1, 2. а) Чамдык улус Бурганның организациязы бар деп чүүлге кандыг хамаарылгалыг? б) Бо статьяга чүнү сайгарар бис?

 БУРГАННЫҢ организациязы бар бе? Чамдык улус ооң херээ чок деп санап турар. Олар Бурган-биле хууда харылзаалыг боорга-ла, чедер деп бодаар. Ынчалза-даа херек кырында ол ындыг бе? Барымдаалар чүнү чугаалап турар?

² Иегова — корум-чурумнуң Бурганы деп чүүлдүң барымдааларын бо статьяга сайгарып көөр бис. Оон ыңай Иегованың организациязындан айтыышкыннарга кандыг хамаарылгалыг болур ужурлуувусту көөр бис (1 Кор. 14:33, 40). Бистиң эраның бирги векте-даа, амгы үеде-даа Бижилгеден сүмелер Иегованың организациязының черде кезээнге буянныг медээни суртаалдаар деп улуг даалганы күүседиринге дузалап чоруур. Бис бүгү талазы-биле Библияның болгаш Бурганның организациязының айтыышкыннарын эдерип турар болганывыста, христиан чыышта тайбың, арыг болгаш демниг чорук тергиидеп турар.

3. Иегова — корум-чурумнуң Бурганы дээрзинге силерни чүү бүзүредип турарыл?

³ Иегова — корум-чурумнуң Бурганы деп, Ооң бүгү чаяалгалары көргүзүп турар. Библияда: «Дээрги-Чаяакчы Бодунуң  мерген угааны-биле черни үндезилеп тургускан, сарыылы-биле дээрни доктаадып тургускан» — деп бижээн (У. ч. 3:19). Биске «Ооң ажыл-херээниң чүгле кезик-чамдыызы» билдингир, «Ооң дугайында чүгле чаржынчыг сымыраныг дыңнаан бис» (Иов 26:14). Планеталар, сылдыстар болгаш галактикаларның дугайында хөйнү билбес-даа болзувусса, олар шупту тускай чурумга чагыртып турар деп билдингир (Ыд. ыр. 8:4, 5). Галактикаларже, ужур-чурум аайы-биле шимчеп турар, сая-сая сылдыстар кирип турар. Хүн системавыста планеталар орбиталарында, орук шимчээшкининиң дүрүмнерин сагаан дег, долганып турар. «Дээрлерни мерген угаан-биле... чаяап каан» Иегова макталывыска болгаш бердинген бараалгалывыска төлептиг деп, Октаргайда тергиидеп турар кайгамчыктыг чурум бисти бүзүредип турар (Ыд. ыр. 135:1, 5—9).

4. Айтырыгларның шуптузунга эртем чүге харыы берип шыдавазыл?

⁴ Эртем Октаргайның болгаш бөмбүрзээвистиң дугайында хөйнү билип алырынга дузалаан база амыдыралывысты экижиткен. Ынчалза-даа айтырыгларның шуптузунга эртем харыы берип шыдавас. Чижээ, астрономнар Октаргайның канчаар тывылганын, черде кижилер чүге чурттап турарын, амытаннарның болгаш үнүштерниң янзы-бүрү хевирлери чүге барын орта тайылбырлап чадап турар. Оон ыңай чүге мөңге чурттаксап турарывысты тайылбырлаптар улус ховар (Эккл. 3:11). Ол айтырыгларның харыызы чүге тывылбазыл? Чүге дизе хөй улус, оларның санында эртемденнер, Бурган чок деп санап, эволюция өөредиин деткип турар. Ынчалзажок Иегова Библияда кижилерни дүвүредип турар айтырыгларга харыыларны берип каан.

5. Бойдустуң хоойлуларындан чүге хамааржып турар бис?

⁵ Бис Иегованың тургусканы бойдустуң өскерлиш чок, бүзүрелдиг хоойлуларындан хамааржыр бис. Электриктер, сантехниктер, инженерлер, ужудукчулар, кезер эмчилер боттарының ажылынга ол хоойлуларга даянып чоруур. Чижээ, кезер эмчилер шупту улустуң мага-бодунуң тургузуу чаңгыс аай деп билир болгаш, аараан кижиниң чүрээ кайдал деп бажы ыжып-даа турбас. Шуптувус бойдустуң хоойлуларын херекке алыр ужурлуг бис. Чижээ, тыртыжылга хоойлузун херекке албайн баар болзувусса, ол чүүл амы-тынывыска айыыл тургузуп болур.

6. Иегованың чону эки чурумчуттунган болур ужурлуг деп түңнээри чүге чөптүг?

