneera wiisuweliha wanaaveeli ni nyuwosa, mene nnoovahani mathowa weera mwiittottopeleke mwaha wa hiyo. Nimpaka eyo, weera nyuwosa nwereke owaakhula yaale eniittottopela mwaha wa itthu sa omokoni* ohiya mwaha wa itthu siri vamurimani.
13 Naapankeene etthu mwaha wookhwa anepa, nipanke mwaha wa Muluku, ni naapankeene moowiisuwela, nipanke eyo weera muttottele mureerelo nyuwosa.
14 Nsivelo na Kristu ninneeriha, woona weera etthu ninsuwelaahu tiila: mulopwana mmoha ohookhwa mwaha wa atthu ootheene, woona weera atthu ootheene yaahookhwa.
15 Owo aakhwenle atthu ootheene ni weera ale eri akumi ehiisiveliheke mwaneene aya, mene emusiveliheke Kristu yoowo okhwiiye mwaha wa atthu ootheene ni ovinyererihinwe.
16 Okhuma viinaano mpaka muhoolo, khaninwoona atthu moovarihana ni moonelo wa atthu. Ni waari weera naamoonela hiiho Kristu khalayi ene, vano khanimpaka eyo.
17 Vanonto, waari weera mutthu ori oowiiraana ni Kristu, owo yoopattuxiwa enyowani. Itthu sa khalayi soovira. Nwehe! Itthu inyowani sohoowa.
18 Mene itthu sootheene iya sinkhuma wa Muluku, yoowo oniiraaninhe weera nikhaleno onthamwene nuuwo moorweela mwa Kristu ni owo oonivaha muteko woowaakhavihera atthu akina wiiraana ni okhalano onthamwene nuuwo.
19 Eyo tiiyo, Muluku moorweela mwa Kristu aamweera owiiraaniha atthu weera ekhaleno onthamwene nuuwo ahaathorihaka atthu moovarihana ni soottheka saya. Owo oonivaha muteko woolaleya mitthenka seiyo sinaakhavihera atthu otthikihera okhalano onthamwene aya ni Muluku.
20 Hiyo anamitthenka nimmuranttela Kristu, onkhala ntoko weera Muluku onnivarela muteko hiyo weera naawope atthu. Ntoko atthu emmuranttela Kristu, ninnaatxonttela atthu neeraka: “Mutthikele wiiraana ni Muluku.”
21 Kristu khatonko ottheka, ni Muluku onvaha owo ntoko makeya* mwaha wa soottheka sahu weera moorweela mwa yoowo, niwere okhala anaxariya vamaithoni va Muluku.
