ӨӨРЕНИР СТАТЬЯ 19
ЫРЫ 6 Дээрлер Бурганның алдарын медээлеп тур
Шынчы ангелдерниң үлегерин эдериңер
«Дээрги-Чаяакчының төлээлери... Ону алгап-йөрээңер!» (ЫД. ЫР. 102:20).
КОЛ БОДАЛ
Шынчы ангелдерден чүү чүвеге өөренип ап болур бис?
1, 2. а) Ангелдерден ылгалывыс кандыг? б) Ангелдер-биле ниити чүвүс бар?
ИЕГОВА бисти улуг, найыралдыг өг-бүлезинче чалаан. Ооң өг-бүлезинде бүгү делегейде акы-угбалардан аңгыда, сая-сая шынчы ангелдер бар (Дан. 7:9, 10). Дээрниң төлээлери кижилерден оранчок ылгалдыг деп билир бис. Чижээ, Бурган оларны бисти мурнай чаяаган (Иов 38:4, 7). Олар кижилерден оранчок күштүг. Тергиин эвес кижиге ангелдерниң кайы хире ыдыктыын, чөптүг-шынныын угаап билири берге (Лк. 9:26).
2 Ынчалза-даа дээрниң төлээлери-биле бистиң ниити чүүлүвүс база бар. Чижээ, кижилер-даа, ангелдер-даа хостуг шилиир эргелиг. Иегованың чараш шынарларын база илередип болур бис. Ангелдер дег, кижи бүрүзү — хууда аттыг, аажы-чаңныг база Иеговадан даалгаларлыг. Оон ыңай олар-даа, бис-даа Чаяакчывыска мөгеер күзелдиг кылдыр чаяаттынган бис (1 Пет. 1:12).
3. Шынчы ангелдерден кандыг кичээлдер өөренип ап болур бис?
3 Ангелдер-биле ниити чүүлүвүс бар болганда, олардан өөренип болур бис. Ангелдерниң биче сеткилдиин, кижилерге ынаан, туруштуг чоруун өттүнүп, чыышты арыг тудар дээш, канчаар кызып болурувусту бо статьяга сайгарар бис.
АНГЕЛДЕР БИЧЕ СЕТКИЛДИГ
4. а) Ангелдерниң биче сеткилдии чүден көскү? б) Ангелдер чүге биче сеткилдиг? (Ырлар 88:6).
4 Ангелдер биче сеткилдиг, күштүг, мерген угаанныг база дуржулгазы улуг-даа болза, олар Иеговага дыңнангыр (Ыд. ыр. 102:20). Ангелдер хүлээлгелерин күүседип тургаш, билииргеп, мактанмас. Ат-сывын адаваска-даа, Иегованың күзел-соруун өөрүшкүлүг күүседип чоруур (Э. д. 32:24, 29; 4 Хаан. 19:35) a. Чүгле Иеговага хамааржыр алдар-макталды олар кажан-даа күзевес. Ангелдер чүге биче сеткилдиг? Чүге дизе олар Иеговага ынак база ону ханы хүндүлээрлер (Номчуптуңар: Ырлар 88:6).
5. Иоанн элчин шын эвес алдынарга, бир ангел биче сеткилди канчаар илереткен? (Чурукту база көрүңер.)
5 Ангелдерниң биче сеткилдиин көргүскен бир таварылганы көрээлиңер. Адын билбезивис ангел б. э. 96 чылда Иоанн элчинге көстүүшкүн көргүскен (Ажыд. 1:1). Иоанн дис кырынга олура дүшкеш, мөгеер деп турда, ангел аңаа: «Ынчанма, мен база-ла, сен дег... Бурганга бараан бооп чор мен. Бурганга мөгей!» — дээн (Ажыд. 19:10). Ол дыка-ла биче сеткилдиг харыылаан! Ангел бодунга ат-алдарны күзевээн, а кичээнгейни дораан-на Иеговаже углаан. Ол күчү-күштүг ангел Иеговага Иоанндан артык үр бараалгап келген. Ынчалза-даа ол бодун биче сеткилдии-биле Бурганның чалчазы мен дээн. Иоанн шын эвес алдынган-даа болза, ангел ону шыңгыы чемелевээн. Көстүүшкүннерден Иоанның сеткили хөлзей бергенин ангел билип турган. Ынчангаш назылай берген элчин-биле чылыг-чымчак чугаалашкан.