⁶ Шынап-ла, Октаргайывыс — кайгамчыктыг ужур-чурумнуң чижээ-дир. Ынчангаш Иегова бистиң Аңаа ужур-чурумнуг бараалгаарывысты күзеп турары чөптүг. Чижээ, Бурган удуртулганы биске Библия таварыштыр берип турар. Бурганның организациязын болгаш Ооң негелделерин билбес турган болзувусса, чуртталгавыс кайы хире аас-кежик чок, чөгенчиг турар ийик!

7. Библия кайгамчык дүүшкек деп, кайыын көстүп турарыл?

⁷ Чамдык улус Библияны иудей болгаш христиан авторларның янзы-бүрү чогаалдарының чыындызы деп санап турар. Херек кырында ол ном кайгамчык дүүшкек. Ону Бурганның хей-аът киирген, шылгараңгай чогаалы деп адап болур. Библияның аңгы-аңгы номнары аразында сырый харылзаалыг. Ооң шупту номнарының кол утказы — Эге дөстен Ажыдыышкынга чедир — Иегованың чагырар эргезин шынзыдары болгаш черге хамаарыштыр Чагырганың дузазы-биле аазаттынган «оглу», Христосту, таварыштыр бодунуң күзел-соруун күүседири-дир. (Эге дөс 3:15; Матфей 6:10; Ажыдыышкын 11:15 номчувут.)

8. Израильчилерни эки чурумчуттунган чон турган деп чүге чугаалап болурул?

⁸ Бурунгу израильчилер дыка чурумчуттунган чон чораан. Чижээ, Моисейниң  хоойлузу күштүг турган үеде херээженнер ужур-чурум-биле «Ужуражылга майгынынче кирер чер чанынга бараан бооп турган» (Хост. 38:8). Израиль турлагның болгаш ыдыктыг өргээ-майгынның көжүп турганы база ужур-чурумнуг турган. Сөөлзүредир Давид хаан левиттерни болгаш Бурганның бараалгакчыларын бөлүктерге чарып, эки чурумчуткан (1 Чыл. 23:1—6; 24:1—3). Иеговага дыңнангыр чораан үезинде чон тайбың болгаш демниг чурттап чораан (Ы. х. к. 11:26, 27; 28:1—14).

9. Бирги векте христиан чыыштар эки чурумчуттунган турган деп, кайыын көстүп турарыл?

⁹ Бирги векте христиан чыыштар эки чурумчуттунган турган. Элчиннерден тургустунган удуртукчу чөвүлелдиң айтыышкыннарын күүседип турганының ачызында бүзүрээннерниң саны улам көвүдеп турган (Аж.-ч. 6:1—6). Соонда ол чөвүлелге өске акылар база немешкен (Аж.-ч. 15:6). Оон аңгыда чыыштар удуртулганы Бурганның хей-аът киирген чагааларындан ап турган. Ындыг чагааларны удуртукчу чөвүлелдиң кежигүннери азы оларның-биле сырый бараалгап турган улус бижип турган (1 Тим. 3:1—13; Тит. 1:5—9). Удуртукчу чөвүлелдиң айтыышкыннарын эдерип турганы чыыштарга кандыг салдарлыг болганыл?

10. Удуртукчу чөвүлелдиң айтыышкыннарын эдерип турганы баштайгы христианнарга кандыг салдарлыг болганыл? (Статьяның эгезинде чурукту көрүңер.)

¹⁰ Ажыл-чорудулга 16:4, 5 номчувут. Удуртукчу чөвүлелдиң айтыышкыны-биле чыыштарны кезип турган акылар «элчиннер болгаш удуртукчуларның Иерусалимге доктаадып тургусканы... шиитпирни... дамчыдып» турганнар. Ол шиитпирлерни эдерип турганындан «христиан ниитилелдерниң бүзүрели быжыгып, улузу хүн санай немежип турган». А бөгүнгү Бурганның организациязынга хамаарыштыр бо медээден чүнү өөренип ап болур бис?

11. Томуйлаттынган акылар Бурганның организациязының айтыышкыннарынга кандыг хамаарылгалыг болур ужурлуг?

¹¹ Чурттар азы салбырлар комитеттериниң кежигүннери, кожуун хайгааракчылары болгаш удуртукчулар Бурганның организациязының айтыышкыннарынга кандыг хамаарылгалыг болур ужурлуг? Бурган бодунуң Сөзүнде бисти дыңнангыр болуңар деп чагып турар (Ы. х. к. 30:16; Евр. 13:7, 17). Бурганның организациязынга шүгүмчүлээр, чагыртпас хөөн турбас ужурлуг, оон башка ол чүүл чыыштарывысты онзалап турар ынакшылды, тайбыңны болгаш демниг чорукту үреп болур. Хүндүткел чок алдынып, чагыртпас хөөннүг Диотрефти өттүнмээлиңер. (3 Иоанн 9, 10 номчувут.) Боттарыңардан айтырыңар: Бурган-биле харылзаазы быжыг болзун дээш, долгандыр улуска дузалап турар мен бе? Харыысалга ап турар акыларның айтыышкынын дораан күүседип, оларны деткип чоруур мен бе?

