Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2013

A haa ia au i ta Iesu pure î i te here

A haa ia au i ta Iesu pure î i te here

“E tau Metua, . . . a haamaitai i to Tamaiti, ia haamaitai atoa hoi to Tamaiti ia oe.”—IOA. 17:1.

1, 2. Ua aha Iesu no ta ’na mau aposetolo taiva ore i muri a‘e i te faatupuraa i te oroa Pasa i 33?

TEI te maororaa po tatou o te 14 no Nisana 33. Ua oaoa Iesu e to ’na mau hoa i te faatupu i te oroa Pasa o tei haamana‘o atu mea nafea te Atua i te faaoraraa i to ratou tupuna i te faatîtîraa i Aiphiti. E ite râ ta ’na mau pǐpǐ taiva ore i te hoê ‘faaoraraa mure ore’ rahi a‘e. I to muri iho mahana, ua haapohehia to ratou Aratai tia roa e to ’na mau enemi. Ua riro râ teie ohipa ino mau ei haamaitairaa. E faaorahia te huitaata i te hara e te pohe maoti te toto o Iesu.—Heb. 9:12-14.

2 Ia ore e moe ia tatou teie faanahoraa î i te here, ua haamau Iesu i te hoê oroa apî tamatahiti o tei mono i te oroa Pasa. Ua na reira o ’na ma te ofati i te faraoa hopue ore a horoa ’tu ai i ta ’na na aposetolo taiva ore 11 e ua parau atu: “O tau tino teie e horoahia na outou nei, e na reira outou ei mana‘oraa ia ’u.” Ua na reira atoa oia e te au‘a uaina uteute a na ô atu ai: “Teie nei au‘a, o te faufaa apî ïa i to ’u nei toto, e haamaniihia no outou nei.”—Luka 22:19, 20.

3. (a) Eaha te tauiraa rahi tei tupu i muri a‘e i to Iesu poheraa? (b) Eaha te uiui no nia i te pure a Iesu i roto i te Ioane pene 17?

3 Fatata te faufaa o te Ture i rotopu i te Atua e te mau Iseraela pae tino i te hope. E monohia te reira e te hoê faufaa apî i rotopu ia Iehova e ta Iesu mau pǐpǐ faatavaihia. Aita Iesu i hinaaro ia riro ta ’na mau pǐpǐ mai te nunaa Iseraela. Ua amahamaha roa hoi to Iseraela i te pae faaroo e totiare. E ua faaino te reira i to te Atua i‘oa mo‘a. (Ioa. 7:45-49; Ohi. 23:6-9) Ua hinaaro râ Iesu ia vai hoê noa  ta ’na mau pǐpǐ ia ohipa amui ratou no te faahanahana i to te Atua i‘oa. Ua aha ïa Iesu? Ua pûpû o ’na i te pure nehenehe roa ’‘e tei ore i taiohia a‘enei. (Ioa. 17:1-26; a hi‘o i te hoho‘a matamua.) E hi‘opoa ana‘e ïa ia tatou iho a uiui atu ai: “Ua pahono anei te Atua i ta Iesu pure? Te ohipa ra anei au ia au i te reira?”

TE MAU MEA FAUFAA A‘E NO IESU

4, 5. (a) Eaha ta te omuaraa o ta Iesu pure e haapii maira? (b) Mea nafea Iehova i te pahonoraa i ta Iesu i ani no ’na iho?

4 I te maororaa po, ua haapii Iesu i te mau mea faahiahia mau i ta ’na mau pǐpǐ. Hi‘o a‘era Iesu i te ra‘i a pure atu ai: “E tau Metua, ua tae i te hora; a haamaitai i to Tamaiti, ia haamaitai atoa hoi to Tamaiti ia oe. Ua horoa mai hoi oe i te mana no ’na i te taata atoa nei, ia horoa ’tu oia i te ora mure ore i te feia atoa ta oe i horoa mai no ’na ra. . . . Ua haamaitai au ia oe i te ao nei; ua oti ia ’u te ohipa ta oe i ho mai na ’u e rave ra. E teie nei, e tau Metua, e haamaitai mai oe ia ’u i mua i to aro na i te maitai no ’u ia oe hou teie nei ao.”—Ioa. 17:1-5.