Иоанн-биле чугаалажып турган ангел биче сеткилдиин көргүскен (абзац 5).
6. Ангелдер ышкаш биче сеткилди канчаар илередип болур бис?
6 Ангелдер ышкаш биче сеткилди канчаар илередип болур бис? Иеговага кызымаккай бараалгап тургаш, мактанмайн, бодувуска тускай хамаарылга манавас ужурлуг бис (1 Кор. 4:7). Хөй чыл ишти бараалгаан азы ховар даалгаларлыг болзувусса, акы-угбалардан дээре бис деп бодаары шын эвес. Биске хөй ажыл-херек дааскан тудум, оон-даа артык биче сеткилдиг алдынары чугула (Лк. 9:48). Ангелдер ышкаш ха-дуңмага бараалгаарын күзээр болгаш, боттарывысты олардан өрү кылдыр алдынмас бис.
7. Бир кижиге сүме кадарда азы частырыын чугаалаарда, канчаар биче сеткилди илередип болур бис?
7 Оон ыңай биче сеткил кажан херек? Бир кижиниң шын эвес алдынганын эскергеш, ооң частырыынче айтыр азы аңаа сүме бээр апарган дижик бис. Ол дээрге чыышта акый азы ажы-төлүвүс бооп болур. Чамдыкта дорт чугаалаар апаар. Ынчалза-даа дорт дээрге кадыг-дошкун болуп, ол кижини куду көөрү азы чемелээри эвес. Ангелдиң Иоанн-биле чылыг-чымчак чугаалашканын сактып кээли. Бодувусту улустан дээре деп санавас болзувусса, Библиядан бодалдар үлежирде хүндүткелдиг, кээргээчел болурун утпас бис (Кол. 4:6).
АНГЕЛДЕР КИЖИЛЕРГЕ ЫНАК
8. а) Ангелдер кижилерге ынак деп кайыын көскү? (Лк. 15:10). б) Ангелдер биске суртаалдаарынга канчаар дузалажып турар? (Чурукту база көрүңер.)
8 Ангелдер кижилерни куду деп санавас, харын-даа оларга бистиң-биле чүү болуп турары хамаанчок эвес. Олар кижилерге ынак. Кажан Иегованың читкен хою буруузун миннип, дедир эглип кээрге азы бир кижи чуртталгазын өскерткеш алыс шынны хүлээп алырга, олар дыка өөрүүр. (Номчуптуңар: Лука 15:10.) Оон аңгыда, ангелдер Чагырганың дугайында медээни чугаалаарынга биске дузалап турар (Ажыд. 14:6). Олар дорту-биле суртаалдавас-даа болза, Иегованы билип алыксаан улуска бисти чедирип болур. Ынчалза-даа таварылга бүрүзүнде-ле ангелдер киришкен деп болбас. Иегова өске арганы база ажыглап болур болгай. Чижээ, ол дыка хөй байдалдарда ыдыктыг сүлдезин ажыглап, бараалгакчыларын кижилерге дузалажыр кылдыр углап-баштап турар (Аж.-ч. 16:6, 7). Ангелдер бисти деткиир даалгалыг болганда, суртаал үезинде олар бистиң-биле кады деп бүзүрээр бис. (« Мөргүлдерниң харыызы» деп көзенекти көрүңер b.)
Суртаал соонда чанып бар чыдар өг-бүле. Угбавыс муңгаргай аныяк уругну эскерип каан. Бургандан дуза дилээн улуска бисти ангелдер ужураштырыптар деп угбавыс билип турар. Муңгаргай уругну сеткилинден ол кээргей берген (абзац 8).
9. Ангелдерниң кижилерге ынакшылын канчаар өттүнүп болур бис?
9 Кижилерге ынак болурунга хамаарыштыр ангелдерни канчаар өттүнүп болур бис? Чыышта бир кижини катап тургускан деп чарлал дыңнааш, ангелдер ышкаш өөрүп болур бис. Ол акывысты азы угбавысты чылыг-чымчак хүлээп, ынакшылывысты көргүзер дээш кызар бис (Лк. 15:4—7; 2 Кор. 2:6—8). Оон ыңай бүгү сеткиливистен суртаалдап турарывыс-биле ангелдерни өттүнер бис (Эккл. 11:6). Өөрүшкүлүг медээни чедиреринге оларның биске дузалажып турары дег, бис база акы-угбаларывыска бараалгалга деткимче болур бис. Чижээ, дуржулгазы эвээш бараалгакчыны суртаалче чалап болур бис бе? Чок болза, кадыкшылы багай азы назылай берген акы-угбаларны кады бараалгаарынче чалап болур бис бе?
