1. Yehova u fhulufhedzisa mini vhaitazwivhi vho rembuluwaho?

 NAHO Yehova e Musiki washu, e Muṋei wa Mulayo na Muhaṱuli, u dovha a vha Khotsi ashu wa ṱaḓulu ane a ri funa. (Ps. 100:3; Yes. 33:22) Musi ri tshi mu khakhela nahone ra rembuluwa zwa vhukuma, u na maanḓa a u ri hangwela nahone u vha o ḓiimisela u zwi ita. (Ps. 86:5) Yehova o ri fhulufhedzisa zwi tevhelaho a tshi shumisa muporofita Yesaya. O ri: “Naho zwivhi zwaṋu zwo tswuka sa malofha, zwi ḓo tshena u fana na mahaḓa.”—Yes. 1:18.

2. Ri tea u ita mini arali ri tshi ṱoḓa u vha na mulalo na vhaṅwe?

² Roṱhe ri a khakhela vhaṅwe nga zwine ra zwi amba na zwine ra zwi ita ngauri ri na tshivhi. (Yak. 3:2) Fhedzi zwenezwo a zwi ambi uri ri nga si kone u vha khonani dzavho. Ri nga vha khonani dzavho arali ra nga guda u vha hangwela. (Mir. 17:9; 19:11; Mat. 18:21, 22) Arali muṅwe muthu a ri khakhela nga zwithu zwiṱuku, Yehova u ṱoḓa ri tshi mu hangwela. (Vhakol. 3:13) Zwo tea ngauri Yehova u ri “hangwela tshoṱhe.”—Yes. 55:7.

3. Ri ḓo amba nga ha mini kha ino thero?

³ Kha ino thero, ri ḓo guda uri samusi ri na tshivhi, ri nga edzisa hani Yehova nga u hangwela vhaṅwe. Ri ḓo dovha ra guda uri: Ndi vhukhakhi vhufhio vhune ra tea u vhu vhudza vhahulwane? Ndi ngani Yehova a tshi ṱoḓa uri ri hangwele vhaṅwe? Ri nga guda mini kha vhahashu vhe vha tambula nga nṱhani ha vhukhakhi ha vhaṅwe?

4. (a) Musi Mukriste o ita tshivhi tshihulwane, u tea u ita mini? (b) Ndi vhuḓifhinduleli vhufhio vhune vhahulwane vha vha naho musi vha tshi amba na muitazwivhi?

⁴ Musi muṅwe muthu o ita tshivhi tshihulwane tshi ngaho zwo ambiwaho kha 1 Vhakorinta 6:9, 10, ri tea u vhudza vhahulwane. Muthu o itaho tshivhi tshihulwane u vha o pfuka mulayo wa Mudzimu nga nḓila yo kalulaho. Musi Mukriste o ita tshivhi tshihulwane, u tea u amba na Yehova nga thabelo a mu humbele pfarelo nahone a ambe na vhahulwane. (Ps. 32:5; Yak. 5:14) Ndi vhuḓifhinduleli vhufhio vhune vhahulwane vha vha naho? Yehova ndi ene e eṱhe ane a vha na maanḓa a u ri hangwela zwivhi zwashu nahone u ri hangwela a tshi shumisa tshirengululi. * Fhedzi Yehova o ṋea vhahulwane vhuḓifhinduleli ha u shumisa Maṅwalo u itela u vhona arali muitazwivhi a tshi tea u bviswa tshivhidzoni kana a sa tei u bviswa tshivhidzoni. (1 Vhakor. 5:12) U itela uri vha kone u vhona arali a tshi tea u bviswa tshivhidzoni kana hai, vha tea u lingedza u wana phindulo dza mbudziso dzi tevhelaho: Naa onoyo muthu o vha o dzula o ḓivhudza uri u ḓo ita tshenetsho tshivhi? Naa o lingedza u dzumbela vhaṅwe tshenetsho tshivhi? Naa o ita tshenetsho tshivhi lwa tshifhinga tshilapfu? Tsha ndeme vhukuma ndi uri, naa u khou sumbedza uri o rembuluwa zwa vhukuma? Naa hu na zwine zwa sumbedza uri Yehova o mu hangwela?—Mish. 3:19.

