Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2015

 APARAURAA E TE HOÊ ITE NO IEHOVA

No te aha e hi‘opoa ’i i te Bibilia?

No te aha e hi‘opoa ’i i te Bibilia?

Teie te tahi hoho‘a aparauraa e te hoê Ite no Iehova. A feruri na e e Ite no Iehova Brian e te farerei ra o ’na ia Eric i to ’na fare.

MEA PAPU TE MAU AAMU I ROTO I TE BIBILIA

Eric: E parau atu vau ia oe, e ere au i te mea tâu‘a roa i te haapaoraa. Aita ïa e faufaa ia aparau tâua.

Brian: Mauruuru i te faaiteraa mai i to oe mana‘o. O Brian to ’u i‘oa e to oe?

Eric: O Eric.

Brian: Oaoa i te farereiraa Eric.

Eric: E pai!

Brian: Ua paari anei oe i roto i te haapaoraa a to oe utuafare?

Eric: E. I to ’u faarueraa râ i te fare no te haere i te haapiiraa teitei, aita vau i tâu‘a faahou i te reira.

Brian: Eaha ta oe i haapii i ǒ?

Eric: Te tuatapaparaa i te huru o te taata i te roaraa o te tau. Mea au roa na ’u ia hi‘opoa i te huru o te taata a ora ’i i nia i te fenua.

Brian: Mea au mau iho â te tuatapaparaa aore ra te mau aamu. Mai ta oe paha i ite, ua faaite te Bibilia i te aamu o te taata. Ua faaohipa ê na anei oe i te Bibilia i roto i ta oe mau maimiraa?

Eric: Aita. Ua ite au e buka maitai tera, aita râ i mana‘o noa ’‘e e buka e faatia ra i te aamu o te taata.

Brian: Mea anaanatae mau ia aparau ia oe. Mai te peu e taime rii to oe, e hinaaro vau e faaite atu te tahi mau aamu papu i roto i te Bibilia.

Eric: Na reira, aita râ ta ’u Bibilia.

Brian: Aita e peapea. E nehenehe au e faaohipa i ta ’u. Te hi‘oraa matamua, tei roto i te Paraleipomeno 1 pene 29, irava 26 e 27. Te na ô ra: “Riro atura te tamaiti a Iese ra o Davida ei arii i nia ia Iseraela atoa; e te tau i arii ai oia i nia ia Iseraela, e piti taau ïa [aore ra 40] matahiti, e hitu o ’na matahiti i te ariiraa i Heberona, e toru ahuru e toru tiahapa i te ariiraa i Ierusalema.”

Eric: No te aha oe e parau ai e aamu papu tera?

Brian: Ua parau vetahi, e ere te arii Davida i te mea mau.

Eric: No te aha hoi ratou i mana‘o mai tera?

Brian: Taa ê atu i te Bibilia, mea iti roa te haapapuraa e faaite ra e taata mau oia. I 1993, ua ite te tahi pǔpǔ taata ihipǎpǎ hoê ofai tahito roa e ua hurihia te parau e vai ra i nia iho, “Utuafare o Davida.”

Eric: Mea anaanatae mau.

Brian: Ua feaa atoa vetahi no te tahi atu taata o te Bibilia. O Ponotio Pilato, te tavana i faatere i te tau o Iesu. I roto i te Luka pene 3, irava 1, ua faahitihia to ’na i‘oa, oia atoa to te tahi atu feia mana o tera tau.

Eric: E, ua papaihia: “O Ponotio Pilato te tavana i Iudea, o Heroda te teterareha i Galilea.”

Brian: Tera. Mea maoro to vetahi mau aivanaa  feaaraa e taata mau Ponotio Pilato. A 50 râ matahiti i teie nei, ua itehia i te pae Hitia o te râ no Ropu te tahi ofai, ua nana‘ohia to ’na i‘oa i nia iho.

Eric: Aita vau i faaroo a‘enei i te reira mau mea.

Brian: Oaoa roa ïa vau i te faaite atu.

Eric: Ua ite oe, mea faahiahia mau te papairaa o te Bibilia. No ’u râ, aita to ’na e faufaaraa i teie tau. Mea papu paha te mau aamu i roto, aita râ vau e mana‘o e faufaahia tatou i te parauhia ra i roto i te Bibilia.

E BUKA NO TEIE TAU ATOA TE BIBILIA

Brian: Mea rahi te parau mai tera. Mea taa ê râ to ’u mana‘o. Teie te tumu: Ei taata, aita to tatou mau hinaaro i taui mai te haamataraa mai. E hinaaro noa tatou i te maa, te ahu e te nohoraa. E hinaaro noa atoa tatou ia aparau i te tahi i te tahi e ia oaoa to tatou utuafare. E ere anei tera te mea faufaa no tatou?

Eric: Oia mau.

Brian: E nehenehe te Bibilia e tauturu mai i roto i tera mau tuhaa atoa. Mea tano ïa ia parau e ere noa e buka tahito teie, e buka atoa râ no teie tau.

Eric: Eaha ta oe e hinaaro ra e parau?

Brian: A hi‘o na. Ua faufaahia te taata i te mau aratairaa Bibilia i te mau matahiti i papaihia te reira, oia atoa râ i teie tau.

Ua faufaahia te taata i te mau aratairaa Bibilia i te mau matahiti i papaihia te reira, oia atoa râ i teie tau

Eric: A?

