1-2. Vhashumeli vha Yehova vha na fhulufhelo ḽifhio?

U FHULUFHELA tshiṅwe tshithu ndi zwa ndeme. Vhaṅwe vhathu vha fhulufhela u vha na mbingano i bvelelaho, u alusa vhana vha re na mutakalo wavhuḓi kana u fhola musi vha tshi khou lwala. Na riṋe Vhakriste ri nga fhulufhela u vha na zwenezwo zwithu. Fhedzi ri fhulufhela zwi fhiraho zwenezwo. Ri fhulufhela u tshila tshoṱhe na uri vhafu vha ḓo dovha vha tshila.

² Muapostola Paulo o ri: “Nṋe na havha vhathu ri na fhulufhelo ḽa uri Mudzimu u ḓo vusa vho lugaho na vha songo lugaho.” (Mish. 24:15) Paulo o vha e si wa u thoma u amba nga ha u vuswa ha vhafu. Na Yobo we a vha e musimulalushaka o amba nga hazwo. O vha a tshi fhulufhela uri Mudzimu u ḓo mu humbula a dovha a tshila.—Yobo 14:7-10, 12-15.

3. Mafhungo a re kha 1 Vhakorinta ndima ya 15 a ri thusa hani?

³ “U vuswa ha vhafu” ndi tshipiḓa tsha pfunzo dza mutheo dzine Vhakriste vha dzi tenda. (Vhahev. 6:1, 2) Mafhungo a Paulo nga ha u vuswa ha vhafu o ṅwalwa kha 1 Vhakorinta ndima ya 15. Zwe a ṅwala zwi fanela u vha zwo khuthadza Vhakriste vha tshifhingani tshawe. Hu sa londwi uri ni na tshifhinga tshingafhani ni tshi tenda uri vhafu vha ḓo vuswa, yeneyo ndima ya Vhakorinta i ḓo ni khuthadza na u khwaṱhisa fhulufhelo ḽaṋu ḽa uri vhafu vha ḓo vuswa.

4. Ndi ngani ri tshi nga vha na vhungoho ha uri vho faho vha ḓo vuswa?

⁴ U vuswa ha Yesu Kristo vhafuni zwi ita uri ri vhe na vhungoho ha uri vhafu vha ḓo vuswa. U vuswa ha Yesu ho vha hu tshipiḓa tsha “mafhungo maḓifha” e Paulo a a ḓivhadza Vhakorinta. (1 Vhakor. 15:1, 2) Paulo o ita na u amba uri arali Mukriste a sa tendi uri Kristo o vuswa, lutendo lwawe ndi lwa fhedzi.  (1 Vhakor. 15:17) U tenda uri Yesu o vuswa ndi zwone zwine zwa ita uri ri tende uri na vhaṅwe vha ḓo vuswa.

5-6. Maipfi a re kha 1 Vhakorinta 15:3, 4 a ri kwama hani?

⁵ Musi Paulo a tshi thoma u ṅwala nga ha u vuswa ha vhafu o bvisela khagala zwithu zwiraru: (1) “Kristo o fela zwivhi zwashu.” (2) “O vhulungwa.” (3) “A vuswa nga ḓuvha ḽa vhuraru u ya nga Maṅwalo.”—Vhalani 1 Vhakorinta 15:3, 4.

⁶ U fa ha Yesu, u vhulungwa hawe na u vuswa hawe zwi ri kwama hani? Muporofita Yesaya o ri Messia o vha a tshi ḓo “tumulwa shangoni” nahone a “ṋewa fhethu hune a ḓo vhulungelwa hone na vhavhi.” Fhedzi ho vha hu tshi ḓo itea na zwiṅwe. Yesaya o dovha a ri Messia o vha a tshi ḓo hwala “zwivhi zwa vhathu vhanzhi.” Yesu o zwi ita musi a tshi ṋekedza vhutshilo hawe sa tshirengululi. (Yes. 53:8, 9, 12; Mat. 20:28; Vharoma 5:8) Ngauralo, u fa ha Yesu, u vhulungwa hawe na u vuswa hawe zwi ri ṋea zwiitisi zwavhuḓi zwa u fhulufhela uri ri nga vhofhololwa kha tshivhi na lufu ra dovha ra tshila na vhahashu vho vuswaho vhafuni.