12. Удуртукчуларны болгаш дузалакчыларны томуйлаарының чуруму канчаар өскерилгенил?

¹² Удуртукчу чөвүлелдиң чоокта үндүрген шиитпирин көрээлиңер. 2014 чылдың ноябрь 15-тиң «Таңныыл суургазында» «Номчукчуларның айтырыглары» деп рубрикага удуртукчуларны болгаш дузалакчыларны томуйлаарынга хамаарышкан өскерлиишкиннерниң дугайында бижээн. Статьяда бирги векте оларны, удуртукчу чөвүлелди төлээлеп турар, эргий кезиир хайгааракчылар томуйлап турган деп демдеглээн. Ооң аайы-биле, 2014 чылдың сентябрь 1-ден эгелээш, удуртукчуларны болгаш дузалакчыларны кожуун хайгааракчылары томуйлаар апарган. Томуйлаар кылдыр сүмелээн акылар-биле кожуун хайгааракчызы хууда таныжып алырын кызып, аргалыг болза, оларның-биле кады суртаалче үнүп болур. Бир эвес акый өглүг болза, ол ооң өг-бүлезин база көөр (1 Тим. 3:4, 5). Оон  удуртукчулар чөвүлели кожуун хайгааракчызы-биле кады удуртукчуларга болгаш дузалакчыларга библейжи негелделерни хынамчалыг көөр (1 Тим. 3:1—10, 12, 13; 1 Пет. 5:1—3).

13. Удуртукчуларның шиитпирлерин деткип турарывысты канчаар көргүзүп болур бис?

¹³ Удуртукчуларның Библияга үндезилеттинген айтыышкыннарын дыңнаар ужурлуг бис. Ол шынчы кадарчылар Бижилгениң «шынныг сөстеринге» даянып, удуртулга берип турар (1 Тим. 6:3). Чурум үреп турар чыыштың кежигүннеринге Павелдиң берген сүмелерин көрээлиңер. Ол: «Чамдык улус кылыр ажыл чок чурттап... өскелерниң ажыл-херээнче холгаарлаарынга өйлежип турар» — дээн. Ындыг улуска удуртукчулар сагындырыг бээрге, олар ону херекке албайн турган. Ындыг кижиге чыыштың хамаарылгазы кандыг болур турганыл? Павел «ону демдектей көрүп алыңар... ооң-биле харылзашпаңар» деп айыткаш, ынчалза-даа «аңаа дайзыныңарга дег хамаарылга көргүспеңер» деп немээн (2 Фес. 3:11—15). Христианнарның бирээзи шын эвес алдынып, акы-угбаларже багай салдар чедирип турар болза (чижээ, Иегованың Херечизи эвес кижи-биле таныжып эгелээр болза), удуртукчулар чыышты оваарындырып, илеткел чугаалап болур (1 Кор. 7:39). Ындыг илеткелди канчаар хүлээп алыр силер? Илеткел кымга хамааржырын билир болзуңарза, ооң-биле сырый харылзашпазын кызар силер бе? Ынчаар ол кижиниң дугайында сагыш човап турарыңарны көргүзер силер. Быжыг туружуңар ол кижини чурум үревезинче оттуруптар чадавас ¹.

14. Чыыштың арыг чоруун канчаар кадагалап болур бис?

¹⁴ Бурганның Сөзүнден удуртулганы эдерип тургаш, чыыштың чүдүлге талазы-биле арыг артарынга дузалап болур бис. Коринф чыыжынга болган таварылганы көрээлиңер. Павел күжүн харамнанмайн, Коринфке суртаалдап турган. Ол «ыдыктаткаш, Бурганның чону боору-биле кыйгырткан» акы-угбаларга ынак апарган (1 Кор. 1:1, 2). Оларның самыын чорук кылып турган кижиге хамаарыштыр хемчег албайн турганынче айтыры Павелге берге турган. Ол кижини Эрликке хүлээдип бээр кылдыр, өскээр чугаалаарга, чыыштан үндүрүптерин Павел удуртукчуларга айыткан. Олар чыышты «ажыткыдан» арыглаар ужурлуг турган (1 Кор. 5:1, 5, 6, 12). Бачыдын миннивейн турар кижини үндүрер дээн удуртукчуларның шиитпирин деткиир болзувусса, чыыштың арыг чоруун кадагалап турар боор бис. Оон аңгыда ындыг кижини, Иегованың өршээлин алыр кылдыр, буруузунарынче оттуруптар чадавас бис.

15. Чыыш иштинге тайбың чорукту канчаар кадагалап ап болур бис?

