Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2015

Te mau tane: Nafea ia oaoa to outou utuafare?

Te mau tane: Nafea ia oaoa to outou utuafare?

EAHA te maitai ta te tane e nehenehe e horoa i ta ’na vahine? E rave rahi tei paari ma te mana‘o, te imiraa i te moni no te utuafare te ohipa matamua ïa a te tane. Noa ’tu mea rahi ta ratou tao‘a, e hepohepo vetahi vahine e e riaria atoa. No ta ’na tane, ua parau Rosa, te tahi vahine no Paniora: “I mua i te taata, mea maitai roa o ’na, i te fare râ mea ê roa ïa.” Ua faaite Joy no Nigéria: “Aita ana‘e vau i farii i te mana‘o o ta ’u tane, e parau mai o ’na, ‘O vau te tane, haapao noa oe i ta ’u e parau atu.’”

E nafea te tane ia amo i ta ’na hopoia ma te here? Eaha te tia i te tane ia rave ia oaoa to ’na utuafare, ia “maitai” ta ’na vahine?—Ruta 1:9.

TA TE BIBILIA E PARAU RA NO NIA I TE MANA FAATERE O TE TANE

Noa ’tu hoê â tiaraa to te tane e te vahine i te aro o te Atua, te parau ra te Bibilia mea taa ê te hopoia a te tahi e te tahi. Te na ô ra te Roma 7:2, tei raro a‘e te vahine faaipoipo i ‘te ture a tana tane.’ Mai te mau faanahoraa e rave rahi e maiti i te hoê no te tiaau i te ohipa, ua faaoti te Atua o te tane te upoo o te vahine. (Korinetia 1, 11:3) E tia ïa i te tane ia faatere i to ’na utuafare.

Ei tane, e nafea ia faaohipa i te mana faatere ta te Atua i horoa ’tu? Te na ô ra te Bibilia, “e aroha outou i ta outou mau vahine, mai te Mesia atoa i aroha i te ekalesia.” (Ephesia 5:25) Noa ’tu aita Iesu Mesia i faaipoipohia, e nehenehe to ’na hi‘oraa e tauturu ia oe ia riro ei tane maitai. E hi‘o ana‘e e nafea.

E HI‘ORAA MAITAI ROA IESU NO TE MAU TANE

Ua tamahanahana Iesu ia vetahi ê e ua haamâmâ i ta ratou hopoia. Teie ta Iesu i fafau i te feia atoa i hepohepo e tei teimaha no to ratou mau fifi: “E haere mai outou ia ’u nei, . . . na ’u outou e faaora.” (Mataio 11:28, 29) E pinepine, ua faaore o ’na i to ratou mauiui e ua tauturu atu ia haafatata i te Atua. Eita e ore, e rave rahi tei hinaaro e haere atu ia Iesu, ua tiaturi hoi ratou e haamâmâ oia i ta ratou hopoia!

No te pee i te hi‘oraa o Iesu. A imi i te ravea no te haamâmâ i te hopoia a ta oe vahine. Ua tuea te mana‘o o vetahi vahine i to Rosa tei parau ma te ta‘i: “E tavini noa vau no  ta ’u tane, tirara ’tu ai.” Ua na ô Kweku, tane faaipoipo oaoa: “E pinepine au i te ani i ta ’u vahine e nafea vau ia tauturu atu. No to ’u here ia ’na, e rave atoa vau i te mau ohipa rii i te fare.”

Mea tâu‘a Iesu ia vetahi ê e ua ite i to ratou mauiui. A 12 matahiti a‘enei to te tahi vahine veve faaoromairaa i te mauiui o te hoê ma‘i ino mau. Ua faaroo oia i te mau semeio ta Iesu i faatupu, “ua na ô a‘era hoi oia, Ua faatiaia ana‘e au i to ’na ahu, e ora ïa vau.” E tera iho â tei tupu! Ua haafatata oia ia Iesu, tapea ’tura i te hiti o to ’na ahu e tera iho â taime, ua ora to ’na ma‘i. Ua mana‘o vetahi e vahine teoteo teie e ua hi‘o ino ia ’na. Area Iesu, ua ite i to ’na hepohepo. * Ma te mǎrû, ua parau oia ia ’na: ‘E tau tamahine, ia ora oe i to ma‘i.’ Aita Iesu i faahaama aore ra i tama‘i atu, ua hi‘o râ e  vahine ma‘ima‘i teie. Ua faaite Iesu e taata maitai oia, ua ite hoi o ’na i te mauiui ta te vahine i faaoromai.—Mareko 5:25-34.