7-8. Vhakriste vha thuswa nga mini uri vha tende uri Yesu o vuswa vhafuni?

⁷ Uri ri tende uri vho faho vha ḓo vuswa, ri fanela u thoma ra tenda uri Yesu o vuswa. Ndi ngani ri tshi nga vha vhungoho ha uri Yehova o vusa Yesu?

⁸ Ho vha na vhanzhi vho zwi vhonaho vhe vha vhudza vhaṅwe uri Yesu o vuswa. (1 Vhakor. 15:5-7) Ṱhanzi ye Paulo a thoma u i amba ndi muapostola Petro (Kefa). Tshigwada tsha vhafunziwa na tshone tsho amba uri Petro o vhona Yesu o vuswaho vhafuni. (Luka 24:33, 34) Zwiṅwe hafhu, Paulo o ri Yesu o vhonwa nga “vhaapostola vha 12” musi o no vuswa vhafuni. Nga murahu, Kristo o “ḓivhonadza kha vhahashu vha fhiraho 500,” khamusi kha muṱangano u takadzaho wo bulwaho kha Mateo 28:16-20. Yesu o dovha “a ḓivhonadza kha Yakobo” we khamusi a vha e murathu wawe, we u thomani a vha a sa tendi uri Yesu ndi Messia. (Yoh. 7:5) Musi Yakobo o no vhona Yesu o vuswaho vhafuni, o tenda uri Yesu ndi Messia. Zwi takadzaho ndi uri nga vho 55 C.E. musi Paulo a tshi ṅwala honovhu vhurifhi, vhanzhi vho vhonaho Yesu musi o no vuswa vhafuni vho vha vha tshi kha ḓi tshila. Ngauralo, muthu we a vha a tshi timatima uri Yesu o vuswa o vha a tshi nga amba na ṱhanzi dzo zwi vhonaho nga maṱo.

9. U ya nga Mishumo 9:3-5, Paulo o vha a tshi nga engedza hani vhuṱanzi ha uri Yesu o vuswa vhafuni?

⁹ Nga murahu, Yesu o bvelela kha Paulo. (1 Vhakor. 15:8) Paulo (Saulo) o vha e nḓilani ya u ya Damaseko musi a tshi pfa ipfi ḽa Yesu o vuswaho vhafuni na u mu vhona e kha vhugala hawe ṱaḓulu nga bono. (Vhalani Mishumo 9:3-5.) Zwe zwa bvelela kha Paulo zwo vha vhuṅwe vhuṱanzi ha uri Yesu o vuswa vhafuni.—Mish. 26:12-15.

10. U fushea ha Paulo nga vhuṱanzi ha uri Yesu o vuswa vhafuni zwo mu ṱuṱuwedza uri a ite mini?

¹⁰ Vhaṅwe vhathu vho vha vha tshi nga vha na dzangalelo kha zwe Paulo a amba ngauri o vha a tshi tovhola Vhakriste musi a sa athu u vhona Yesu. Musi Paulo o no fushea nga vhuṱanzi ha uri Yesu o vuswa vhafuni, o shuma nga maanḓa uri a vhudze vhaṅwe yeneyi ngoho. O konḓelela u rwiwa, u valelwa dzhele na u kwashetshelwa nga tshikepe musi a tshi khou ḓivhadza ngoho ya uri Yesu o fa a dovha a vuswa. (1 Vhakor. 15:9-11; 2 Vhakor. 11:23-27) Paulo o vha e na vhuṱanzi ha uri Yesu o vuswa lwe a vha o ḓiimisela u fa a tshi khou imelela zwe a vha a tshi khou zwi tenda. Naa uvhu vhuṱanzi ha Vhakriste vha u thoma vhe vha ḓivha uri Yesu o vuswa a vhu ri thusi uri na riṋe ri zwi  tende? Naa a vhu khwaṱhisi fhulufhelo ḽaṋu ḽa uri vho faho vha ḓo vuswa?

