Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2015

 UA TAUI TE BIBILIA I TO ’U ORARAA

Ua pahonohia ta ’u mau uiraa maoti te Bibilia

Ua pahonohia ta ’u mau uiraa maoti te Bibilia
  • MATAHITI FANAURAA: 1987

  • FENUA: AZERBAÏDJAN

  • AAMU: PAPA MAHOMETA E MAMA ATI IUDA

NA MUA ’‘E:

E piti noa mâua tamarii, o vau te hopea e ua fanauhia vau i Bakou i Azerbaïdjan. E Mahometa to ’u metua tane, e to ’u mama e ati Iuda. Mea here roa râ raua ia raua e ua farii te tahi i ta te tahi atu tiaturiraa. E turu mama ia papa ia hi‘opoa oia i te oroa Ramadan e e turu papa ia mama ia faatupu oia i te oroa Pasa. I te fare, te vai ra te buka a te mau Mahometa (Coran), te buka Ture a te mau ati Iuda (Torah) e te Bibilia.

No ’u e Mahometa vau. Ua tiaturi vau i te Atua, mea rahi râ ta ’u mau uiraa. ‘No te aha te Atua i hamani ai i te taata? No te aha oia i opua ’i ia roohia te taata i te ati e ia haamauiuihia oia e a muri noa ’tu i roto i te po auahi?’ Ia au i te taata, e tupu te mau mea atoa i te hinaaro o te Atua. I feruri na ïa vau, ‘mea au anei ïa na te Atua ia hi‘o i te taata ia mauiui?’

I te 12raa o to ’u matahiti, ua haamata vau i te faahiti i te mau mahana atoa i na pure e pae a te mau Mahometa parauhia namaz. Ua afai papa ia mâua to ’u tuahine i te fare haapiiraa ati Iuda. Mea rahi ta mâua i haapii, mai ta ratou mau peu tutuu e te reo Hebera. I te mau mahana atoa, na mua ’‘e te haapiiraa e haamata ’i, e tia ia pure mâua ia au i te peu tutuu a te mau ati Iuda. I te poipoi, faaoti au i te pure namaz i te fare e muri a‘e, e tahoê au i te mau ati Iuda no te pure i te fare haapiiraa.

Ua imi au i te pahonoraa tano i ta ’u mau uiraa. Ehia taime to ’u aniraa i te mau orometua ati Iuda i te fare haapiiraa: “No te aha te Atua i hamani ai i te taata? E Mahometa to ’u papa, eaha ïa to te Atua mana‘o ia ’na? Noa ’tu e taata maitai to ’u papa, no te aha e parauhia ’i e mea viivii oia e no te aha te Atua i hamani ai ia ’na?” No ’u e ere roa ’tu ta ratou pahonoraa i te mea tano e aita vau i mauruuru i te reira.

UA TAUI TE BIBILIA I TO ’U ORARAA:

I 2002, aita vau i tiaturi faahou i te Atua. Hoê noa hebedoma i muri a‘e to matou taeraa i Heremani, ua mutu te tahi uaua i roto i te roro o to ’u  papa e ua moe to ’na hiroa. Ehia matahiti to ’u pure-noa-raa ia fana‘o to ’u utuafare i te ea maitai e te oaoa. I papu na hoi au e no ǒ mai ana‘e i te Atua Mana hope te ora. I te mau mahana atoa, ua taparu vau ia ara mai to ’u papa. I mana‘o na vau: ‘Mea ohie roa no te Atua ia faatupu i te aniraa a te tahi tamahine iti haavare ore.’ Ua tiaturi mau vau e faaroo mai oia i ta ’u mau taparuraa, ua pohe râ papa.

Ua inoino e ua hepohepo roa vau, aita hoi te Atua i tâu‘a mai. Ua feruri au, ‘ua hape paha ta ’u pure aore ra e ere te Atua i te mea mau.’ Aita vau i taa faahou eaha te rave e aita atoa i tia ia faahiti i te pure namaz. No ’u, aita e auraa te tahi atu mau haapaoraa, faaoti atura vau aita e Atua.

E ono ava‘e i muri a‘e, ua patoto mai te mau Ite no Iehova i te opani. E ere mâua to ’u tuahine i te mea tâu‘a roa i te feia e tiaturi ra ia Iesu Mesia. Ma te faatura râ, ua hinaaro mâua e faaite ua hape ta ratou mau haapiiraa. Ua ani atu mâua: “I roto na Ture Ahuru, ua opanihia ia haamori ia Iesu, te satauro, Maria e te tahi atu mau idolo. No te aha ïa outou te mau Kerisetiano e na reira ’i?” Ua faaite mai na Ite i te mau haapapuraa Bibilia e opani ra i te Kerisetiano mau ia haamori i te mau idolo. Ua faataa atoa mai e tia ia pure i te Atua ana‘e. Ua maere roa vau!

