Vhurifhi Ha Vhuvhili Vhu Yaho Kha Vhakorinta 3:1-18
3 Naa ri kha ḓi tea u dovha ra ḓithemendela kha inwi? Kani ri ṱoḓa marifhi a u ri themendela kha inwi kana a bvaho kha inwi, u fana na vhaṅwe vhathu?
2 Inwi ni vhurifhi hashu,+ ho ṅwaliwaho mbiluni dzashu vhune ha ḓivhiwa na u vhaliwa nga vhathu vhoṱhe.
3 Ngauri no sumbedza uri ni vhurifhi ha Kristo ho ṅwaliwaho nga riṋe vhashumeli vha Mudzimu,+ vhu songo ṅwaliwaho nga inki, fhedzi ho ṅwaliwaho mbiluni+ nga muya wa Mudzimu a tshilaho, hu si kha matombo.+
4 Mudzimu o ri ṋea ḽeneḽi fhulufhelo a tshi shumisa Kristo.
5 Mudzimu ndi ene ane a ri thusa u ita wonoyu mushumo, a ri iti wonoyu mushumo nga maanḓa ashu,+
6 ndi ene we a ri thusa uri ri vhe vhashumeli vha mulanga muswa,+ hu si vha mulayo wo ṅwaliwaho,+ fhedzi vha muya mukhethwa; ngauri mulayo wo ṅwaliwaho u haṱulela lufu,+ fhedzi muya wa Mudzimu u a tshidza.+
7 Mulayo wo ṅwaliwaho une wa ḓisa lufu, wo ṅwaliwaho kha matombo+ wo ḓa u na vhugala vhuhulu, lwe Vhaisiraele vha si kone u lavhelesa tshifhaṱuwo tsha Mushe nga nṱhani ha vhugala ha tshifhaṱuwo tshawe,+ fhedzi honoho vhugala ho vha vhu tshi ḓo fhela.
8 Ndi ngani u shululwa ha muya mukhethwa+ hu si na vhugala vhuhulu?+
9 Arali Mulayo une wa haṱula vhathu+ u na vhugala,+ mushumo wa u thusa vhathu uri vha vhe vho lugaho u ḓo vha na vhugala vhuhulu vhukuma!+
10 Mulayo a u tshee na vhugala, nga nṱhani ha vhugala ha mulanga muswa.+
11 Arali Mulayo we wa vha u tshi ḓo fheliswa wo ḓa na vhugala,+ mulanga muswa u tea u vha na vhugala vhuhulu!+
12 Ri amba ro vhofholowa ngauri ri na fhulufhelo ḽihulu,+
13 a ri iti zwe zwa itwa nga Mushe musi a tshi fukedza tshifhaṱuwo tshawe nga labi+ uri Vhaisiraele vha si vhone zwine zwa ḓo itea kha zwine zwa ḓo fheliswa.
14 Fhedzi vho vha vha sa pfesesi.+ Na zwino vha bvela phanḓa vha tshi nga vho fukedzwa nga labi, a vha pfesesi mulanga wa kale,+ ngauri ḽeneḽi labi ḽi fukulwa nga Kristo fhedzi.+
15 Zwiṅwe hafhu, mbilu dzavho dzi tshee dzo fukedzwa+ na ṋamusi uri vha si pfesese maṅwalo a Mushe.+
16 Musi muthu a tshi rembuluwa uri a rabele Yehova,* ḽeneḽo labi ḽi a fukulwa.+
17 Yehova* ndi Muya,+ vhane vha vha na muya mukhethwa wa Yehova* vho vhofholowa.+
18 Riṋe roṱhe ri na zwifhaṱuwo zwi songo fukedzwaho nga labi, ri nga zwivhoni zwine zwa vhonetshela vhugala ha Yehova.* Ri khou shandulwa uri ri fane nae, uri ri vhonetshele vhugala hawe nga ho engedzeaho, nga nḓila ine Yehova* ane a vha Muya a ṱoḓa ngayo.+