5. Mushumo une vhahulwane vha u ita u ri vhuyedza hani?

⁵ Musi vhahulwane vha tshi amba na muitazwivhi, tshipikwa tshavho hu vha hu u ita phetho i fanaho na yo itwaho ṱaḓulu. (Mat. 18:18) Zwenezwi zwi vhuyedza hani tshivhidzo? Zwi tsireledza tshivhidzo ngauri muitazwivhi a songo rembuluwaho u vha o bviswa tshivhidzoni uri a si tshinye tshivhidzo. (1 Vhakor. 5:6, 7, 11-13; Tito 3:10, 11) Zwi nga thusa na muitazwivhi uri a rembuluwe na u hangwelwa nga Yehova. (Luka 5:32) Vhahulwane vha ḓo rabelela muitazwivhi o rembuluwaho na u humbela Yehova uri a mu thuse uri a dovhe a vhe na vhushaka havhuḓi nae.—Yak. 5:15.

6. Arali muthu o bviswa tshivhidzoni, naa zwi a konadzea uri Yehova a mu hangwele? Ṱalutshedzani.

⁶ Arali muitazwivhi a songo rembuluwa, u a bviswa tshivhidzoni. Vhahulwane a vha nga mu tsireledzi kha masiandoitwa ane a ḓo ṱangana nao arali o pfuka mulayo wa shango. Yehova o tendela vhavhusi vha shango vha tshi haṱula na u ṱarafa muthu o pfukaho mulayo wavho hu sa londwi uri o rembuluwa kana ho ngo rembuluwa. (Vharoma 13:4) Fhedzi arali onoyo muthu a zwi vhona uri o khakha nahone a rembuluwa, Yehova o ḓiimisela u mu hangwela. (Luka 15:17-24) U ḓo mu hangwela naho o ita tshivhi tshihulwane.—2 Koron. 33:9, 12, 13; 1 Tim. 1:15.

7. Ri nga hangwela hani muthu o ri khakhelaho?

⁷ Ndi zwavhuḓi u ḓivha uri Yehova ndi ene ane a vha na vhuḓifhinduleli ha u hangwela muitazwivhi. Fhedzi hu na zwiṅwe zwine riṋe ra kha ḓi tea u zwi ita. Ndi zwifhio? Nga zwiṅwe zwifhinga, muṅwe muthu a nga ri khakhela nahone a ri humbela pfarelo kana zwa itea a si ri humbele pfarelo. Fhedzi riṋe ri nga khetha u mu hangwela na u sa mu fara nga mbilu. Ngoho ndi ya uri zwi nga dzhia tshifhinga nahone zwi nga ṱoḓa vhuḓidini, zwihuluhulu arali onoyo muthu o ri vhaisa vhukuma. Tshiingamo tsha 15 September 1994 tsho ri: “Musi ni tshi hangwela muitazwivhi, hezwi a zwi ambi uri ni khou vhuyafhedza tshivhi. Kha Mukriste, u hangwela zwi amba  u kumedza mafhungo nga hu fulufhedzeaho zwanḓani zwa Yehova. Ndi ene Muhaṱuli o lugaho wa fhethu hoṱhe, nahone u ḓo ita khaṱulokwayo nga tshifhinga tsho teaho.” Ndi ngani Yehova a tshi ṱoḓa uri ri hangwele vhaṅwe na u litsha ene a tshi lugisa mafhungo?