Brian: E, i roto i te mau tuhaa mai teie te huru, e nafea ia faaite i te mana‘o maitai no nia i te moni, e nafea ia oaoa to tatou utuafare aore ra ia riro ei hoa maitai. E nehenehe te mau aratairaa Bibilia e tauturu mai. E au te Parau a te Atua i te hoê hoho‘a fenua e aratai i te oaoa mau. Ei hi‘oraa, e ere i te mea ohie ia riro ei tane e ei upoo utuafare maitai i teie tau.

Eric: Oia iho â. Hoê noa matahiti vau i te faaipoiporaahia. E ere i te mea ohie ia afaro noa i te mau mahana atoa.

Brian: Parau mau. Te vai ra râ te mau aratairaa Bibilia ohie e te papu. A hi‘o na i te Ephesia pene 5, te irava 22, 23 e 28. E taio ana‘e i tera mau irava.

Eric: Na reira. Te na ô ra: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia, e o te ora hoi oia o te tino ra.” Irava 28: “E aroha atoa te mau tane i ta ratou iho mau vahine e tia ’i mai ta ratou i aroha i to ratou iho tino ra. O tei aroha i tana iho vahine ua aroha ïa ia ’na iho.”

Brian: Mauruuru. E oaoa anei te utuafare ia haapao na hoa faaipoipo i teie a‘oraa ohie?

Eric: Mana‘o ana‘e vau, e. E ere râ i te mea ohie.

Brian: Parau mau, e taata tia ore tatou paatoa. No reira te tahi atu irava i roto i tera pene e faaitoito mai ai ia faaite i te mana‘o tano noa. * E titauhia ïa ia tâu‘a i te mana‘o o vetahi ê e ia haapao i to te tahi e te tahi hinaaro. Ua ite mâua ta ’u vahine, e nehenehe te Bibilia e tauturu mai ia na reira.

Eric: No reira iho â ïa oe e parau ai, e buka no teie tau atoa te Bibilia.

Brian: I roto i te mau papai a te mau Ite no Iehova, e nehenehe e ite i te mau a‘oraa maitai no te feia faaipoipo e te mau metua. E nehenehe atoa e rave mai i te reira i nia i ta matou reni. Mai te peu e taime to oe, e faaite atu vau i te nehenehe e rave mai i nia iho.

Eric: Na reira.

Brian: Maitai roa ïa. E patapata oe, www.jw.org. Teie ta oe e ite na mua.

Eric: Mea au roa te mau hoho‘a.

Brian: Te faaite ra te reira i ta matou ohipa pororaa na te ao taatoa nei. Na mua, e pata oe i nia  “Papai” e muri iho “Vea”. E nehenehe oe e ite i te vea A ara mai na! E pinepine, te vai ra te mau tumu parau e tauturu i te feia faaipoipo ia ite e nafea i mua i tera e tera fifi. E hi‘o ana‘e i te vea A ara mai na! Me-Tiunu 2014. I roto i te tapura tumu parau, te vai ra “Tauturu no te utuafare: Ua inoino anei oe i to hoa faaipoipo?

Eric: Mea anaanatae roa tera tumu parau.

Brian: I roto, te faaitehia ra pae mana‘o tauturu no te faaafaro i tera fifi. A hi‘o na i te omuaraa o teie paratarafa, e nehenehe anei oe e taio?

Eric: Na reira. Te na ô ra: “Aita orua i hinaaro ia mauiui te tahi, e tupu iho â râ te reira.” Parau mau roa.

Brian: Mauruuru no te taioraa. Te faahitihia ra te tahi irava Bibilia. Teie ta ’u Bibilia, e nehenehe anei oe e taio?

Eric: E. Ephesia 4:32: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.”

Brian: Ei tane e ei vahine faaipoipo, e ere anei tera ta orua e hinaaro ia rave te tahi i nia i te tahi?

Eric: Aita vau e taa maitai ra.

Brian: Ia rave ta oe vahine i te tahi mea ua inoino oe, e hinaaro oe ia tatarahapa ’tu oia. I reira oe e faaore ai i ta ’na hapa. O ’na ana‘e tei inoino, ia na reira atoa ïa oe, e ere anei?

Eric: Oia mau, mea tano roa ïa.

Brian: I to oe mana‘o, e oaoa mau anei te tane e te vahine faaipoipo ia haapao raua toopiti i tera a‘oraa Bibilia?

Eric: Mana‘o ana‘e vau, e.

Brian: Tera te tahi o te mau irava Bibilia tei papaihia a 2 000 matahiti a‘enei. Mea maitai no te tane e no te vahine e e mau a‘oraa papu tera. Ma te haapao i te reira, e oaoa mau tatou. Ia hinaaro na hoa faaipoipo ia oaoa, mea faufaa roa ia faaore i te hapa a te tahi e te tahi.

Eric: Mea rahi ïa ta tatou e nehenehe e haapii mai i te Bibilia i ta ’u i mana‘o na.

Brian: Oaoa roa vau i tena parau ta oe, Eric. E hinaaro vau e ho‘i mai no te ite i to oe mana‘o i na ravea tauturu e pae o te vea ta tâua i rave mai i nia i ta matou reni. *

Eric: Na reira. E hi‘opoa mâua ta ’u vahine i te reira.

E uiraa ê anei ta oe no nia i te tahi tumu parau Bibilia? E hinaaro anei oe e ite atu â i te mau tiaturiraa a te mau Ite no Iehova? Mai te peu e e, eiaha e taiâ i te ui atu. E oaoa roa ratou i te aparau e oe.

^ par. 43 A hi‘o i te Ephesia 5:17.

No te ite atu â

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?