11. Ndi ngani vhaṅwe vhathu vha ngei Korinta vho vha vhe na mavhonele o khakheaho nga ha u vuswa ha vhafu?

¹¹ Vhaṅwe vhathu vha ḓoroboni ya Gerika ine ya pfi Korinta vho vha vhe na mavhonele o khakheaho nga ha u vuswa ha vhafu. Vhaṅwe vho ita na u amba uri “vhafu a vha nga vuswi.” Vho vha vha tshi itiswa ngani? (1 Vhakor. 15:12) Vhaḓivhi vha pfunzo dza maṱali vha iṅwe ḓorobo ine ya pfi Athene vho ita na u sea muhumbulo wa uri Yesu o vuswa vhafuni. Ngauralo, khamusi vhaṅwe henefho Korinta vha nga vha vho vha na mahumbulele o raloho. (Mish. 17:18, 31, 32) Khamusi vhaṅwe vho dzhia uri u vuswa ha vhathu a si ha vhukuma. Vha nga vha vho humbula uri musi hu tshi pfi vhathu vho “fa” hu vha hu tshi khou ambiwa nga ha vhaitazwivhi nahone musi vhathu vha tshi vha Vhakriste hu pfi vha vho “tshila” ngauri vho hangwelwa zwivhi. Hu sa londwi uri vhenevho vhathu vho itiswa nga mini uri vha si tende uri vhafu vha ḓo vuswa, lutendo lwavho lwo vha lu lwa fhedzi. Arali Mudzimu a songo vusa Yesu zwi amba uri tshirengululi a tsho ngo vha hone nahone vho vha vha songo hangwelwa zwivhi. Nga zwenezwo, vhe vha hanedza uri Yesu o vuswa, lutendo lwavho lwo vha lu lwa fhedzi.—1 Vhakor. 15:13-19; Vhahev. 9:12, 14.

12. U ya nga 1 Petro 3:18, 22, u vuswa ha Yesu ho vha ho fhambana hani na ha vhe vha vuswa musi a sa athu u vuswa?

¹² Paulo o zwi ḓivha nga tshavhukoma uri “Kristo o vuswa vhafuni.” U vuswa ha Yesu ho vha khwine kha ha vhaṅwe vhe vha vuswa u thoma ngauri vhenevho vhathu vho dovha vha fa nga murahu. Paulo o ri Kristo “ndi ene wa u thoma u vuswa.” Yesu o vha ene wa u thoma u vuswa nga nḓila-ḓe? O vha ene muthu wa u thoma u vuswa a tshila e tshivhumbiwa tsha muya nahone a vha ene muthu wa u thoma u vuselwa ṱaḓulu.—1 Vhakor. 15:20; Mish. 26:23; vhalani 1 Petro 3:18, 22.

13. Paulo o ri Adamu na Yesu vho fhambana hani?

¹³ Lufu lwa muthu muthihi lwo vha lu tshi nga ita hani uri vhathu vha dzimiḽioni vha tshile? Paulo o fhindula yeneyo mbudziso nga nḓila i pfalaho. O ṱalutshedza phambano vhukati ha zwe zwa bvelela kha vhathu nga nṱhani ha zwe Adamu a ita na zwe zwa itea kha riṋe nga nṱhani ha zwe Kristo a ita. Paulo o amba nga ha Adamu a ri: “Lufu lwo vha hone nga muthu.” Musi Adamu a tshi tshinya o ita uri vhathu vhoṱhe vha fe u katela na ene muṋe. Na ṋamusi ri khou tambudzwa nga masiandoitwa a u sa thetshelesa hawe. Fhedzi ri na vhumatshelo havhuḓi nge Mudzimu a vusa Murwa wawe vhafuni. Ndi ngazwo Paulo o ri “u vuswa ha vhafu ho vha hone nga muthu,” onoyo muthu ndi Yesu. O dovha a ri: “Samusi roṱhe ri tshi fa nga nṱhani ha Adamu, roṱhe ri ḓo vuswa nga nṱhani ha Kristo.”—1 Vhakor. 15:21, 22.

