Lwonolwo ndi luṅwe lwa maṅwalo ane a ḓivhiwa vhukuma na o redzwaho Bivhilini yoṱhe. Zwo no ḓi ambiwa uri a hu na iṅwe ndimana ine ya “amba nga u tou pfufhifhadza nga ha vhushaka ha vhathu na Mudzimu na nḓila ine ra ḓo tshidzwa ngayo u fana na lwonolu luṅwalo.” Nga zwenezwo, kha maṅwe mashango lwonolu luṅwalo lwa “Yohane 3:16” kana ndaedzi dzalwo, kanzhi zwo ṅwalwa kha zwiitea zwa vhomuthumunzhi, kha zwiṱikara zwa goloi, kha zwifanyiso zwa dzimbondoni na huṅwe-vho.

Kha mashango oṱhe a itaho zwenezwo, vhane vha ṱana lwonolwo luṅwalo vha tenda uri lufuno lwa Mudzimu lu ḓo vha ita uri vha tshidzwe nga hu sa fheli. Hupfi mini nga inwi? Lufuno lwa Mudzimu lu amba mini kha inwi? Nahone ndi mini zwe Mudzimu a zwi ita zwine zwa sumbedza uri u a ni funa?

Vhathu vhanzhi vho ḓiimisela u tenda uri Mudzimu ndi ene o sikaho fhethu hoṱhe, mupo, u katela na vhathu. Zwithu zwi tshilaho zwo sikwa nga nḓila yo serekanaho nahone zwo sikwa zwavhuḓi lune zwa tou vha khagala uri ho vha hu tshi ṱoḓea vhuṱali uri zwi vhe hone. Vhathu vhanzhi vha livhuha Mudzimu ḓuvha ḽiṅwe na ḽiṅwe nge a vha ṋea tshifhiwa tsha vhutshilo. Vha dovha hafhu vha zwi ṱhogomela uri vha fanela u ḓitika tshoṱhe nga Mudzimu u itela u wana zwoṱhe zwine vha zwi shaya—zwi ngaho sa muya, maḓi, zwiḽiwa na mitevheṱhaḓu ya mupo ya kha ḽifhasi—u itela uri vha bvele phanḓa vha tshi tshila na u takalela zwine vha zwi ita.

Ri ita zwavhuḓi musi ri tshi livhuha Mudzimu kha zwenezwi zwithu zwoṱhe ngauri vhukuma ndi Musiki na Mutikedzi wa vhutshilo hashu. (Psalme ya 104:10-28; 145:15, 16; Mishumo 4:24) Ri nga livhuha lufuno lune Mudzimu a vha nalwo kha riṋe musi  ri tshi humbula nga ha zwithu zwoṱhe zwine a khou zwi ita u itela uri vhutshilo vhu vhe hone. Muapostola Paulo u zwi vhea nga hei nḓila: ‘Mudzimu u ṋea vhathu vhoṱhe vhutshilo na muya wa u fema na zwithu zwoṱhe. Ngauri ri tshi tshila, ri tshi tshimbila, ri tshi vha hone, ndi nga ene.’—Mishumo 17:25, 28.

Naho zwo ralo, lufuno lwa Mudzimu lu vhonala nga nḓila nnzhi, hu si nga u ri ṱhogomela nga lwa ṋama fhedzi. O ri sika uri ri vhe na tshirunzi u fhira dziphukha nahone a ri hulisa nga u ri ṋea lutamo lwa u mu gwadamela nahone u a ri thusa u ita nga u ralo. (Mateo 5:3) Nga yeneyo nḓila, vhathu vhane vha thetshelesa vha na tshilavhelelwa tsha u vha tshipiḓa tsha muṱa wa Mudzimu, “vhana” vhawe.—Vharoma 8:19-21.