8. Musi ri tshi hangwela vhaṅwe, zwi sumbedza hani uri ri dzhiela nṱha nḓila ine Yehova a ri khathutshela ngayo?

⁸ Musi ri tshi hangwela vhaṅwe, ri vha ri tshi khou sumbedza uri ri a livhuwa uri Yehova u a ri khathutshela. Kha tshiṅwe tshifanyiso, Yesu o fanyisa Yehova na muṋe we a litsha u lifhisa muṅwe wa vhalanda vhawe tshikolodo tshihuluhulu tshe a vha a sa tsha kona u tshi lifha. Fhedzi onoyo mulanda ho ngo khathutshela muṅwe mulanda ngae we a vha a tshi mu koloda tshelede ṱhukhu-ṱhukhu. (Mat. 18:23-35) Yesu o vha a tshi khou ri gudisa mini? Arali ri tshi dzhiela nṱha nḓila ine Yehova a ri khathutshela ngayo, zwi ḓo ita uri ri hangwele vhaṅwe. (Ps. 103:9) Miṅwahani yo fhiraho, tshiṅwe Tshiingamo tsho ri: “Hu sa londwi uri vhaṅwe ri vha hangwela lungana, zwi nga si vhambedzwe na nḓila ine Mudzimu a ri hangwela ngayo a tshi shumisa tshiṱhavhelo tsha Kristo.”

9. Yehova u khathutshela vhafhio? (Mateo 6:14, 15)

⁹ Yehova u ḓo ri hangwela arali ri tshi hangwela vhaṅwe. Yehova u khathutshela vhane vha khathutshela vhaṅwe. (Mat. 5:7; Yak. 2:13) Yesu o bvisela khagala zwenezwo musi a tshi gudisa vhafunziwa vhawe u rabela. (Vhalani Mateo 6:14, 15.) Na Yehova o vha o gudisa mushumeli wawe Yobo zwenezwo. Onoyo munna a fhulufhedzeaho o vha o vhaiswa nga khonani dzawe tharu, Elifasi, Bilidada na Tsofari nge vha mu vhudza maipfi a ṱhavhaho. Fhedzi Yehova o vhudza Yobo uri a vha rabelele. Musi Yobo o no ita nga u ralo, Yehova o mu fhaṱutshedza.—Yobo 42:8-10.

10. Ndi ngani u fara muthu nga mbilu zwi na khombo? (Vhaefesa 4:31, 32)

¹⁰ Zwi na khombo u fara muthu nga mbilu. U fara muthu nga mbilu zwi nga muhwalo u lemelaho, fhedzi Yehova u ṱoḓa ri tshi bvisa wonoyo muhwalo uri ri kone u vha na mulalo. (Vhalani Vhaefesa 4:31, 32.) U ṱoḓa ri tshi “litsha u sinyuwa” ri “furalele mbiti.” (Ps. 37:8) U ita zwenezwo zwi ḓo ri thusa. Musi ri tshi fara muthu nga mbilu, zwi kwama na mutakalo washu. (Mir. 14:30) U fara muthu nga mbilu zwi fana na u nwa mulimo. U nga si vhaise muṅwe muthu, fhedzi u ḓo vhaisa riṋe vhaṋe. Nga zwenezwo, u hangwela muṅwe muthu zwi vhuyedza riṋe vhaṋe. (Mir. 11:17) Zwi ḓo ita uri ri vhe na mulalo nahone ri kone u bvela phanḓa ri tshi shumela Yehova.

11. Bivhili i ri mini nga ha u ḓilifhedzela? (Vharoma 12:19-21)

¹¹ Yehova ndi ene ane a lifhedza. Yehova ho ngo ri fha maanḓa a u ḓilifhedzela musi muṅwe muthu a tshi ri khakhela. (Vhalani Vharoma 12:19-21.) A ri koni u haṱula nga nḓila yo teaho u fana na Yehova ngauri ri na tshivhi. (Vhahev. 4:13) Nahone nga zwiṅwe zwifhinga, nḓila ine ra ḓipfa ngayo i nga ita uri ri haṱule nga nḓila i songo teaho. Yehova o hevhedza Yakobo uri a ṅwale uri: “U sinyuwa a zwi iti uri muthu a ite zwo lugaho phanḓa ha Mudzimu.” (Yak. 1:20) Ri nga vha na vhungoho ha uri Yehova u ḓo lugisa zwithu na u ita uri hu haṱulwe nga nḓila yo teaho.

