Ruta 1:1-22
1 I te mau mahana i haava ˈi te mau tavana,+ e oˈe tei tupu i Iseraela. Haere maira te hoê tane no Betelehema+ i Iuda e faaea ei taata ê i te tuhaa fenua o Moabi,+ o ˈna e ta ˈna vahine faaipoipo e ta ˈna na tamaiti e piti.
2 O Elimeleka* te iˈoa o te tane, o Naomi* te iˈoa o ta ˈna vahine faaipoipo, e o Malona* raua Kiliona* te iˈoa o ta ˈna na tamaiti e piti. No Epherata ratou no Betelehema i Iuda. E ua haere mai ratou i te tuhaa fenua o Moabi e ua faaea i reira.
3 I muri aˈe, pohe ihora Elimeleka, te tane faaipoipo a Naomi, e toe noa maira Naomi e ta ˈna na tamaiti e piti.
4 Faaipoipo aˈera na tane i te vahine Moabi, o Oraphe te iˈoa o te hoê, e o Ruta+ te iˈoa o te tahi. Ua faaea ratou i Moabi piri i te hoê ahuru matahiti.
5 Pohe atoa ˈtura na tamaiti e piti, Malona raua Kiliona, e toe noa maira te vahine aita ta ˈna na tamarii e ta ˈna tane faaipoipo faahou.
6 No reira, opua aˈera oia e ta ˈna na hunoa vahine e faarue ia Moabi no te hoˈi i to ˈna fenua, i faaroo na hoi oia e ua haapao faahou Iehova i to ˈna nunaa ma te horoa ˈtu i te maa.*
7 Faarue ihora Naomi i te vahi i ora ˈi oia e ta ˈna na hunoa vahine. A haere noa ˈi ratou na te purumu no te hoˈi i te fenua o Iuda,
8 parau atura Naomi i ta ˈna na hunoa vahine: “A haere, a hoˈi, orua i te fare o to orua na metua vahine. Ia faaite Iehova i te here taiva ore+ ia orua, mai ta orua i na reira i na tane tei pohe e ia ˈu atoa.
9 Ia faafanaˈo Iehova ia orua i te hoê tane faaipoipo e te hoê utuafare.”*+ Apa ihora oia ia raua, e auê aˈera ratou.
10 Te parau noa ra raua ia ˈna: “Eita. E haere râ mâua na muri ia oe i ǒ to oe nunaa.”
11 Tera râ, na ô atura Naomi: “A hoˈi, ta ˈu na tamahine. Eaha hoi orua e haere mai ai na muri ia ˈu? E nehenehe anei au e fanau â i te tamaroa o te riro ei tane faaipoipo na orua?+
12 A hoˈi, ta ˈu na tamahine. A haere, ua ruau roa hoi au no te faaipoipo. Noa ˈtu e itehia ia ˈu te hoê tane i teie po, a hapû atoa ˈtu ai au i te tamaroa,
13 e tiai anei orua ia paari mai raua? E ore anei orua e faaipoipo faahou no raua? Eiaha, ta ˈu na tamahine, mauiui roa vau no orua, no te mea ua faautua Iehova ia ˈu.”+
14 Auê faahou aˈera ratou, apa maira Oraphe i to ˈna metua vahine hoovai e reva ˈtura. O Ruta râ, faaea noa ihora i pihai iho ia ˈna.
15 No reira, na ô atura Naomi: “A hiˈo! Ua hoˈi to taoete vahine* i to ˈna nunaa e to ˈna mau atua. A hoˈi na muri ia ˈna.”
16 Tera râ, na ô maira Ruta: “Eiaha oe e onoono ia ˈu ia faarue ia oe, ia ore e apee ia oe. I te vahi hoi e haere ai oe, e haere atoa vau, e i te vahi e taoto ai oe, e taoto atoa vau. To oe nunaa, to ˈu atoa ïa nunaa, e to oe Atua, to ˈu atoa ïa Atua.+
17 I te vahi e pohe ai oe, e pohe atoa vau, e i reira vau e hunahia ˈi. Ia faautua rahi mai Iehova ia ˈu, mai te peu e ere na te pohe e faataa ê ia tâua.”
18 I to Naomi iteraa e te onoono ra Ruta i te haere na muri ia ˈna, faaea ˈtura oia i te taparuparu ia ˈna.
19 E haere noa ˈtura raua e tae roa ˈtu i Betelehema.+ I to raua iho â taeraa ˈtu i Betelehema, arepurepu aˈera to te oire taatoa ia raua, e te na ô ra te tahi mau vahine: “O Naomi teie?”
20 E parau oia i taua mau vahine ra: “Eiaha e pii ia ˈu Naomi.* A pii ia ˈu Mara,* ua faariro hoi te Manahope i to ˈu oraraa ei mea mauiui roa.+
21 Mea navai maitai au i to ˈu haereraa, ua faahoˈi mai râ Iehova ia ˈu aita hoê aˈe faufaa. Eaha hoi outou e pii ai ia ˈu Naomi, o Iehova hoi tei faautua ia ˈu e o te Manahope tei tairi ia ˈu i te ati?”+
22 Mai tera to Naomi hoˈiraa na te tuhaa fenua o Moabi mai,+ raua Ruta ta ˈna hunoa vahine ati Moabi. Ua tae mai raua i Betelehema i te haamataraa o te ootiraa kerite.+
Nota i raro i te api
^ “E Arii to ˈu Atua” te auraa.
^ “To ˈu nehenehe” te auraa.
^ No roto mai paha i te Hebera “Paruparuhia,” “Maˈihia” te auraa.
^ “Tei rohirohi ra,” “Tei pohe ra” te auraa.
^ Heb: “faraoa.”
^ Heb: “te hoê vahi hau.”
^ Heb: “taoete vahine ivi.”
^ “To ˈu nehenehe” te auraa.
^ “Mauiui” te auraa.