Samusi Yohane 3:16 i tshi bvela phanḓa nga uri Mudzimu o ri sumbedza uri u a ri funa nga u rumela Murwa wawe Yesu kha ḽifhasi u itela u ri funza nga ha Mudzimu wawe na Khotsi na u ri fela. Naho zwo ralo, vhathu vhanzhi vha a tenda uri a vha pfesesi uri ndi ngani zwo vha zwi tshi ṱoḓea uri Yesu a fele vhathu na uri lufu lwa Yesu lu sumbedza hani uri Mudzimu u a ri funa. Kha ri vhone uri Bivhili i ṱalutshedza hani tshiitisi tsha lufu lwa Yesu na ndeme yalwo.

Vhathu vhoṱhe a vho ngo fhelela, vha a lwala, u vha vhalala nahone vha fa. Vhukuma, yeneyo yo vha i si ndivho ya Yehova Mudzimu u bva mathomoni. O ṋea vhathu vha u thoma tshilavhelelwa tsha u tshila tshoṱhe paradisoni kha ḽifhasi. Fhedzi hu na tshithu tshithihi tshe vha vha vha tshi fanela u tshi ita: Vho vha vha tshi fanela u mu thetshelesa. Mudzimu o vha vhudza uri arali vha sa thetshelesa vha ḓo fa. (Genesi 2:17) Muthu wa u thoma o landula vhuvhusi ha Mudzimu nahone zwenezwo zwo ita uri a fe na vhana vhawe. Muapostola Paulo o amba uri: “Ndi ngazwo tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.”—Vharoma 5:12.

Naho zwo ralo, Mudzimu u “funa mulayo.” (Psalme ya 37:28) Naho a nga si litshe vhukhakhi he ha itwa nga khole nga muthu wa u thoma, Mudzimu ho ngo tendela uri vhathu vhoṱhe vha shengele na u fa lwa tshoṱhe nga nṱhani ha u sa thetshelesa ha muthu muthihi. Zwo fhambanaho na zwenezwo, a tshi shumisa maitele a re mulayoni ane a ri “vhutshilo vhu lifha vhutshilo,” o linganyisela khaṱulokwayo nahone a dovha a ita uri vhutshilo vhu sa fheli vhu konadzee kha vhathu vhane vha thetshelesa. (Ekisodo 21:23) Mbudziso: Vhutshilo ho fhelelaho ho xedzwaho nga Adamu vhu ḓo dovha ha vha hone nga nḓila-ḓe? Phindulo: Ho vha hu tshi ṱoḓea muṅwe muthu ane a ḓo ṋekedza vhutshilo hawe sa tshiṱhavhelo, vhutshilo vhu eḓanaho na ha Adamu—vhutshilo ha muthu o fhelelaho.

Zwi tou vha khagala uri ho vha hu si na muḓuhulu na muthihi wa Adamu we a vha a tshi nga kona u ṋekedza tshenetsho tshiṱhavhelo, ndi Yesu fhedzi we a vha a tshi nga zwi kona. (Psalme ya 49:6-9) Ho ngo mamela tshivhi, Yesu o vha o fhelela u fana na Adamu. Nga zwenezwo, Yesu o ṋekedza vhutshilo hawe, a vhofholola vhathu vhupulini ha tshivhi. Nga u ita zwenezwo, o ṋea vhaḓuhulu vha vhavhingani vha u thoma tshibuli tsha u ḓiphina nga vhutshilo ho fhelelaho he Adamu na Eva vha vha vhe naho. (Vharoma 3:23, 24;  6:23) Naa hu na zwine ra fanela u zwi ita u itela u vhuyelwa nga yeneyo nyito ya lufuno?

Arali ra dovha ra vhala Yohane 3:16, ri ṱhogomela maipfi ane a ri: ‘Muṅwe na muṅwe ane a vha na lutendo kha Yesu a nga si fheliswe, fhedzi u ḓo wana vhutshilo vhu sa fheli.’ Hezwi zwi amba uri u itela u wana vhutshilo vhu sa fheli hu na zwine ra fanela u zwi ita. Arali ri tshi ṱoḓa u wana “vhutshilo vhu sa fheli” ri fanela u tenda kha Yesu na u mu thetshelesa.