12. Ri nga sumbedza hani uri ri fhulufhela nḓila ine Yehova a haṱula ngayo?

¹² Musi ri tshi hangwela vhaṅwe, zwi sumbedza uri ri fhulufhela nḓila ine Yehova a haṱula ngayo. Musi ri tshi litshela mafhungo kha Yehova, ri vha ri tshi khou sumbedza uri ri fhulufhela uri Yehova u ḓo lugisa zwoṱhe  zwo vhangwaho nga tshivhi. Musi ri shangoni ḽawe ḽiswa, zwithu zwi vhaisaho “a zwi tsha ḓo humbulwa, na mbiluni ya muthu a zwi tsha ḓo vha hone.” (Yes. 65:17) Fhedzi naa zwi a konadzea uri ri si fare muṅwe muthu nga mbilu musi o ri vhaisa? Kha ri vhone uri vhaṅwe vho zwi kona hani.

13-14. No guda mini nga ha u hangwela kha zwe zwa itea kha Vho Tony na Vho José?

¹³ Vhunzhi ha vhahashu vho hangwela vhaṅwe naho vho vha vhaisa vhukuma. Vho vhuyelwa hani nga u ita zwenezwo?

¹⁴ Musi Vho Tony * vhane vha dzula Philippines vha sa athu u vha Ṱhanzi, vho wanulusa uri muṅwe wa vhakomana vhavho vho vhulawa nga Vho José. Nga tshenetsho tshifhinga, Vho Tony vho vha vhe muthu wa dzikhakhathi nahone vha tshi khou ṱoḓa u ḓilifhedzela. Vho José vho farwa vha valelwa dzhele nga nṱhani ha zwe vha ita. Musi Vho José vho no bviswa dzhele, Vho Tony vho vha vho ḓiimisela u vha ṱoḓa na u vha vhulaya. Vho mbo ḓi renga na tshigidi. Vho Tony vho mbo ḓi thoma u gudiswa Bivhili nga Ṱhanzi dza Yehova. Vha ri: “Musi ndi tshi guda Bivhili, ndo guda uri ndi tea u shandula nḓila ine nda vha ngayo. Zwenezwo zwo vha zwi tshi katela na u litsha u fara Vho José nga mbilu.” Nga murahu ha tshifhinga, Vho Tony vho lovhedzwa nahone vha vha muhulwane wa tshivhidzo. Vho mangala vhukuma musi vha tshi pfa uri na Vho José ndi Ṱhanzi ya Yehova. Musi vha tshi ṱangana, vho kuvhatedzana. Vho Tony vha vhudza Vho José uri vho vha hangwela. Vho Tony vho amba uri vho takala nga maanḓa nge vha hangwela Vho José nahone vha ri a vha na na maipfi a u ṱalusa nḓila ine vha ḓipfa ngayo. Yehova o fhaṱutshedza Vho Tony nge vha vha vho ḓiimisela u hangwela.

15-16. No guda mini nga ha u hangwela kha zwe zwa itea kha Vho Peter na Vho Sue?

¹⁵ Nga 1985, Vho Peter na Vho Sue vho vha vhe pfunzoni musi hu tshi bomiwa Holo. Yeneyo bomo yo vha yo vhewa nga muṅwe munna ane a si vhe Ṱhanzi. Vho Sue vho huvhala lwe vha vha vha si tsha kona u pfa na u vhona zwavhuḓi. Vho vha vha si tsha kona na  u pfa munukho wa zwithu. * Vho Peter na Vho Sue vho vha vha tshi anzela u ḓivhudzisa uri ndi muthu-ḓe ane a nga ita zwithu zwivhi nga u rali. Nga murahu ha miṅwaha minzhi, onoyo munna we a vha o vhea bomo Holoni, o mbo ḓi fariwa a gwevhelwa u dzula dzhele vhutshilo hawe hoṱhe. Musi Vho Peter na Vho Sue vha tshi vhudziswa arali vho farela onoyo munna, vho ri: “Yehova o ri funza uri u fara muthu nga mbilu zwi na khombo kha mutakalo washu. Musi zwi tshi kha ḓi tou bva u itea, ro humbela Yehova uri a ri thuse uri ri si fare onoyo munna nga mbilu uri ri kone u tshila nga mulalo.”

