8 КИЧЭЭЛ
Бурган хилинчек-човалаңны чүге чөпшээреп турарыл?
1. Каржы-бак чүүл канчап тыптып келгенил?
Бурган кижи чагыргаларын үр үе дургузунда чөпшээрээниниң ачызында, олар бергелерин боттары шиитпирлеп шыдавас деп көскү апарган
Эрлик бир дугаар мегени чугаалаан соонда, чер кырынга каржы-бак чүүл тыптып келген. Эрлик эң эгезинде дээрниң тергиин төлээзи турган-даа болза, «алыс шынны» үнелевейн барган (Иоанн 8:44). Кижилер чүгле аңаа чүдүүрүн Эрлик күзей берген, а ол эрге чүгле Чаяакчыга хамааржыр. Эрлик бир дугаар херээжен кижи Еваны, Бурганны эвес, а ооң бодун дыңнаар кылдыр мегелепкен. Адам Еваның талазын шилип алган. Адамның шиитпири хилинчек-човалаңга болгаш өлүмге чедирген. (Номчуптуңар: Эге дөс 3:1—6, 19.)
Еваны Бурганның айтыышкынын хажыдыптар кылдыр бүзүреткеш, Эрлик Бурганның эргезинге удур тура халаан. Кижилерниң хөй кезии Чагырыкчызы болур Бургандан ойталааш, Эрликке каттышкан. Ынчалдыр Эрлик «бо делегейниң чагырыкчызы» апарган. (Номчуптуңар: Иоанн 14:30; 1 Иоанн 5:19.)
2. Бурганның чаяалгазынга четпес чүүл турган бе?
Бурганның бүгү ажыл-херээ тергиин. Ынчангаш эгезинден-не кижилер биле дээрниң төлээлери Бурганга тергиини-биле дыңнангыр болуп шыдаар турган (Ыдыктыг хоойлуну катаптааны 32:4, 5). Ындыг-даа болза, Бурган биске кандыг-даа байдалда канчаар алдынарын боттарывыс шиитпирлээр кылдыр хосталганы берген. Ол хосталга Бурганга ынакшылывысты көргүзер арганы берип турар. (Номчуптуңар: Иаков 1:13—15; 1 Иоанн 5:3.)
3. Бурган чүге амга чедир хилинчек-човалаңны шыдажып турарыл?
Кызыгаарлыг үе дургузунда Бодунуң чагыргазынга удур үймээнни Иегова чөпшээрээн. Чүге? Бурган чокка чагырар кандыг-даа оралдажыышкыннар аас-кежикти эккелбес деп чүүлдү кижилерге көргүзер дээш ону кылган (Экклесиаст 7:29; 8:9). Кижилерниң 6000 чыл дургузунда төөгүзү ону бадыткаан. Чаңгыс-даа чагырыкчы дайыннарны, кем-херекти, чөптүг эвес чорукту болгаш аарыгларны соксадып шыдаваан. (Номчуптуңар: Иеремия 10:23; Римчилерге 9:17.)
Кижилерниң чагыргазы улусту дарлаар, а Бурган чагырарга чуртталга аас-кежикти эккээр (Исайя 48:17, 18). Удавас Иегова кандыг-даа кижи башкарылгазын соксадыр. Чер кырынга чүгле Чагырыкчызы кылдыр Бурганны шилип алган улус чурттаар (Исайя 11:9). (Номчуптуңар: Даниил 2:44.)
«Бурган хилинчек- човалаңны чүге чөпшээреп турарыл?» деп видеороликти көрүңер.
4. Бурганның шыдамыының ачызында чүү болдунар апарганыл?
Эрлик чаңгыс-даа кижи Иеговага өртек чокка, ынакшыл-биле бараалгавас дээн. Ооң шын эвезин көргүзерин күзээр силер бе? Ындыг аргаңар бар! Бурганның шыдамыының ачызында, Ооң азы кижилерниң чагыргазын шилип алыр арга кижи бүрүзүнде бар. Канчаар чурттап чоруурувус бистиң шилилгевисти көргүзүп турар. (Номчуптуңар: Иов 1:8—12; Чугаалар 27:11.)
5. Бурганны бодунуң Чагырыкчызы кылдыр канчаар шилип алырыл?
Бурган бистиң Чагырыкчывыс болзун дээн күзеливис хүлээп алган шиитпирлеривистен көстүп турар
Кижи бодунуң Чагырыкчызы кылдыр Бурганны шилип алыр дизе, Ооң Сөзү, Библияга үндезилээн алыс шын шажынны тып алгаш, ооң өөредиглеринге дүүштүр чурттаары чугула (Иоанн 4:23). А Эрликтиң башкарылгазындан ойталаар дизе, политикага, дайыннарга киришпес ужурлуг бис. Иисус боду ынчаар алдынар турган болгай. (Номчуптуңар: Иоанн 17:14.)
Самыын чорукту болгаш өске-даа бачыттарны аянныг, сонуурганчыг болдурар дээш, Эрлик бодунуң эргезин ажыглаар. Ынчаар алдынмас апаарывыска, чамдык эш-өөрүвүс, төрелдеривис кыжырып, Библияны өөрениринге безин биске шаптыктап болур (1 Пётр 4:3, 4). Ынчангаш кымның найыралы биске эң үнелиг деп чүвени шилиир ужурлуг бис. Эш-өөрнү Бурганга ынак улустуң аразындан дилээр бис бе? Ооң мерген угаанныг хоойлуларынга чагыртыр бис бе? Шын шиитпир үндүрер болзувусса, кижилер берге байдалдарда безин Бурганга шынчы артып болурун база Эрликти мегечи деп бадыткаар бис. (Номчуптуңар: 1 Коринфичилерге 6:9, 10; 15:33.)
Бурганның кижилерге ынакшылы — каржы-бак, хилинчек-човалаң албан соксаарының быжыг бадыткалы-дыр. Бурганның айыткан амыдырал оруу — эң-не эки деп чигзинмейн турар кижилер дываажаң черге мөңгеде чурттаар. (Номчуптуңар: Иоанн 3:16.)