10. Сарадан чүнү өөренип ап болур бис?
10 Иеговага биеэги ышкаш хөй бараалгаары болдунмас болза канчаар? Ынчан ангелдер-биле ажылдажыр чаа аргаларны тып ап болур бис. Индиядан Сара-биле c таныжып алыылы. Ол барык 20 чыл эгелекчи бооп бараалгаан соонда, аар аарый берген. Сара кылаштап шыдавас, безин орундан туруп албас апарган. Ооң сагыш-сеткилинге база дыка берге болган. Ынчалза-даа чыыштың ынакшылдыг деткимчези, Библияны хүннүң номчуп, шинчилээри аңаа өөрүшкүзүн эгиткен. Сара бараалгалын долузу-биле өскертир ужурга таварышкан. Чүге дизе ол чагаа бижиир дээш, олуруп безин шыдавас апарган. Ынчангаш чүгле телефон дамчыштыр суртаалдап эгелээн. Чугаалашкан улузунче катап долгаарга, олар база Библия сонуургаар таныыр улузунуң дугаарларын берип турган. Ынчалдыр Сара 70 библейжи кичээлдиг апарган. Ол кичээлдерин эрттирип четтикпейн баргаш, чамдыызын чыышта өске бараалгакчыларга дамчыдып берген. Өөренип турар хөй улус чыыштарже кээп эгелээн. Сара болгаш өске-даа шынчы христианнар-биле кады ажылдашкаш, ангелдерниң кайы хире өөрүп турарын бодап көрүңер даан!
АНГЕЛДЕР БЫЖЫГ ТУРУШТУГ
11. Шынчы ангелдерниң туруштуун чүге бедик үлегер деп болур?
11 Шынчы ангелдер кайгамчыктыг туруштуг үлегерни биске көргүзүп турар. Чижээ, муң-муң чылдар дургузунда чөптүг эвес, каржы чорукту олар шыдажып келгеннер. Эрлик болгаш өске көзүлбес чаяалгалар Бурганның дайзыннары апарганын база олар көрген (Э. д. 3:1; 6:1, 2; Иуда 6). Бир шынчы ангел хөй хонуктар дургузунда күштүг бук-биле демисешкенин Библияда бижээн (Дан. 10:13). Кижи төрелгетенниң бүгү төөгүзүнде Иегованың талазын хөй эвес улус шилип алганын база олар көрген. Ынчалза-даа шынчы ангелдер Бурганга чүткүлдүү-биле өөрүшкүлүг бараалгаарын уламчылап чоруур. Үези кээрге, чөптүг эвес чорукту Иегова соксадыптарын олар билир.
12. Туруштуг болурунга биске чүү дузалаар?
12 Ангелдерниң туруштуун канчаар өттүнүп болур бис? Бис база хөй чөптүг эвес чорукту көрүп чоруур бис. Ынчалза-даа Бурган бүгү каржы-бакты узуткаар деп бүзүрээр бис. Ынчангаш сула салдынмайн, ангелдер ышкаш, улаштыр-ла буянны кылыр бис (Гал. 6:9). А Бурган биске ол бүгүнү шыдажып эртеринге дузалаар деп аазаан (1 Кор. 10:13). Шыдамык база өөрүшкүлүг болур дээш, Иеговадан ыдыктыг сүлдени дилеп, мөргүүрү чугула (Гал. 5:22; Кол. 1:11). Амгы үеде удурланыышкынга таваржып турар болзуңарза, дүвүревейн, Иеговага ынаныңар. Ол силерни албан деткип, быжыглаар (Евр. 13:6).
АНГЕЛДЕР ЧЫЫШ АРЫГ АРТСЫН ДЭЭШ САГЫШ ЧОВАП ТУРАР
13. Ангелдер бо сөөлгү хүннерде кандыг тускай даалга күүседип турар? (Матфей 13:47—49).