5 A hi‘o na i roto i te omuaraa o ta Iesu pure eaha te mau mea faufaa a‘e no ’na. Ta ’na tapitapiraa matamua, o te faahanahanaraa ïa i to ’na Metua i te ra‘i. O ta ’na atoa i ani na mua i roto i ta ’na pure tuiroo: “E to matou Metua . . . , ia raa [aore ra mo‘a] to oe i‘oa.” (Luka 11:2) Te piti o ta ’na aniraa, no ta ’na ïa mau pǐpǐ. Oia hoi ‘ia horoa ’tu o ’Na i te ora mure ore.’ I muri iho, ua ani Iesu no ’na iho: “E tau Metua, e haamaitai mai oe ia ’u i mua i to aro na i te maitai no ’u ia oe hou teie nei ao ra.” Aita noa Iehova i horoa i ta Iesu i ani atu, oia atoa râ i ‘te i‘oa i hau ê i te maitai’ i to te mau melahi atoa.—Heb. 1:4.

TE ITERAA I TE ATUA MAU

6. (a) Ia aha te mau aposetolo no te fana‘o i te ora mure ore? (b) Mea nafea tatou i ite ai e ua naea ia ratou tera fa?

6 A pure ai, ua faahiti atoa Iesu i tei titauhia ia rave tatou ei taata hara no te fana‘o i te ô horoa noa o te ora mure ore. (A taio i te Ioane 17:3.) Ua na ô oia e mea tia ia tamau i te “ite” i te Atua e te Mesia. E nafea? A tahi, ma te rave i tei nehenehe no te haapii atu â no nia ia Iehova e i ta ’na Tamaiti. Te piti, ma te faaohipa i ta tatou i haapii mai. Ua na reira te mau aposetolo. O ta Iesu ïa i haapapu i roto i ta ’na pure: “Na oe i tuu mai ia ’u i te parau ta ’u i tuu a‘e ia ratou nei ra; e ua farii ratou i taua parau ra.” (Ioa. 17:8) No te fana‘o râ i te ora mure ore, e mea tia ia tamau ratou i te feruri maite i ta te Atua mau parau a faaohipa ’tu ai i te reira i roto i to ratou oraraa. Ua na reira anei te mau aposetolo taiva ore e tae roa ’tu i te hopea? E. Ua ite tatou i te reira no te mea ua tapao-roa-hia to ratou i‘oa i nia i na ofai niu 12 o te Ierusalema apî i te ra‘i.—Apo. 21:14.

7. Eaha te auraa e “ite” i te Atua, e no te aha mea faufaa roa ’i te reira?

7 Ia au i te mau aivanaa o te reo Heleni, e nehenehe te parau ‘ite ia oe’ e hurihia ei “tamau i te ite.” Mea faufaa na parau e piti no te taa maitai i te auraa. Te ‘iteraa i te Atua,’ o te tamauraa ïa i te ite atu â no nia ia ’na. E ere râ i te ite-noa-raa i to ’na mau huru maitatai e ta ’na opuaraa. E titau-atoa-hia ia here ia ’na e i to tatou mau hoa haamori. Te faataa ra te Bibilia: “O tei ore i  aroha ra, aore ïa i ite i te Atua.” (Ioa. 1, 4:8) Te iteraa i te Atua, o te faaroo-atoa-raa ïa ia ’na. (A taio i te Ioane 1, 2:3-5.) E fana‘oraa taa ê mau â teie! E nehenehe râ tatou e ere i tera taairaa faufaa mau, mai ia Iuda Isakariota. E faaitoito ana‘e ïa i te haapaari i to tatou taairaa e o Iehova. E fana‘o tatou i te ô horoa noa o te ora mure ore a na reira ’i.—Mat. 24:13.

TO IEHOVA I‘OA

8, 9. (a) Eaha ta Iesu tapitapiraa matamua i te roaraa o ta ’na taviniraa i te fenua nei? (b) Eaha te mau haapiiraa ta Iesu i patoi atu?

8 I muri a‘e i te taioraa i ta Iesu pure i roto i te Ioane pene 17, e ite papu tatou i to Iesu here rahi i ta ’na mau aposetolo i to ’na ra tau e i te feia atoa e riro mai ei pǐpǐ na ’na. (Ioa. 17:20) Ia taa atoa râ ia tatou e e ere to tatou ora ta Iesu tapitapiraa matamua. I te roaraa o ta ’na taviniraa i te fenua nei, ua ohipa oia na mua roa no te haamo‘a e te faahanahana i te i‘oa o to ’na Metua. Ei hi‘oraa, a faaite ai i ta ’na ohipa faauehia i roto i te sunago i Nazareta, ua taio Iesu i te otaro a Isaia: “Tei nia iho ia ’u te [v]arua o te Fatu, oia i faatahinu mai ia ’u ei poro haere i te parau maitai i te taata rii.” Aita e hape e ua faahiti Iesu i to te Atua i‘oa a taio ai i te reira.—Luka 4:16-21. *

