БРОШЮРАНЫҢ ДАШТЫНДА ТЕМА | КӨЗҮЛБЕС ОРАНДА ЧҮҮ БООП ТУРАРЫЛ?
Көзүлбес оран дугайында улустуң саналы
Көзүлбес оранда чүү болуп турар база ында кым чурттап турар деп, боданган силер бе? Ол айтырыг кижилерни хөй чылдар ишти дүвүредип чоруур. Көзүлбес оранда өгбелерниң сүнезиннери чурттап турар, ынчангаш оларга чүдүүр ужурлуг бис деп, чамдык улус бүзүреп чоруур. Өскелер ону эки кижилерниң өлген соонда чеде бээри чыргал ораны база дээрниң төлээлериниң чурттаар чери деп бодаар; ону кудай-дээр дээр. А үшкүлери ында чүс-чүс миллион бурганнар чурттап турар деп бодаар.
Көзүлбес оран дугайында чүнү-даа билбес бис, чүге дизе оон кым-даа эглип келбээн деп санаар кижилер база бар. Ынчалза-даа ындыг саналдар шын эвес. Иисус Христос черже кээриниң мурнунда дээрге, көзүлбес оранга, чурттап чораан. Ол ооң дугайында бирги векте шажын удуртукчуларынга чугаалаан: «Мен, дээрден дүжүп кээрде... Адамның күзел-соруун күүседир дээш келген мен». Иисус көзүлбес оранны көрген болгаш, элчиннеринге: «Адамның бажыңында чурттаар чер эмгежок» — деп чугаалаан (Иоанн 6:38; 14:2).
Иисустуң Адазы — Иегова деп аттыг Бурган-дыр (Ырлар 82:19). Ооң «бажыңы» дээрде. Ынчангаш Иегова Бурган биле Иисус Христостан өске кым-даа көзүлбес оранның дугайында эки тайылбырлап шыдавас. Олар кудай-дээрде чүү болуп турарын Бургандан коргар кижилерге сагышка артып каар көстүүшкүннер таварыштыр хөйнү ажыткан.
Дараазында статьяда ол көстүүшкүннерниң чамдыызын тодарадып бижээн библейжи шүлүктерни сайгарып каан. Оларның дугайында номчуп тургаш, көзүлбес оранда хамык чүвени хол-биле тудары болгаш карак-биле көөрү болдунмас деп сактып туруңар. Ынчангаш чүгле дээрниң төлээлеринге билдингир тайылбыр ажыглаарының орнунга, Бурган улуска көзүлбес оранда чүү болуп турарын көргүзер дээш, кижилерге билдингир чүүлдерни ажыглап, көстүүшкүннер берген. Оларның ачызында көзүлбес оранда кым чурттап турарын билип алыр силер.