¹⁶ Naa zwo vha lelutshela uri vha hangwele onoyo munna? Zwo vha zwi songo leluwa. Vha ri: “Nga zwiṅwe zwifhinga musi ri tshi tambudzwa nga masiandoitwa a u huvhala ha Vho Sue, ri a sinyuwa. Fhedzi zwi mbo ḓi fhufha ngauri a ri dzuleli u humbula nga hazwo. Ri nga amba uri arali onoyo muthu we a vhea bomo Holoni a vha Ṱhanzi, ri ḓo mu ṱanganedza nga zwanḓa zwivhili. Zwenezwi zwo ri gudisa uri musi ri tshi shumisa zwine Bivhili ya zwi funza, ri a vha na mbofholowo. Zwavhuḓivhuḓi, zwine Bivhili ya zwi funza zwi a vhofholola. Ri khuthadzwa na nga u ḓivha uri Yehova u ḓo lugisa zwoṱhe.”

17. No guda mini nga ha u hangwela kha zwe zwa itea kha Vho Myra?

¹⁷ Musi Vho Myra vha tshi guda ngoho, vho vha vho no vhingwa nahone vhe na vhana vhavhili. Munna wavho a vho ngo ṱanganedza ngoho. Nga murahu, vhenevho munna vho ita vhupombwe nahone vha ṱutshela muṱa wavho. Vho Myra vha ri: “Musi munna wanga vha tshi ntsia na vhana vhashu vhavhili, ndo ḓipfa nga nḓila ine vhunzhi ha vhathu vhe vha siiwa nga vhafarisi vha ḓipfa ngayo. A tho ngo zwi kholwa, zwo mmbaisa, ndo ḓisola, nda sinyuwa na u ḓivhona mulandu.” Naho mbingano yavho yo fhela, vha kha ḓi pfa vhuṱungu ngauri munna wavho o vha sia. Vho Myra vho dovha vha ri: “Ndo ḓipfa nga yeneyo nḓila lwa miṅwedzi yo vhalaho nahone ndo zwi vhona uri zwi  khou kwama vhushaka hanga na Yehova na vhaṅwe.” Vho Myra vha ri a vho ngo tsha fara munna wavho wa kale nga mbilu nahone a vha ṱoḓi vha tshi welwa nga zwithu zwi si zwavhuḓi. Vha fhulufhela uri ḽiṅwe ḓuvha munna wavho wa kale vha ḓo vha na vhushaka havhuḓi na Yehova. Zwenezwi zwi ita uri Vho Myra vha kone u sedza phanḓa kha tshifhinga tshi ḓaho. Vho alusa vhana vhavho vhavhili vhe vhoṱhe nahone vhenevho vhana vha khou shumela Yehova. Zwa zwino Vho Myra vha khou shumela Yehova na vhana vhavho na miṱa yavho vho takala.

18. Samusi Yehova e Muhaṱuli Muhulwane, ri nga vha na vhungoho ha mini?

¹⁸ Zwi a khuthadza u ḓivha uri Yehova ndi ene ane a vha na vhuḓifhinduleli ha u haṱula. Yehova ndi ene ane a ḓo haṱula ngauri ndi Muhaṱuli Muhulwane. (Vharoma 14:10-12) Samusi e ene a re na maanḓa a u amba uri ndi zwifhio zwo lugaho na zwi songo lugaho, ri nga vha na vhungoho ha uri u ḓo haṱula nga nḓila yo teaho. (Gen. 18:25; 1 Dzikh. 8:32) A nga si vhuye a ita zwi songo lugaho.

19. Nḓila ine Yehova a hangwela ngayo i ḓo ita uri ri vhuyelwe hani?

¹⁹ Ro lindela nga maṱo matswuku tshifhinga tshine Yehova a ḓo lugisa zwithu zwoṱhe zwo vhangwaho nga tshivhi. Nga tshenetsho tshifhinga, vhuṱungu hoṱhe vhune ra vhu pfa vhu ḓo vha vhu si tsheeho. (Ps 72:12-14; Nzumb. 21:3, 4) A ri tsha ḓo dovha ra zwi humbula. Zwa zwino musi ro lindela tshenetsho tshifhinga tshi takadzaho tshi tshi swika, ri livhuwa Yehova ngauri o ri ṋea vhukoni ha u mu edzisa nga u hangwela vhaṅwe.