Naa Vharoma vho vha vha tshi tenda muthu o vhulayelwaho kha danda sa Yesu a tshi vhulungwa vhiḓani?

VHATHU vhanzhi vha a zwi ḓivha uri Yesu o ombelwa vhukati ha mavemu mavhili na uri o vhulayelwa kha danda. (Mat. 27:35-38) Fhedzi vhaṅwe vha amba uri zwine Bivhili ya zwi amba zwa uri tshitumbu tsha Yesu tsho lugiselelwa uri tshi vhulungwe na uri tsho vhulungwa vhiḓani, a si zwone.—Marko 15:42-46.

Vhaṅwe vhane vha sasaladza bugu dza Evangeli vha a timatima uri muthu we haṱulwa uri ndi ḽivemu a nga vhulungwa nga nḓila yavhuḓi. Vha tenda uri onoyo muthu o vha a sa vhulungwi. Ariel Sabar ane a vha muṅwali wa mafhungo, o ṱalutshedza uri ndi ngani vhaṅwe vhathu vha tshi tenda zwenezwo kha magazini une wa pfi Smithsonian. O ri: “Vhathu vhe vha vha vha tshi ombelwa kha danda ndi vhathu vhe vha vha vho ita zwithu zwivhi nahone vhaṅwe vhaḓivhi vha amba uri a zwi konadzei uri Vharoma vha vhulunge vhathu vho raloho nga nḓila yavhuḓi i re na tshirunzi.” Vharoma vho vha vha tshi ṱoḓa u shonisa mavemu. Ndi ngazwo kanzhi zwitumbu zwao zwo vha zwi tshi siiwa kha danda uri zwi ḽiwe nga zwipuka zwa ḓaka. Zwo salaho zwo vha zwi tshi poswa dindini hu re na zwiṅwe zwitumbu.

Fhedzi vhagudi vha zwo fukulwaho mavuni vho wana marambo a vhaṅwe Vhayuda vhe vha vhulawa. Nga 1968, ho waniwa marambo a muṅwe munna we a vhulawa tshifhingani tsha musi Yesu e kha ḽifhasi. O waniwa vhiḓani ḽa muṱa wa Muyuda ḽi re tsini na Yerusalema. Eneo marambo o vha e kha kubogisi. Kha maṅwe a eneo marambo ho vha hu na rambo ḽa tshirethe. Ḽo vha ḽo ombelwa kha bulannga nga tshibigiri tshi re na vhulapfu ha senthimithara dza 11.5. Sabar u ri: “Rambo ḽa tshirethe tsha Yehochanan ḽo ṋea vhuṱanzi vhu sumbedzaho uri mafhungo o ambiwaho kha Evangeli nga ha uri Yesu o vhulungwa vhiḓani, a nga vha e ngoho.” O dovha a ri: “Ḽeneḽo rambo ḽa Yehochanan ḽo ṋea vhuṱanzi ha uri Vharoma vho tenda vhaṅwe Vhayuda vho ombelwaho kha danda vha tshifhingani tsha Yesu vha tshi vhulungwa vhiḓani.”

Vhathu vha amba zwo fhambanaho nga ha nḓila ye Yesu a ombelwa ngayo kha danda nga nṱhani ha zwine rambo ḽa tshirethe tsha Yehochanan ḽa zwi sumbedza. Fhedzi vhuṱanzi vhu sumbedza uri vhaṅwe vho haṱulwaho sa mavemu vho tou vhulungwa nṱhani ha u tou poswa dindini ḽi re na zwiṅwe zwitumbu. Zwi tou vha khagala uri musi Bivhili i tshi amba uri tshitumbu tsha Yesu tsho vhulungwa vhiḓani, i khou amba ngoho. Vhuṱanzi ho waniwaho vhu tikedza zwe Bivhili ya zwi amba zwa uri musi tshitumbu tsha Yesu tshi tshi ya u vhulungiwa, tsho lugiselelwa na uri tsho vhulungwa vhiḓani.

Zwa ndeme ndi uri Yehova o vha o amba uri Yesu u ḓo vhulungwa vhiḓani ḽa muthu o pfumaho nahone a hu na muthu ane a nga ita uri zwe Mudzimu a zwi amba zwi si itee.—Yes. 53:9; 55:11.