No te pee i te hi‘oraa o Iesu. Ua peapea ana‘e ta oe vahine, a haapao atu â ia ’na e a faaite i te faaoromai. A tamata i te taa i to ’na mana‘o e to ’na huru. Te faataa ra Ricardo: “Ia ite au e riri hanoa ta ’u vahine, e haapae au i te faahiti i te parau e faariri atu â ia ’na.”

Ua aparau noa Iesu e ta ’na mau pǐpǐ. Mea rahi te mau mea ta Iesu i parau i to ’na mau hoa e aita o ’na i taiâ i te faaite i to ’na mana‘o. Ua na ô oia, “ua faaite atu hoi au ia outou i te mau parau atoa ta ’u i ite i tau Metua.” (Ioane 15:15) I te tahi mau taime, ua hinaaro iho â Iesu e faaea o ’na ana‘e no te feruri e no te pure. Mea pinepine râ oia i te faaite i to ’na mau mana‘o horuhoru i ta ’na mau pǐpǐ. Te po na mua ’‘e oia a pohe ai mai te taata rave hara, ua parau tia roa ’tu oia e “mauiui rahi” to ’na. (Mataio 26:38) Aita roa Iesu i faaea i te paraparau i to ’na mau hoa noa ’tu ua hape ratou.—Mataio 26:40, 41.

Ma te pee i te hi‘oraa o Iesu, e nehenehe hoê taata e riro ei tane e ei metua tane maitai atu â

No te pee i te hi‘oraa o Iesu. A aparau e ta oe vahine. A faaite eaha te vai ra i roto i to feruriraa e to aau. E faahapa paha hoê vahine i ta ’na tane ia paraparau rahi oia i mua i te taata, area i te fare e mamû noa ïa. A hi‘o na râ i te mana‘o o Ana ia haamahora ta ’na tane i to ’na aau. Te na ô ra oia: “E ite au i to ’na here mau ia ’u e e piri atu â mâua.”

Eiaha e vai mû noa no te tahoo. Te na ô ra te tahi vahine: “Ia riri ta ’u tane ia ’u, eita o ’na e paraparau mai tau mahana. E faahapa vau ia ’u a mana‘o atu ai aita to ’u e faufaaraa.” Te tamata ra râ Edwin i te pee i te hi‘oraa o Iesu. Te na ô ra oia, “ua riri ana‘e au, eita vau e pahono oioi e tiai râ i te taime tano no te aparau.”

A hi‘o na ia Joy tei faahitihia i te haamataraa. Ua ite oia ua taui ta ’na tane i to ’na haapiiraa i te Bibilia e te mau Ite no Iehova. Te faatia ra Joy: “Ua taui oia e te tutava atoa ra i te riro ei tane î i te here ma te pee i te hi‘oraa o Iesu.” E mirioni feia faaipoipo tei faufaa-atoa-hia i te hoê â haapiiraa Bibilia. E hinaaro atoa anei oe e na reira? E nehenehe oe e ani i te hoê haapiiraa Bibilia tamoni ore i te mau Ite no Iehova.

^ par. 10 Ia au i te ture a Mose, mea viivii teie vahine no to ’na ma‘i. Ia tapea noa ’tu oia ia vetahi ê, e viivii atoa tera taata.—Levitiko 15:19, 25.

No te ite atu â

Eaha te hoê haapiiraa Bibilia?

Pahonoraa i te mau uiraa no nia i ta matou haapiiraa Bibilia tamoni ore.

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.