Ekaarta yanaaveeli ya Akorinto 8:1-24
8 Vano asinna, nintthuna weera musuwele woohima sa oreera murima otokweene wa Muluku sooniherinwaaya miloko sa oMasedonia.
2 Emaara awo yaavirihaaya maxupo, awo yaahoonihera okhala oohakalala ni oovaha, ni eyo yeereñye* nnaamweera awo yaari oohaawa vantxipale.
3 Miyo kinnakhalela onamoona weera awo evanhe moovarihana ni ele yaaraayano, aani, mpaka opwaha ele yaaweraaya.
4 Moohinyesereriwa, awosa yaanitxonttela ikwaha sintxipale weera ekhaleno eparakha ya ovaha soovaha mooreera murima, ni weera yeerele eparte muteko woowaakhavihera atthu oororomeleya.
5 Ni awosa yaapaka* opwaha ele hiyo naawehereraahu, woona weera woopatxerani yaahiivaherera wa Apwiya ni wa hiyo, moorweela mwa yootthuna ya Muluku.
6 Tivawonto, nanvekela Tito weera amalihere muteko aapatxenraawe variyari vanyu wookuxa soovaha sanyu soohinyesereriwa.*
7 Menento, nyuwosa mookhalano itthu sootheene soowaatta,* ntoko nroromelo, owera wuuluma, osuwela, nthiti nookwanela, ni nyuwosa munnaasivela atthu ntoko hiiho hiyo nnoosivelaahuni. Tivawonto, mwiilipihereke otthuna ovaha wa moota ene yoowo.
8 Miyo nkinuuluma eyo ntoko nlamulo, mene kintthuna weera musuwele wiilipihera ni otthuna atthu akina eraayano woowaakhavihera atthu akina. Ni kintthuna woona osivela wanyu waareene weekhaikhai.
9 Woona weera nyuwosa moosuwela oreera murima otokweene wa Apwiya ahu Yesu Kristu: nnaamweera owo aari namuhakhu aakhala oohaawa mwaha wa nyuwo, weera mukhale anamuhakhu moorweela mwa ohaawa wawe.
10 Ni woohima sa mwaha ola, moonelo aka toola: etthu eyo ennookhaviherani nyuwo, woona weera eyaakha evinre mwaapatxera muteko ola. Opwaha mwa yeeyo, mwaahoonihera otthuna wanyu opaka eyo.
11 Mene vano, mmalihe muteko mpatxenraanyu ovara. Mwapaka eyo, nyuwosa munoowera omaliha muteko owo moovarihana ni ele muraanyuno, ntoko hiiho nyuwosa mwaatthunaanyu opaka khalayi.
12 Mene Muluku onnamusivela naavahaka ni murima ahu wootheene, woona weera owo onweherera weera nivaheke moovarihana ni ele mutthu onweraawe.*
13 Mene miyo, nkintthuna waarula muritti atthu akina, weera koolemeliheni nyuwo;
14 nto weera itthu sootheene silikane, nvariheleke muteko itthu sintxipale muraanyuno viinaano, weera mukhavihere othoiwa waya, weera awo-tho evarihele muteko itthu saya weera yookhavihereni itthu sinoothowani weera itthu sootheene silikane.
15 Ti hiiho elempwalaaya weera: “Mutthu orino itthu sintxipale khaanoonoxa itthu sintxipale, ni mutthu orino itthu vakhaaniini, khakhanleno itthu vakhaaniini.”
16 Ninnamuxukurela Muluku mwaha wooweera Tito onnookosoopani nnene sene ntoko hiyo nneeraahu,
17 mwaha wooweera Tito khaiyene orimweera waakhulelaru paahi etthu nanvekenlaahu, mene ni otthuna wawe oolakela owa wa nyuwo.
18 Mene, nnoomurumiha vamoha nuuwo munna onttottopeliwa miloko sootheene mwaha woolaleya mitthenka sooreera.
19 Opwaha mwa yeeyo, owo oothanliwa ni miloko weera eetteke ikwaha vamoha ni hiyo nroihaka soovaha iya seiyo ninrowaahu okawa weera evuwihiwe Apwiya. Ntoko yoowoonihera ya otthuna wahu waakhavihera atthu akina.
20 Hiiho, hiyo ninnasepa wuulummwa moohireerela mwaha wa soovaha iya ninkosoopaahu.
21 Tthiri hiyo ‘ninnakosoopa itthu sootheene moororomeleya ohiya paahi vamaithoni va Yehova,* nave-tho vamaithoni wa atthu’.
22 Opwaha mwa yeeyo, hiyo ninnamurumiha vamoha nuuwo munnihu, yoowo ikwaha sintxipale nimweerenraahu nimoona weera onnakhalela nthiti nyaha sintxipale. Mene owo vano onnatepa okhalela nthiti woona weera toororomeleya vantxipale.
23 Vano, yakhala atthu enkoha weera Tito taani? Mwaaleeleke weera owo onvara muteko vamoha ni miyo weera nookhavihereni; naari yakhala enkoha weera, asinna ala taani? Mwaaleeleke weera arummwa a miloko, ni ennanvuwiha Kristu.
24 Vanonto, moonihereke weera munnaasivela asinna awo ni murima anyu wootheene nave nwoonihereke atthu a mmulokoni ele enneeriha hiyo wiittottopela mwaha wa nyuwo.