14. Naa Adamu u ḓo vuswa vhafuni? Ṱalutshedzani.

¹⁴ Paulo o vha a tshi khou amba mini musi a tshi ri ‘roṱhe ri fa nga nṱhani ha Adamu’? Paulo o vha a tshi khou amba vhathu vhoṱhe vho mamelaho tshivhi kha Adamu nahone tshenetsho tshivhi tsha ita uri vha fe. (Vharoma 5:12) Adamu a si muṅwe wa vhane vha “ḓo vuswa.” Tshiṱhavhelo tsha Kristo a tshi shumi kha Adamu ngauri o vha a si na tshivhi, a tou khetha u sa thetshelesa Mudzimu nga khole. Zwo iteaho kha Adamu zwi fana na zwine zwa ḓo itea kha vhane “Murwa muthu” a ḓo vha haṱula sa “mbudzi” nahone vha “fheliswa tshoṱhe.”—Mat. 25:31-33, 46; Vhahev. 5:9.

15. Paulo o vha a tshi khou amba vhafhio musi a tshi ri “roṱhe ri ḓo vuswa”?

 ¹⁵ Ṱhogomelani uri Paulo o ri: “Roṱhe ri ḓo vuswa nga nṱhani ha Kristo.” (1 Vhakor. 15:22) Paulo o vha a tshi khou ṅwalela Vhakriste vho ḓodzwaho vha re Korinta vhe vha vha vha tshi ḓo vuselwa ṱaḓulu. Vhenevho Vhakriste vho vha vho nangiwa uri vha ‘vhe na vhuthihi na Kristo Yesu, Mudzimu o vha vhidza vhakhethwa.’ Paulo o dovha a bula na “vhe vha fa vhe na vhuthihi na Kristo.” (1 Vhakor. 1:2; 15:18; 2 Vhakor. 5:17) Kha iṅwe bugu ya Bivhili Paulo o ṅwala uri ‘vho faho u fana na Yesu, vha ḓo vuswa u fana nae, nga yeneyo nḓila vha vha vhathihi nae.’ (Vharoma 6:3-5) Yesu o vuswa e tshivhumbiwa tsha muya a ya ṱaḓulu. Zwi ḓo tou ralo nga Vhakriste vhoṱhe vho ḓodzwaho vha re na “vhuthihi na Kristo.”

16. Paulo o vha a tshi khou amba mini musi a tshi ri Yesu “ndi ene wa u thoma”?

¹⁶ Paulo o ṅwala uri Kristo “ndi ene wa u thoma u vuswa.” Humbulani uri hu na vhaṅwe vhe vha vuswa vha tshila kha ḽifhasi vha nga ho Lazaro, fhedzi Yesu o vha wa u thoma u vuswa vhafuni e tshivhumbiwa tsha muya a wana vhutshilo vhu sa fheli. Zwiṅwe hafhu, musi Paulo a tshi ri Yesu “ndi ene wa u thoma,” o vha a tshi khou amba uri hu ḓo vha na vhaṅwe vhathu vhane vha ḓo vuselwa u tshila ṱaḓulu nga murahu ha Yesu. Vhaapostola na vhaṅwe vha re na “vhuthihi na Kristo” vho vha tshi ḓo vuswa vha ya ṱaḓulu u fana na Yesu.

17. Vha re na “vhuthihi na Kristo” vha vuselwa lini ṱaḓulu?

¹⁷ U vuselwa ṱaḓulu ha vha re na “vhuthihi na Kristo” ho vha hu sa athu u thoma musi Paulo a tshi ṅwalela Vhakorinta vhurifhi. Paulo o sumbedza uri vho vha vha tshi ḓo vuselwa ṱaḓulu tshifhingani tshi ḓaho. O ri: “Muṅwe na muṅwe u ḓo vuswa nga heyi nḓila: Kristo ndi ene wa u thoma, ha tevhela vha re vha Kristo vhane vha ḓo vuswa tshifhingani tsha u vha hone hawe.” (1 Vhakor. 15:23; 1 Vhathes. 4:15, 16) Ṋamusi ri khou tshila kha tshifhinga tsho ambiwaho “tsha u vha hone” ha Kristo. Vhaapostola na vhaṅwe Vhakriste vho ḓodzwaho vhe vha vha vho no fa, vho vha vho tea u lindela u swika Kristo a tshi vha hone uri vha wane malamba avho a ṱaḓulu na uri vha ‘vuswe u fana nae’ samusi vha tshi ḓo vha “vhathihi nae.”