I muri iho, ua ani mâua: “E te Toru tahi. Ahani pai o Iesu te Atua, e nehenehe anei o ’na e ora i i te fenua nei e e taparahihia e te taata?” Ma te faaohipa â i te Bibilia, ua faataa mai raua e ere o Iesu te Atua e aita atoa oia i aifaito ia ’Na. Ua faaite mai raua tera te tumu eita te mau Ite no Iehova e farii i te haapiiraa o te Toru tahi. Ua maere roa vau e ua mana‘o, ‘Mea taa ê roa te huru o teie mau Kerisetiano.’

Ua hinaaro noa â vau e ite no te aha te taata e pohe ai e eaha te tumu e vaiiho ai te Atua i te mauiui ia tupu. Ua faaite mai raua i te buka Te ite e aratai i te ora mure ore. * I roto, e pene taatoa tei pahono i ta ’u mau uiraa. I tera iho â taime, ua haamata raua i ta ’u haapiiraa Bibilia.

I te roaraa o ta ’u haapiiraa, ua putapû roa vau i te mau pahonoraa Bibilia. Ua haapii au o Iehova te i‘oa o te Atua e e Atua here oia. (Salamo 83:18; Ioane 1, 4:8) Ua hinaaro e horoa i te ora e no reira oia i hamani ai i te taata. Ua taa atoa ia ’u noa ’tu te vaiiho ra te Atua ia tupu te mau ohipa iino, mea au ore na ’na te reira e fatata oia i te faaore roa i te ino e a muri noa ’tu. Ua haapii au, no te orureraa hau a Adamu raua Eva i ino roa ’i te huitaata. (Roma 5:12) E mau faahopearaa peapea mau te itehia, mai te pohe o te feia herehia, mai ia papa. E faaore râ te Atua i tera mau ati i roto i te ao apî, i reira hoi te feia pohe e tia faahou mai ai.—Ohipa 24:15.

Ua pahonohia ta ’u mau uiraa maoti te Bibilia. Ua tiaturi faahou vau i te Atua e ua haamatau i te mau Ite no Iehova. Ite a‘era vau, e fetii taeae ana‘e ratou na te ao nei. Ua putapû roa vau i to ratou auhoêraa e here. (Ioane 13:34, 35) Ua turai mai ta ’u i haapii no nia ia Iehova ia tavini ia ’na, faaoti a‘era vau i te riro ei Ite no Iehova. Ua bapetizohia vau i te 8 no Tenuare 2005.

TO ’U FAUFAARAAHIA:

Ua noaa ia ’u te mana‘o maitai i te oraraa nei maoti te mau faataaraa au maite a te Bibilia. Ua fana‘o vau i te hau o te feruriraa maoti te mau pahonoraa papu e vai ra i roto i te Parau a te Atua. Te oaoa mau nei au e te ite atoa ra i te tamahanahanaraa i roto i te tiaturiraa Bibilia o te tia-faahou-raa. Mai tei fafauhia, e farerei faahou vau ia papa.—Ioane 5:28, 29.

A ono matahiti a‘enei, ua faaipoipo vau i ta ’u tane o Jonathan, e tavini atoa no te Atua. Ua haapii mâua toopiti i te parau mau no nia i te Atua. Mea au maite, ohie ia taa e faufaa atoa râ te reira. Tera te tumu mea au na mâua ia faaite ia vetahi ê no te aha mâua i tiaturi ai i te Atua e eaha to mâua tiaturiraa no a muri a‘e. I teie nei, ua papu ia ’u e ere te huru o te mau Ite no Iehova tei taa ê, o ratou râ te mau Kerisetiano mau.

^ par. 15 Piahia e te mau Ite no Iehova, aita râ i nenei-faahou-hia.

No te ite atu â

Eaha te parau mau no nia i te Atua?

Te mana‘o ra anei oe e te tâu‘a maira te Atua ia oe? A haapii no nia i to ’na huru e e nafea ia haafatata ’tu ia ’na.

Eaha te opuaraa a te Atua no te fenua?

Te faataa ra te Bibilia no te aha te Atua i poiete ai i te fenua, afea te mauiui e ore ai, eaha te a muri a‘e o te fenua, e o vai te ora i reira.