Ekaarta yanaaveeli ya Akorinto 7:1-16
7 Vanonto asinna oosiveleya, woona weera nookhalano soolaihera iya, niirapihe wa mikhalelo sootheene sa erutthu ni sa munepa, nikhale ootteela weera nimooveke Muluku.
2 Munihulele murima anyu. Khanimpakenle mutthu etthu yoohixariya, khaavo nimukumihenraahu maxupo naari khaninwonke mutthu weera niphwanye mureerelo ahu.
3 Miyo nkinhima itthu iya weera koothoriheni. Woona weera miyo kohooleelani weera nyuwo muri vamurimani vahu, weera nikhwe vamoha ni weera nikhale akumi vamoha.
4 Kinuuluma ni nyuwo woohookhuwani etthu. Kinniittottopela vantxipale mwaha wa nyuwo. Koophwanya nimaaliho noomalela; ni mmaxuponi mwahu mootheene miyo koophwanya ohakalala vantxipale.
5 Mweekhaikhai, emaara naaphiñyaahu oMasedonia, naavirelela oviriha maxupo mwa mikhalelo sootheene, naari neere, nannatthara-tthariwa ni amwiittani ahu ni maxupo mmulokoni.
6 Mene Muluku onaamaaliha* atthu ooriipiwa murima, owo aanimaaliha* ni owa wa Tito.
7 Ohiya paahi mwaha wa owa wawe, nave-tho mwaha wa nimaaliho ophwannyaawe mwaha wa nyuwo, ni owo onleela yootthuna anyu ya okoona, oriipiwa wanyu murima ni oxupeya wanyu mwaha wa miyo, nto eyo yookeeriha okhala oohakalala vantxipale.
8 Nnaamweera itthu kaalempaaka mukaartani sooriipinheni murima, miyo nkinkhupanya. Nnaamweera woopatxerani miyo kaakhupannye (Kinoona weera ekaarta koolepenlaakani yaahooriipihani murima nnaamweera waari mwa etempu vakhaaniini),
9 mene vano, kinnatteeliwa murima, khaiyene kintteeliwa murima mwaha wooweera murookhala ooriipiwa murima ni ikaarta saka, mene kintteeliwa murima mwaha wooweera oriipiwa wanyu murima wooweerihani ottharuwa.* Woona weera muriipinwe murima moovarihana ni yootthuna ya Muluku, nto eyo yohookhaviherani. Tivawonto, itthu noolenlaahuni khasookumihenreni maxupo.
10 Mwaha wooweera oriipiwa murima moovarihana ni yootthuna ya Muluku, onnaweeriha atthu ottharuwa soottheka saya weera evuluxiwe, ni eyo ennaweeriha ovuluxiwa; menento oriipiwa murima moovarihana ni elapo, onkumihera okhwa.
11 Ekhaikhai weera nyuwo muriipinwe murima moovarihana ni moota Muluku ontthunaawe, tivawonto nyuwosa mohiilipihera opaka etthu yooreera: Mooreeriha nsina nanyu, mwaaxupeya mwaha wa etthu yoonanara yaapakinwe, mwaamoova Muluku, mwaatthuna ottharuwa, mohiilipihera onvarela muteko Muluku ni murima wootheene ni mwaareherera etthu yoonanara yaapakinwe. Itthu sootheene sipakinwe mooreerela weera ereheriwe maxupo ala.
12 Nnaamweera miyo koolepenleni, nkimulepenle mutthu ole opanke etthu yoonanara,* naari nkimulepenle mutthu ole emphwannye maxupo mwaha wa etthu yoonanara* eyo. Mene koolepenleni weera mwiisoonihere okhala a ekhaikhai vamaithoni va Muluku, mwiilipiheraka wiiwelela masu ahu.
13 Itthu sene ti seiya saanilipinhe.
Mene ohiya nimaaliho naakhenlaahu paahi, hiyo-tho naatepaxa ohakalala mwaha wa otteeliwa murima wa Tito, mwaha wooweera ootheene nyuwo moomulipiha.
14 Emaara kuulumaaka nuuwo woohima sa nyuwo, miyo nkuulinwe muru, ni nkiittottopenle vasiiyoni vene. Wiittottopela wahu ohoolo wa Tito ti weekhaikhai ntoko hiiho itthu sootheene noolenlaahuni siraaya sa ekhaikhai.
15 Opwaha mwa yeeyo, woosivelani wawe vantxipale onnaatxeerereya etempu yeeyo owo onuupuwelaawe moota ootheene nyuwo muniiwelelaanyu ni moota mmwaakhenlaanyu ni nttittimiho ntokweene.
16 Kinnahakalala mwaha wooweera miyo pooti woororomelani* nyuwo mwa itthu sootheene.