Ni nga kha ḓi ḓivhudzisa uri: ‘U thetshelesa zwi katela mini? Naa Yesu ho ngo amba uri “muṅwe na muṅwe ane a vha na lutendo khae” u ḓo wana vhutshilo vhu sa fheli?’ Ee, ndi zwa ndeme u vha na lutendo. Naho zwo ralo, ndi zwa ndeme u humbula uri Bivhilini, a zwo ngo eḓana u sokou tenda uri Yesu u hone. U ya nga Vine’s Expository Dictionary of Old and New Testament Words, ipfi ḽe ḽa shumiswa nga Yohane kha luambo lwa u thoma ḽi amba “u ḓitika, hu si u sokou tenda.” U itela uri muthu a takalelwe nga Mudzimu, u fanela u vha a tshi tenda uri Yesu ndi Mutshidzi. Mutendi u fanela u dovha a ḓiimisela zwi tshi bva mbiluni u ita zwoṱhe zwe Yesu a funza zwone. Arali hu si na mishumo, lwonolwo lutendo ndi lwa fhedzi. Bivhili i ri: “Lutendo lu si na mishumo lwo fa.” (Yakobo 2:26) Zwiṅwe zwine zwa ṱoḓea kha mutendi ndi u vha na lutendo kha Yesu, zwine zwa amba uri u fanela u tshila u tendelana na zwine a zwi tenda.

Paulo o zwi vhea nga hei nḓila: “Lufuno lwa Kristo lu a ri kombetshedza, ngauri zwenezwi ndi zwe ra phetha ngazwo, uri muthu muthihi [Yesu] o ri fela roṱhe . . . nahone o fela vhoṱhe uri vhoṱhe vha tshilaho vha si tsha ḓitshilela, fhedzi vha tshilele we a vha fela nahone a vuswa.” (2 Vhakorinta 5:14, 15) U livhuha hashu tshiṱhavhelo tsha Yesu zwi tshi bva mbiluni zwi fanela u ri sudzulusela u shandula vhutshilo hashu—ra si tsha ḓitshilela, fhedzi ra tshilela Yesu we a ri fela. Zwenezwo zwi amba uri zwa ndeme vhutshiloni hashu ndi u ita zwe Yesu a ri funza. Dzenedzo tshanduko dzi ḓo kwama nḓila ine ra tshila ngayo, zwine ra zwi khetha na zwoṱhe zwine ra zwi ita. Ndi malamba afhio ane a ḓo waniwa nga vhane vha tenda na u sumbedza lutendo kha Yesu?

Tshipiḓa tsha u fhedzisela tsha Yohane 3:16 tshi sumbedza mafulufhedziso e Mudzimu a a fulufhedzisa vhane vha sumbedza lutendo kha ndugiselelo ya tshiṱhavhelo na vhane vha tshila u tendelana na zwilinganyo zwa Mudzimu. Mudzimu o amba uri vhenevho vhane vha fulufhedzea ‘a vha nga fheliswi, fhedzi vha ḓo wana vhutshilo vhu sa fheli.’ Naho zwo ralo, zwilavhelelwa zwo fhamba-fhambanaho zwa vhumatshelo zwo lindela vhane vha vhuyelwa nga lufuno lwa Mudzimu.

Hu na tshigwada tshithihi tshe Yesu a tshi fulufhedzisa vhutshilo vhu sa fheli ngei ṱaḓulu. O vhudza vhafunziwa vhawe vha fulufhedzeaho uri u khou ya u vha lugisela vhudzulo u itela uri vha vhuse nae muvhusoni wawe. (Yohane 14:2, 3; Vhafilipi 3:20, 21) Vhane vha ḓo vuselwa ṱaḓulu “vha ḓo vha vhotshifhe vha Mudzimu na Kristo, nahone vha ḓo vhusa sa mahosi nae miṅwaha ya tshigidi.”—Nzumbululo 20:6.

