Hai. Bivhili kana bugu dza ḓivhazwakale a dzi ambi uri Vhakriste vho lovhedzwa vha tshi itela vho faho.

Nḓila ine lwonolo luṅwalo lwa vha ngayo kha dziṅwe Bivhili i ita uri vhaṅwe vhathu vha vhone u nga tshifhingani tsha Paulo Vhakriste vho vha vha tshi lovhedzwa vha tshi itela vhathu vho faho. Sa tsumbo, Bivhili ya Luvenda i ri: “Arali nangoho vhafu vha sa vuwi? Vha itela’ni-vho vha tshi lovhedzelwa vhone?”

Fhedzi kha ri pfe uri vhaṅwe vhagudi vha Bivhili vhavhili vho ri mini. Muṅwe mugudi wa Bivhili ane a pfi Dr. Gregory Lockwood o amba uri a hu na tshithu Bivhilini kana kha ḓivhazwakale tshine tsha sumbedza uri hu na muthu we a vhuya a lovhedzwa a tshi itela vho faho. Muṅwe Muphurofesa ane a pfi Gordon D. Fee o tendelana na zwenezwo. O ṅwala uri a hu na tsumbo ya zwenezwo zwithu Bivhilini kana kha ḓivhazwakale. O ri Thestamennde Ntswa a i ambi nga zwenezwo zwithu nahone a hu na vhuṱanzi vhune ha sumbedza uri Vhakriste vha tshifhingani tsha kale vho zwi ita, kana uri hu na kereke ye ya zwi ita musi vhaapostola vho no fa.

Bivhili i amba uri vhatevheli vha Yesu vho vha vha tshi tea u ‘ita vhathu vha tshaka dzoṱhe vhafunziwa, vha vha lovhedze, vha vha funze u ita zwoṱhe’ zwe Yesu a vha laya. (Mat. 28:19, 20) Musi muthu a sa athu u lovhedziwa sa mufunziwa wa Yesu, o vha a tshi tea u thoma a guda nga ha Yehova na Yesu, a tenda khavho na u vha thetshelesa. Muthu o faho a re mavhiḓani o vha a sa ḓo kona u ita zwenezwo nahone Mukriste ane a khou tshila o vha a sa ḓo kona u mu itela zwone.—Muh. 9:5, 10; Yoh. 4:1; 1 Vhakor. 1:14-16.

Zwino Paulo o vha a tshi khou ambela kha mini?

Vhaṅwe Vhakorinta vho vha vha tshi ri vhafu a vha nga vuswi. (1 Vhakor. 15:12) Paulo o vha sumbedza uri zwenezwi zwo vha zwi si ngoho. O vha sumbedza hani? O amba uri “ḓuvha ḽiṅwe na ḽiṅwe [u] vha [o] livhana na lufu.” Fhedzi o vha a tshi kha ḓi tshila. Naho o vha o livhana na lufu, o vha e na fhulufhelo ḽa uri u ḓo vuswa a ya a tshila ṱaḓulu u fana na Yesu.—1 Vhakor. 15:30-32, 42-44.

Vhakorinta vho vha vha tshi tea u pfesesa uri vha ḓo sedzana na thaidzo ḓuvha na ḓuvha na uri vho vha vha tshi ḓo tea u fa musi vha sa athu u vuselwa ṱaḓulu. U ‘lovhedzwa ri vhathihi na Kristo Yesu’ zwi amba u “lovhedzelwa lufuni lwawe.” (Vharoma 6:3) Zwenezwi zwo vha zwi tshi amba uri vha ḓo sedzana na thaidzo nahone vha fa vha vuselwa ṱaḓulu u fana na Yesu.

Musi ho no fhela miṅwaha mivhili Yesu o lovhedzwa, o vhudza vhaapostola vhawe vhavhili a ri: “Ndovhedzo ine nda ḓo lovhedzwa ngayo, ni ḓo lovhedzwa ngayo.” (Marko 10:38, 39) Yesu o vha a sa khou amba nga ha u lovhedzwa nga maḓi. Nṱhani hazwo, o vha a tshi khou amba nga ha u “lovhedzelwa lufuni lwawe.” Yesu o vha a tshi khou amba uri u fhulufhedzea hawe kha Mudzimu zwi ḓo ita uri a vhulawe. Paulo o amba uri Vhakriste vho ḓodzwaho vho vha vha tshi ḓo “tambula nae, [vha] ṋewa vhugala nae.” (Vharoma 8:16, 17; 2 Vhakor. 4:17) Na vhone vho vha vha tshi ḓo tea u thoma vha fa uri vha kone u vuselwa ṱaḓulu.

Nga zwenezwo, zwe Paulo a zwi amba ndi hezwi: “Arali vhafu vha sa ḓo vuswa, hu ḓo itea mini kha vhane vha lovhedzwa uri vha fe? Ndi ngani vha tshi lovhedzwa uri vha fe?”