9 Na mua roa ’‘e Iesu e haere mai ai i te fenua, i haapii na te mau tia faaroo i te nunaa eiaha e faaohipa i to te Atua i‘oa. Mea papu e ua patoi roa ’tu Iesu i tera tutuu o te ore e tu ra i te mau Papai. Ua parau oia i te feia e patoi ra ia ’na: “I haere mai nei au ma te i‘oa o tau Metua, e aore outou i ite mai ia ’u; ia haere mai râ te tahi ma to ’na iho i‘oa, e ite outou i te reira.” (Ioa. 5:43) Tau mahana atoa hou Iesu a pohe ai, ua faaite â o ’na eaha te mea faufaa a‘e no ’na ma te pure: “E tau Metua, e haamaitai i to i‘oa.” (Ioa. 12:28) Eiaha ïa e maere e ua  faahiti atoa Iesu i tera tapitapiraa no te i‘oa o to ’na Metua i roto i te pure ta tatou e hi‘opoa nei.

10, 11. (a) Mea nafea Iesu i te faaiteraa i te i‘oa o to ’na Metua? (b) Eaha te fa a te mau pǐpǐ a Iesu?

10 Ua pure Iesu: “Ua faaite atu vau i to i‘oa i te mau taata o teie nei ao ta oe i ho mai no ’u ra. No oe na hoi ratou; e na oe hoi ratou i ho mai no ’u; e ua haapao ratou i ta oe parau. Ua ore au ua parahi i teie nei ao; e tia râ ratou i teie nei ao, e te haere atu nei au ia oe na. E tau Metua Mo‘a ra e, e tiai oe ia ratou i ta oe i ho mai no ’u i to i‘oa na, Ia hoê a‘e ratou mai ia tâua atoa nei â.”—Ioa. 17:6, 11.

11 Aita Iesu i faaite noa i te i‘oa o to ’na Metua i ta ’na mau pǐpǐ ma te faahiti i tera i‘oa. Ua tauturu atoa râ oia ia ratou ia ite i te mau huru maitatai faahiahia o te Atua e i ta ’na mau haaraa i nia ia tatou. (Exo. 34:5-7) Hau atu â, mai to ’na tiaraa hanahana i nia i te ra‘i, te tauturu noa nei Iesu i ta ’na mau pǐpǐ ia faaite i to Iehova i‘oa e ati a‘e te fenua. Ma teihea fa? Ia haaputuputuhia e rave rahi roa ’tu â pǐpǐ hou a haamouhia ’i teie nei ao ino. Auê ïa i‘oa hanahana to Iehova a faaora ’i oia i to ’na mau ite taiva ore!—Ezk. 36:23.

“IA FAAROO TO TE AO”

12. Eaha na mea e toru faufaa roa te titauhia no te faaoti i te ohipa ta Iesu i haamata?

12 Ei taata, ua tutava Iesu i te tauturu i ta ’na mau pǐpǐ ia haavî i to ratou mau paruparu. Mea faufaa te reira no te rave hope i te ohipa ta Iesu i haamata. Ua pure Iesu: “Mai ia oe i tono mai ia ’u i teie nei ao ra, ua tono atoa ’tu hoi au ia ratou i teie nei ao.” No te faaoti i tera ohipa faaoraraa, ua faataa Iesu e toru ohipa faufaa roa te titauhia ia rave. A tahi, ua pure oia ia ore ta ’na mau pǐpǐ ia riro i to te ao viivii a Satani. Te piti, ua pure oia ia haamo‘ahia ratou ma te faaohipa i te parau mau o te Parau a te Atua no ratou iho. Te toru, ua taparu noa oia i te Atua ia vai hoê noa ta ’na mau pǐpǐ i roto i te here mai te here e vai ra i rotopu ia ’na e to ’na Metua. E titauhia ïa ia hi‘opoa ia tatou iho. E ui ana‘e, ‘Te ohipa ra anei au ia au i na aniraa e toru a Iesu?’ Ma te faahiti i tera mau mea, ua faaite Iesu e ua papu ia ’na e ‘e faaroo to te ao e na Iehova i tono ia ’na.’—A taio i te Ioane 17:15-21.

 

Ua pee te mau Kerisetiano matamua i te aratairaa a te varua mo‘a no te vai hoê noa (A hi‘o i te paratarafa 13)

13. Mea nafea te pure a Iesu i te pahonoraahia i te senekele matamua?

13 Ua pahonohia ta Iesu pure. Tei itehia ïa a hi‘opoa ’i i te buka Ohipa. I taiohia na i rotopu i te mau Kerisetiano matamua te ati Iuda e te Etene, te feia ona e veve, te mau tavini e te mau fatu. A feruri na i te mau amahamaharaa te nehenehe e tupu! Mea tahoê râ ratou. No reira ratou i faaauhia ’i i te mau tuhaa taa ê o te hoê tino taata e o Iesu te upoo. (Eph. 4:15, 16) Auê ïa ohipa faahiahia mau i roto i te ao amahamaha a Satani! Mauruuru ia Iehova. Maoti hoi te ohipa a to ’na varua mo‘a puai mau i tupu ai te reira.—Kor. 1, 3:5-7.