¹⁵ Коринфте оон өске база бир нарын айтырыг тургустунуп келген — чамдык акылар кады бүзүрээн ха-дуңмазы-биле чаргылдажып турган. Павел оларга: «Когарап артарыңар оон дээре эвес бе?» — деп айтырыг салган (1 Кор. 6:1—8). Чамдыкта ха-дуңма кады ажылдаар керээ чарып аарга, оларның херээ буураашкынга таваржып болур. Акша-төгерик талазы-биле когарааш, олар бот-боттарын бузурукчу чорукка буруудадып, хуралдың тайбың чоруун үреп турар. Кедерезе, шүүгү черинге чаргылдажып эгелээр. Ынчалзажок чыышта тайбыңны үреп, Бурганның адын хирлендирериниң орнунга когарааны дээре деп, Библия көргүзүп турар ². Шыңгыы айтырыгларны болгаш чөрүлдээлерни шиитпирлээр дизе, Иисус Христостуң сүмелерин эдерер ужурлуг бис. (Матфей 5:23, 24; 18:15—17 номчувут.) Шак ынчаар чыыш иштинге демниг чорукту кадагалап алыр бис.

16. Бурганның чонунуң аразында демниг чоруктуң тергиидеп турары чүге кайгамчык эвезил?

¹⁶ Иегова бодунуң Сөзүнде чүге Ооң чонунуң аразында демниг чоруктуң тергиидеп турарын тайылбырлаан. Ыр күүседикчизи:  «Ха-дуңма улус эп-сеткилдиг кады чурттаар болза, эки-даа, таарымчалыг-даа» — деп ырлаан (Ыд. ыр. 132:1). Израильчилер Иегованы дыңнап турган үезинде чаңгыс эп-биле каттышкан, чурумчуттунган чон чораан. Бурган чонунуң келир үезиниң дугайында: «Кодан хойну дег, силерни каттыштырып, чыыр мен» — деп чугаалаан (Мих. 2:12). А Софония медээчини таварыштыр Ол: «Мен ынчан чоннар шупту Дээрги-Чаяакчының адын кыйгырзын дээш база Меңээ чаңгыс эптиг бараан болзун дээш, оларның аксы-дылын [библейжи алыс шынның дылы] арыглап каар мен» — деп баш бурунгаар чугаалаан (Соф. 3:9). Иеговага чаңгыс аай, демниг бараалгаар алдар-хүндү дээш, аажок өөрүп четтирер-дир бис!

17. Христиан кижи бачыт үүлгедиптерге, чыыш иштинде демниг болгаш арыг чорукту кадагалаар дээш, удуртукчулар канчаар хөделир ужурлуг?

¹⁷ Чыыш иштинде демниг болгаш арыг чорукту кадагалаар дээш, удуртукчулар шүүгү айтырыгларын соңгаарлатпайн, ынакшылдыы-биле сайгарар ужурлуг. Бурган ынакшылды илередирде анаа чүгле минниишкиннер-биле башкартынмас база бачыттарны тоовайн барбас деп, Павел билир чораан (У. ч. 15:3). Ынчангаш, шыңгыы-даа болза, сагыш човангыры-биле коринфичилерге Бирги чагааны бижииринден ол ойталаваан. Каш ай эрткенде, Павелдиң коринфичилерге бижээн Ийиги чагаазындан алырга, удуртукчулар ооң сүмезин хүлээп алган деп көскү, чүге дизе нарын айтырыг шиитпирлеттинген. Бир эвес христиан кижи билинмейн чыткаш, шын эвес базым кылыптар болза, томуйлаткан акылар ону эдип-чазап көөр ужурлуг (Гал. 6:1).

18. a) Бирги вектиң христианнарынга Бурганның Сөзүнден сүмелер канчаар дузалааныл? б) Дараазында статьяга чүнү сайгарар бис?

¹⁸ Моон алгаш көөрге, бирги векте Коринфте болгаш өске-даа хоорайларда христианнарга чыыш иштинге тайбың, арыг болгаш демниг чорукту кадагалаарынга Бурганның Сөзүнден сүмелер дузалаан (1 Кор. 1:10; Эф. 4:11—13; 1 Пет. 3:8). Ооң ачызында олар бараалгалынга хөйнү кылып чораан. Павелдиң сөстеринден алырга, «Буянныг Медээни чырык черде Бурганның бүгү чаяалгазынга медеглээн» турган (Кол. 1:23). Бөгүн суртаал ажылын чорудуп турар делегей чергелиг организацияга хамааржыр шупту улус Бурганның күзел-бодалын бүдүн делегейде кижилерге чугаалап турар. Бурганның бараалгакчылары Библияны үнелеп, Дээрги-Бурган-Чаяакчы Иеговага алдар-хүндүнү чедирер дээш, чүткүп турарының дугайында дараазында статьядан хөйнү билип алыр силер (Ыд. ыр. 70:15, 16).