Ndi vhatevheli vha Kristo vha si gathi fhedzi vhane vha ḓo wana yeneyo ndugelo. Zwi re zwone ndi uri Yesu o ri: “Ni songo ofha, inwi sambi ḽiṱuku, ngauri Khotsi aṋu u takalela u ni ṋea Muvhuso.” (Luka 12:32) Ḽeneḽo “sambi ḽiṱuku” ḽi ḓo vha ḽi na vhathu vhangana? Nzumbululo 14:1, 4, i ri: “Nda lavhelesa, nda vhona Ngwana [Yesu Kristo o vuswaho] yo ima Thavhani ya Tsioni [ṱaḓulu], i na vha 144 000 vhe vha ṅwalwa dzina ḽayo na dzina ḽa Khotsi ayo kha phanḓa dzavho. . . . Vhenevho vho rengululwa kha vhathu uri vha vhe zwiranzhe zwa Mudzimu na zwa Ngwana.” Vha tshi vhambedzwa na vhathu vha dzibilioni vhe vha vhuya vha tshila, vha 144 000 vha tou vha “sambi ḽiṱuku.” Samusi vhenevha vha tshi vhidzwa mahosi, ndi vhafhio vhane vha ḓo vha vhusa?

Yesu o a amba nga ha tshigwada tsha vhuvhili tsha vhathu vha fulufhedzeaho tshine tsha ḓo wana malamba a bvaho Muvhusoni wa ṱaḓulu. Samusi ro zwi vhala kha Yohane 10:16 Yesu o ri: “Ndi na dziṅwe nngu, dzine dzi si vhe dza hetshi tshitumba; na dzenedzo ndi fanela u dzi ḓisa, nahone dzi ḓo thetshelesa ipfi ḽanga, dzi ḓo vha sambi ḽithihi, dza vha na mulisa muthihi.” Dzenedzo “nngu” dzo lavhelela u wana vhutshilo vhu sa fheli fhano kha ḽifhasi—tshilavhelelwa tshi fanaho na tshee Adamu na Eva vha vha vhe natsho u thomani.  Ri zwi ḓivha hani uri vhumatshelo havho vhu kha ḽifhasi?

Bivhili i amba nga ha zwiitea zwinzhi zwine zwa ḓo itea Paradisoni ine ya khou u ḓa kha ḽifhasi. U itela u vhona nga inwi muṋe, ni nga vhala ndima dzi tevhelaho Bivhilini yaṋu: Psalme ya 37:9-11; 46:8, 9; 72:7, 8, 16; Yesaya 35:5, 6; 65:21-23; Mateo 5:5; Yohane 5:28, 29; Nzumbululo 21:4. Dzenedzo ndimana dzo dzula dzo amba hu tshee nga phanḓa nga ha u fheliswa ha nndwa, nḓala, malwadze na lufu. Dzi amba nga ha musi vhathu vho lugaho vha tshi ḓo takalela u kona u fhaṱa dzinnḓu dzavho, u kunakisa shango ḽavho, na u alusa vhana vhavho fhethu hu re na mulalo. * Naa zwenezwo zwilavhelelwa a zwi ni takadzi? Ri na tshiitisi tshavhuḓi tsha u tenda uri eneo mafulufhedziso a ḓo ḓadzea hu si kale.

Arali na ḓiṋea tshifhinga tsha u humbula zwithu zwoṱhe zwe Mudzimu a ni itela zwone na zwe a itela vhathu vhoṱhe nga u tou angaredza, zwi tou vha khagala uri o ni itela zwithu zwinzhi vhukuma. Ri na vhutshilo, vhuṱali, mutakalo, nahone zwenezwo ndi zwa ndeme u itela uri ri tshile. Zwi fhiraho zwenezwo, tshifhiwa tsha Mudzimu tsha tshirengululi a tshi shumisa Yesu, we a ri fela, tshi nga amba phaṱhutshedzo khulwane vhukuma samusi ri tshi zwi guda kha Yohane 3:16.

Vhutshilo vhu sa fheli vhu re na mulalo, zwiimo zwavhuḓi, zwi si na malwadze, dzinndwa, nḓala kana lufu zwi ḓo ri ṋea tshibuli tsha u wana dakalo na phaṱhutshedzo dzi sa fheli. U itela u wana dzenedzo phaṱhutshedzo zwi ḓitika tshoṱhe nga inwi. Mbudziso yo salaho ndi ya uri, Ndi mini zwine na khou itela Mudzimu?