18. (a) Ndi ngani ri tshi nga ri hu ḓo vha na vhaṅwe vhane vha ḓo vuswa? (b) Luṅwalo lwa 1 Vhakorinta 15:24-26 lu sumbedza uri hu ḓo itea mini ṱaḓulu?

¹⁸ Hu ḓo itea mini kha Vhakriste vhoṱhe vha fhulufhedzeaho vhane vha si vhe na fhulufhelo ḽa u tshila ṱaḓulu na Kristo? Na vhone vha na  fhulufhelo ḽa u vuswa vhafuni. Bivhili i ri Paulo na vhaṅwe vhane vha ya ṱaḓulu ndi “vhane vha ḓo thoma u vuswa.” (Vhafil. 3:11) Zwenezwo zwi sumbedza uri hu ḓo vha na vhaṅwe vhane vha ḓo vuswa nga murahu. Zwi tshimbidzana zwe Yobo a tenda uri zwo vha zwi tshi ḓo itea khae tshifhingani tshi ḓaho. (Yobo 14:15) “Vha re vha Kristo vhane vha ḓo vuswa tshifhingani tsha u vha hone hawe” vha ḓo vha vhe ṱaḓulu na Yesu musi a tshi fhelisa mivhuso yoṱhe na vhavhusi. Na lufu “swina ḽa u fhedza” ḽi ḓo fheliswa. Vhoṱhe vho vuselwaho ṱaḓulu a vha tsha ḓo fa. Fhedzi hu ḓo itea mini kha vhaṅwe?—Vhalani 1 Vhakorinta 15:24-26.

19. Vha re na fhulufhelo ḽa u tshila kha ḽifhasi vha nga lavhelela mini?

¹⁹ Vha re na fhulufhelo ḽa u tshila kha ḽifhasi vha nga lavhelela mini? Maipfi a Paulo a nga vha ṋea fhulufhelo. A ri: “Nṋe [ndi] na fhulufhelo ḽa uri Mudzimu u ḓo vusa vho lugaho na vha songo lugaho.” (Mish. 24:15) Zwi tou pfala uri a hu na muthu a songo lugaho ane a nga dzhena ṱaḓulu. Nga zwenezwo, eneo maipfi a sumbedza uri hu ḓo vha na vhane vha ḓo vuselwa kha ḽifhasi.

20. Iyi thero yo khwaṱhisa hani fhulufhelo ḽaṋu ḽa uri vhafu vha ḓo vuswa?

²⁰ A ri vhuyi ra timatima uri “Mudzimu u ḓo vusa [vhafu].” Vhane vha ḓo vuswa uri vha tshile kha ḽifhasi vha ḓo vha na fhulufhelo ḽa u tshila tshoṱhe. Ni nga fhulufhela uri zwenezwo zwi ḓo itea. Ḽeneḽo fhulufhelo ḽi nga ni khuthadza musi ni tshi humbula nga mashaka aṋu na dzikhonani vhe vha fa. Vha nga vuswa vhafuni nga tshifhinga tsha musi Kristo na vhaṅwe vha tshi ḓo vha vha tshi khou “vhusa nae miṅwaha ya 1 000.” (Nzumb. 20:6). Na inwi ni nga fhulufhela uri ni nga vuswa vhafuni arali na nga fa musi Kristo a sa athu u thoma u vhusa lwa miṅwaha ya 1 000. Ḽeneḽi “fhulufhelo a ḽi ri shonisi.” (Vharoma 5:5) Ḽi nga ni khwaṱhisa zwino ḽa ita uri ni shumele Mudzimu no takala. Fhedzi hu na zwiṅwe zwine ra nga zwi guda kha 1 Vhakorinta ndima ya 15 samusi ri tshi ḓo zwi vhona kha ndima i tevhelaho.