Ekaarta yanaaveeli ya Akorinto 3:1-18
3 Neereke nintthuneya wiisuweliha wa nyuwo ntoko eneeraaya atthu akina? Neereke nintthuneya woorumihelani ikaarta inoonihera weera hiyo anamalaleera? Neereke nintthuneya waakhela ikaarta sinkhuma wa nyuwo?
2 Ekaarta ahu ti nyuwo, yeeyo elempwale vamurimani vahu, esuwelinwe ni ensommwa ni atthu ootheene.
3 Mwaha wooweera onnooneya weera nyuwo ekaarta ya Kristu, yeeyo elempwale ni hiyo, arumeyi a Muluku. Ekaarta eyo khelempwale ni etinta, mene elempwale ni munepa wa Muluku mukumi, khelempwale vamalukuni, mene elempwale vamurimani vaatthu.
4 Woona weera Kristu onnanikhavihera, eyo ennanroromeliha weera Muluku oonithanla weera nikhale arumeyi awe.
5 Mene hiyo khanaanoono owera woovara muteko ola.* Mene Muluku tonnivaha owera woowera ovara muteko ori poothe.
6 Mweekhaikhai, Muluku onnivaha owera, weera nikhale arumeyi a Muluku a nivarihano nnyowani, ohiya nnivarihano noolempwa, mene na munepa; woona weera nivarihano nakhalayi ninnakumihera okhwa, mene nivarihano na munepa wa Muluku ninvaha ekumi.
7 Vano nlamulo ninkumihera okhwa nenno naalempwe vamalukuni naakumiheriwa ni ovuwa otokweene, mpaka ana a Israeli ohiwera oweha owiitho wa Mose, mwaha wa moota waaraaya owiitho wawe. Menento ovuwa iwo waamala.
8 Vanonto, okaiwa wa munepa wa Muluku khawaakela okumiheriwa ni ovuwa otokweene?
9 Vano, waari weera Nlamulo naakumihera okhwa naari noovuwa, nto muteko onaakhaliha atthu anaxariya* wookhalano ovuwa vantxipale!
10 Nto ovuwa wa Nlamulo nakhalayi woovuvuriwa* nnivarihano nnyowani.
11 Vano, waari weera etthu ele yeera emalihiwe yaawiiye ni ovuwa, nto nivarihano nnyowani, nnoovuwihiwa vantxipale!
12 Vanonto, woona weera nookhalano yooweherera ela, nuulumeke moolipa murima,
13 ni khanimpaka ntoko Mose aakhuneela owiitho ni ekuwo* weera ana a Israeli ehiwereke oweha omamaliheroni wa ele yaakela omala.
14 Mene muupuwelo aya khawiiwexenxe. Mpaka vano, muupuwelo aya onnavirelela okhala wookhuneeliwa ntoko orino ekuwo* ni khenwera wiiwexexa nivarihano nakhalayi ni eveewu eyo, enwera okumihiwa paahi moorweela mwa Kristu.
15 Mpaka olelo va, saasommwaka soolempwa sa Mose awo khenwera wiiwexexa. Woona weera mirima saya sookhuneeliwa.
16 Mene emaara yeeyo mutthu onttharuwaawe, onanvarela muteko* Yehova,* eveewu eyo ennakumihiwa.
17 Yehova* munepa, mene ale erinono munepa wootteela wa Yehova* tootaphuwa.*
18 Ootheene hiyo nikuminhe eveewu owiitho wahu, ninkhala ntoko espeeliyu enoonihera ovuwa wa Yehova.* Hiyo nintatuxiwa weera nilikaneke ni Muluku ni noonihereke vantxipale ovuwa wa Muluku, ntoko ontthunaawe Yehova* yoowo ori Munepa.*