 

Mea tahoê te nunaa o Iehova na te ao atoa (A hi‘o i te paratarafa 14)

14. Mea nafea te pure a Iesu i te pahonoraahia i teie nei tau?

14 A pohe ai râ te mau aposetolo, aita e auhoêraa faahou. Mai tei tohuhia, ua haamata te hoê ohipa apotata rahi. Ua ô te mau haapiiraa hape i roto i te amuiraa e ua amahamaha ’tura. (Ohi. 20:29, 30) I 1919 râ, ua faatiamâ Iesu i ta ’na mau pǐpǐ faatavaihia i te haapaoraa hape e ua  haaputuputu atu i roto i te hoê “tatua nehenehe roa.” (Kol. 3:14) Eaha te faahopearaa o ta ratou ohipa pororaa? Ua hau atu i te hitu mirioni “mamoe ê atu” no ‘te mau fenua, opu, nunaa e reo atoa’ tei tahoêhia e te mau Kerisetiano faatavaihia i roto i te hoê nǎnǎ. (Ioa. 10:16; Apo. 7:9) E pahonoraa faahiahia mau â teie i ta Iesu pure ia Iehova: “Ia ite to te ao e na oe au i tono mai, e ua here mai oe ia ratou mai ia oe e here mai ia ’u nei.”—Ioa. 17:23.

PARAU FAAOTIRAA PUTAPÛ MAU

15. Eaha te aniraa taa ê a Iesu no ta ’na mau pǐpǐ faatavaihia?

15 I te po o te 14 no Nisana, ua horoa Iesu i ta ’na mau aposetolo te fana‘oraa taa ê e faatere e o ’na i roto i to ’na Basileia ma te faaau atu i te hoê faufaa. (Luka 22:28-30; Ioa. 17:22) Te pure ra Iesu i teie nei no te feia atoa o te riro mai ei pǐpǐ faatavaihia na ’na: “E tau Metua e, ua hinaaro vau i te feia ta oe i ho mai no ’u ra, ei pihai atoa iho ia ’u i te vahi e parahi ai au ra, ia hi‘o mai ratou i to ’u hinuhinu i ta oe i ho mai no ’u ra; ua here mai na hoi oe ia ’u hou te fenua i hamanihia ’i.” (Ioa. 17:24) Aita te mau mamoe ê atu a Iesu e feii ra, te oaoa nei râ. E haapapu â te reira i te auhoêraa o te mau Kerisetiano mau atoa e ora nei.

16, 17. (a) Eaha te faaotiraa papu ta Iesu i faahiti i te pae hopea o ta ’na pure? (b) Eaha ta tatou e faaoti papu e rave?

16 Turaihia e to ratou mau tia faaroo, ua maiti te rahiraa o te taata i te tâu‘a ore i te haapapuraa e e nunaa tahoê to Iehova o tei ite mau o vai ra o ’na. Hoê â huru i te tau o Iesu. No reira o ’na i faaoti ai i ta ’na pure ma teie mau parau putapû mau: “E tau Metua parau-tia e, aore â hoi to te ao i ite ia oe, ua ite râ vau ia oe; e ua ite hoi ratou nei e na oe au i tono mai. E ua faaite atu hoi au ia ratou, e e faaite atu â vau, i to oe i‘oa, ia herehia mai ratou i to hereraa mai ia ’u nei ra, e o vau hoi e parahi i roto ia ratou.”—Ioa. 17:25, 26.

17 O vai te nehenehe e patoi e ua haa Iesu ia au i ta ’na pure? Ei Upoo o te amuiraa, te tauturu noa nei oia ia tatou ia faaite i te i‘oa o to ’na Metua e i ta ’Na opuaraa. E auraro noa ana‘e i ta ’na aratairaa ma te poro e te faariro i te taata ei pǐpǐ ma te itoito rahi. (Mat. 28:19, 20; Ohi. 10:42) E faaitoito atoa ana‘e i te vai hoê noa ei nunaa o te Atua. E haa ïa tatou ia au i ta Iesu pure, e faahanahanahia te i‘oa o Iehova e e oaoa tatou e a muri noa ’tu.

^ par. 8 I roto i te Luka 4:18, ua taio Iesu i te Isaia 61:1 o te faaohipa ra i to te Atua i‘oa o Iehova.