13 Бо сөөлгү хүннерде Иегова ангелдерге тускай даалга берген. (Номчуптуңар: Матфей 13:47—49.) Чагырга дугайында медээни бүгү делегейде сая-сая кижилер сонуургап турар. Оларның чамдыызы алыс шынны хүлээп алгаш, христианнар апарып турар, а өскелери — чок. «Бузуттугларны чөптүг-шынныг улустан» аңгылаарын ангелдерге дааскан. Өскээр чугаалаарга, олар чыыш арыг артсын дээш хайгаарап турар. Бир-ле чылдагаан дээш, чыыш-биле харылзаазы үзүлген кижи дедир эглип шыдавас деп бодаары шын эвес. Оон ыңай чыышка бергелер кажан-даа турбас деп болбас. Ынчалза-даа чыыш арыг артсын дээш, ангелдер аажок кызып турар деп бүзүрээр бис.
14, 15. Чыыш арыг болзун дээш, ангелдерниң үлегерин канчаар эдерип болур бис? (Чуруктарны база көрүңер.)
14 Чыышты арыг тудар дээш, ангелдерни канчаар өттүнүп болур бис? Мөзү-шынар болгаш Бурган-биле найыралга хамаарыштыр чыыш арыг болзун деп күзээр бис. Ынчангаш боттарывысты багай салдардан камгалаарын кызар бис. Иеговага ынак улус-биле эдержип, Бургандан ырадып болур бүгү чүүлден ойталап турар бис (Ыд. ыр. 100:3). Оон аңгыда, Иеговага шынчы артарынга кады бүзүрээн ха-дуңмавыска дузалап болур бис. Чижээ, акывыс азы угбавыс аар бачыт кылыпкан дижик. Ол кижиге ынак болгаш, удуртукчулар-биле чугаалажырын сүмелээр бис. А ол ынавайн барза, удуртукчуларга ооң дугайында боттарывыс чугаалаар бис. Бүзүрели кошкай берген акывыс азы угбавыс дүрген-не дузаны алзын деп күзээр бис! (Иак. 5:14, 15).
15 Чамдыкта аар бачыт кылган кижини чыыштан ырадыр апаар. Ындыг таварылгада ооң-биле аралашпайн баар бис (1 Кор. 5:9—13) d. Ынчалдыр чыыш арыг артар база ол кижиге экини күзеп турарывысты көргүзер бис. Чүге ынча деп болур? Чүге дизе ол ынчан Иеговаже эглир ужурлуун дораан билип каар. Бир эвес ол кижи эглип кээр болза, Иегова болгаш ооң төлээлери-биле кады өөрүүр бис (Лк. 15:7).
Чыышта бир кижи аар бачыт кылганын билип кааш, чүнү кылыр ужурлуг бис? (абзац 14). e
16. Ангелдерниң үлегеринден амы-хууда чүнү өөренип алыксаар силер?
16 Ангелдерниң дугайында Иегова биске чугаалааны дээш, олар-биле кады ажылдажыр арга дээш, дыка-ла өөрүп четтирер-дир бис! Ынчангаш биче сеткилди, ынакшылды улуска илередип, туруштуг артып, чыыштың мөзү-шынарын болгаш Бурган-биле найыралын арыг тудуп ангелдерни өттүнээлиңер. Оларның үлегерин эдерип, Иегованың өг-бүлезинге кезээ-мөңгеде артар бис.
ЫРЫ 124 Бурганга кезээде бердинген бис
a Библияда сая-сая ангелдер аразындан чүгле Михаил биле Гавриилдиң адын бижээн (Дан. 12:1; Лк. 1:19).
b Өске таварылгаларны «Иегованың Херечилериниң дептерлер айтыкчызындан» «Ангелдер» деп биче эгеден тып ап болур.
c Атты өскертип каан.
d Удуртукчу чөвүлелдиң 2024 чылдың № 2 дыңнадыында чыыштан ыраткан кижи чыышка кээрге, мендилежирин азы мендилешпезин христианнар Библияга кижизиткен арын-нүүрүнге башкартып, хууда шиитпирлээр деп тайылбырлаан.
e ЧУРУКТА. Бачыт кылган эжинге удуртукчуларга ужуражырын сүмелеп турар уруг. Кезек үе эртерге-даа эжи ону кылбаска, ол удуртукчулар-биле боду ужуражып турар.
