Ekaarta yanaaveeli ya Akorinto 6:1-18
6 Ninvara muteko vamoha ni Muluku, nave-tho ninnoovekelani weera muhaakheleke oreera murima otokweene wa Muluku avinyaka muhimpakela* etthu oreera murima iwo.
2 Woona weera owo enre: “Etempu yoophwanelela koowiiwa ni nihiku noovuluxa kohookhavihera.” Nwehe, vano etempu yooreerela. Nwehe vano nihiku nna nihiku na ovuluxiwa!
3 Khannaavaha atthu mathowa oowaakwattuliha, weera ahikhale mutthu onuuluma onyala muteko nnanvarelaahu Muluku.
4 Mene mwa mikhalelo sootheene, ninniisoonihera okhala arumeyi a Muluku: noovilela weereriwa woovirikana, mmaxuponi, etempu yooxupa, ni moohaawani.
5 Naamaniwa, naawaleliwa mukateya, naakumana ni muloko mutokotoko wa atthu a owali, naavara muteko vantxipale, naaviriha mahiku makina woohikona, naavoliwa etala.
6 Nookhalano ekumi yooreera, ekumi ahu ennavarihana noosuwela, hiyo toopixa murima, hiyo tooreera murima, ninnahiya munepa wootteela weettihaka ekumi ahu, nsivelo nahu khaiyene ti noowootha.
7 Hiyo nnuuluma ekhaikhai, ninroromela owera wa Muluku, ninnavarela ikaruma sa ekhotto sa exariya ni ntata noolopwana ni ntata noothiyana.
8 Ninnavuwihiwa ni khaninttittimihiwa, ninnaveehiwa ni ninnattottopeliwa. Nnaamweera hiyo nuulumaka ekhaikhai atthu ennoona okhala anamootha;
9 ntoko atthu oohisuweliwa, mene Muluku oonisuwela, ntoko atthu ehalenle vakhaaniini okhwa,* mene nri akumi, ninnooniwa ntoko atthu oottaruxiwa, mene khanlamulinwe wiiviwa.
10 Atthu enoona weera hiyo atthu ooriipiwa murima, mene ikwaha sootheene nri oohakalala, ennoona ntoko atthu oohaawa, mene, ninnaavaha itthu sintxipale sooreera atthu, ninkhala ntoko atthu oohikhalano etthu, mene nnaamweera vareene hiiho, hiyo nookhalano itthu sootheene.
11 Asinnaka a oKorinto, hiyo ninnuuluma ni nyuwo woohookhuwani etthu, nave ninnoohulelani mirima sahu.*
12 Hiyo nohoohulelani mirima sahu nyuwosa, mene nyuwosa khamunihulenle mirima sanyu.
13 Kinuuluma ni nyuwo ntoko anamwane aka, munikosoopeke ntoko hiyo nnookosoopaahuni. Muhuleke vantxipale mirima sanyu.
14 Muhitakanseraneke ni ale ehirino nroromelo. Exariya envarihana hayi ni etthu yoonanara naari waara onvarihana hayi ni epiphi?
15 Opwaha mwa yeeyo, ovarihana heeni okhanle eriyari ya Kristu ni Satana?* Naari neere, ovarihana heeni okhanle wa mutthu oororomela ni mutthu oohikhalano nroromelo?
16 Ni etemplu ya Muluku envarihana hayi ni amiluku eethiru? Hiyo etemplu ya Muluku mmoha mukumi, ntoko Muluku ohimmaawe: “Miyo kinrowa okhala variyari vaya ni kinrowa weettaka variyari vaya, kinrowa okhala Muluku aya ni awo enrowa okhala muloko aka.”*
17 “‘Tivawonto, mukhume variyari vaya ni nvalaane’, ohimme Yehova,* ‘ni muhiye ovara itthu soonanara’”;* “‘ni miyo kinoowaakhelani.’”
18 “‘Ni miyo kinrowa okhala Tiithi anyu, ni wa miyo nyuwo munrowa okhala anamwane aka asilopwana ni asithiyana’, ohimme Yehova,* Muluku Oowera Sootheene.”
