Vhurifhi Ha Vhuvhili Vhu Yaho Kha Vhakorinta 5:1-21
5 Ri a zwi ḓivha uri heḽi dennde ḽine ḽa vha nnḓu yashu i re kha ḽifhasi, ḽi ḓo thuthiwa,+ Mudzimu a ri ṋea nnḓu ya tshoṱhe ngei ṱaḓulu, i songo fhaṱiwaho nga zwanḓa.+
2 Musi ri kha yeneyi nnḓu* ri a gomela, ngauri ri tama zwihulu u wana yashu ye ra i lugiselelwa ṱaḓulu,*+
3 uri musi ri tshi dzhena khayo,* ri si wanwe ri si na vhudzulo.*
4 Ngoho ndi ya uri riṋe vha re kha ḽeneḽi dennde ri a gomela, ro tsikeledzea, ngauri a ri ṱoḓi u bva khaḽo, fhedzi ri ṱoḓa u dzhena kha ḽiṅwe,+ uri ri wane vhutshilo, ri si tsha fa.+
5 Ndi Mudzimu we a ri lugiselela zwenezwi zwithu,+ ndi ene we a ri ṋea muya wawe uri a ri khwaṱhisedze nga ha zwine zwa ḓo ḓa.+
6 Ri dzula ri na vhungoho ha zwenezwi na u ḓivha uri musi ri tshi kha ḓi vha kha wonoyu muvhili, ri kule na Murena,+
7 ngauri ri tshimbila nga lutendo, hu si nga u vhona.
8 Fhedzi a ri timatimi, ri ṱoḓa u tshila na Murena nṱhani ha u vha kha hoyu muvhili.+
9 Ro ḓiimisela u ṱanganedzwa ngae hu sa londwi uri ri dzula nae kana ri kule nae.
10 Ngauri roṱhe ri ḓo ima hune Kristo a sengisela hone, uri ri haṱulwe u ya nga zwe ra zwi ita musi ri tshi kha ḓi vha kha wonoyu muvhili, hu sa londwi uri ndi zwivhuya kana ndi zwivhi.+
11 Ngauralo, samusi ri tshi ṱhogomela uri ri fanela u ofha Murena, ri dzula ri tshi gudisa vhaṅwe uri vha tende, fhedzi Mudzimu u a ḓivha* zwine ra vha zwone. Ndi fhulufhela uri na inwi* ni a ḓivha* zwine ra vha zwone.
12 Ngauri a ri khou dovha ra ḓithemendela kha inwi, fhedzi ri khou ni ṱuṱuwedza uri ni zuwe nga ha riṋe, ni kone u fhindula vhane vha zuwa nga ha zwine vha zwi vhona kha muthu,+ hu si nga zwi re mbiluni.
13 Arali hu na zwe ra zwi ita ri tshi nga ri khou penga,+ ro zwi itela Mudzimu; arali hu na zwe ra zwi ita ri na muhumbulo wo tshaho, ro zwi itela inwi.
14 Ngauri lufuno lwe Kristo a ri sumbedza lu a ri ṱuṱuwedza, zwenezwi ndi zwe ra phetha ngazwo uri muthu muthihi o ri fela roṱhe;+ ngauri vhoṱhe vho vha vho fa.
15 O fela vhoṱhe uri vha tshilaho vha si tsha ḓitakadza,+ fhedzi vha takadze we a vha fela, a vuswa.
16 U bva zwino a ri dzhii muthu u ya nga zwine ra zwi vhona.+ Naho vhaṅwe vhashu ro dzhia Kristo u ya nga zwe ra zwi vhona, zwino a ri tsha kona u ita nga u ralo.+
17 Ane a vha na vhuthihi na Kristo, ndi tsiko ntswa;+ zwa kale zwo fhira, ho bvelela zwiswa.
18 Zwoṱhe zwi bva kha Mudzimu, we a ḓipfumedzanya na riṋe nga Kristo+ na u ri ṋea mushumo wa u thusa vhaṅwe uri vha pfumedzane nae,+
19 zwenezwi zwi amba uri Mudzimu u khou ḓipfumedzanya na vhathu a tshi shumisa Kristo,+ ha tsha vhalela vhutshinyi havho.+ O ri ṋea mushumo wa u vhudza vhathu uri vha nga pfumedzana nae.+
20 Ri vhaimeleli+ vha Kristo,+ zwa nga Mudzimu u humbela a tshi shumisa riṋe. Samusi ri vhuimoni ha Kristo, ri a ni humbela ri ri: “Pfumedzanani na Mudzimu.”
21 Kristo ho ngo ita tshivhi,+ fhedzi Mudzimu o mu ita tshiṱhavhelo* a tshi itela zwivhi zwashu, uri ngae ri vhe vho lugaho phanḓa ha Mudzimu.+
Ṱhaluso dzi re magumoni a siaṱari
^ Kana “ri kha honovhu vhudzulo.”
^ Kana “ri tama zwihulu vhudzulo hashu vhu re ṱaḓulu.”
^ Thevhedz., “musi ro i ambara sa tshiambaro.”
^ Thevhedz., “ri fhedzi.”
^ Kana “vhona.”
^ Kana “vhona.”
^ Thevhedz., “luvalo lwaṋu.”
^ Kana “tshifhiwa tsha u pfumelela tshivhi.”
