Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2013

Ua horoa ratou ia ratou iho i Philipino

Ua horoa ratou ia ratou iho i Philipino

A AHURU matahiti a‘enei, e pionie Gregorio e Marilou i Manille. I ohipa atoa na teie na hoa faaipoipo, e 30 tiahapa matahiti to raua i tera tau, i te taime taatoa. E ere i te mea ohie, ua tia râ ia raua. Nominohia ’tura Marilou ei tia faatere o te fare moni i reira o ’na e ohipa ’i. “Maoti ta mâua ohipa maitai, e oraraa fana‘o mau to mâua,” ta Marilou ïa e faaite ra. Aita e haapeapearaa i te pae moni, faaoti ihora raua e patu i te fare ta raua i hinaaro noa na i te hoê vahi au mau fatata 19 kilometera i te pae hitia o te râ o Manille. Ua tihepu raua i te hoê taiete hamani fare e ua faanaho e aufau i te reira 10 matahiti i te maoro.

“NO ’U, TE EIÂ RA VAU IA IEHOVA”

Te na ô ra Marilou: “I titau na ta ’u ohipa apî i te taime rahi e i to ’u puai. Ua iti roa mai ïa to ’u itoito rahi no te mau ohipa Kerisetiano. No ’u, te eiâ ra vau ia Iehova. Aita hoi i tia faahou ia ’u ia horoa ’tu i te taime ta ’u i faataa na no ta ’na taviniraa.” Aita Gregorio e Marilou i mauruuru i tera tupuraa. I te hoê mahana, ua parahi raua e ua aparau no nia i to raua oraraa. Te na ô ra Gregorio: “Ua  hinaaro mâua e rave i te tahi tauiraa, aita râ i ite eaha râ. I te mea e aita ta mâua e tamarii, ua aparau mâua no nia i te hoê ravea no te tavini atu â ia Iehova. Ua pure mâua ia Iehova ia aratai mai.”

I tera taime, i faaroo na raua e rave rahi oreroraa parau no nia i te taviniraa i te vahi e hinaaro-rahi-hia ra te taata poro i te Basileia. “No mâua, e pahonoraa teie a Iehova i ta mâua mau pure,” ta Gregorio ïa i parau. Ua pure raua ia rahi atu â to raua faaroo no te faaitoito i te rave i te mau faaotiraa maitai. Te tahi fifi rahi, o to raua ïa fare e hamanihia ra. Ua aufau ê na raua i te tino moni no e toru matahiti. Ua aha raua? Te parau ra Marilou: “Ia faaore mâua i te parau faaau, eita te tino moni rahi ta mâua i aufau ê na e faaho‘ihia mai. E mea tia ïa ia maiti e haapao na mua i to Iehova hinaaro aore ra i to mâua mau hinaaro.” Ma te haamana‘o i ta te aposetolo Paulo i parau no nia i te fariiraa i te tahi ohipa ei mea “faufaa ore,” ua faaore raua i te parau faaau o te fare, ua faarue i ta raua ohipa, ua hoo atu i te rahiraa o ta raua mau taihaa e ua haere i te hoê oire iti moemoe i te motu no Palawan, fatata e 480 kilometera i te pae apatoa o Manille.—Phil. 3:8.

UA MAURUURU I TA RAUA E FANA‘O RA

Hou a haere ai, ua faaineine Gregorio e Marilou ia raua ma te faaohie i to raua oraraa. I ǒ noa râ raua i te iteraa i te huru oraraa au noa ta raua e fana‘o. Te na ô ra Marilou: “Ua hitimahuta roa vau. Aita e uira e aita hoê a‘e mea e maitai ai oe i roto i te fare. No te tunu i te raiti, mea haere ïa e tâpûpû i te vahie a tahu atu ai i te auahi. Aita tera matini tunuraa raiti. Ua mihi au i te mau fare toa rarahi, ia haere e tamaa i rapae, e i te mau mea ta ’u i fana‘o na i te oire.” Ua haamana‘o noa râ teie na hoa faaipoipo i te tumu raua i haere ai i ǒ e ua faatano oioi atura i to raua oraraa. Te parau ra Marilou: “I teie nei, te oaoa nei au i te mataitai i te nehenehe o te natura e i te mau fetia. Mea oaoa atoa ia ite i te mata ataata o te taata a poro ai ia ratou. Ua haapii mai mâua i te mauruuru a tavini ai i ǒ nei.”—Phil. 4:12.

“Aita e nehenehe e faaau i te oaoa i te ite e rave rahi taata ia riro ei melo o te amuiraa. Ua papu roa ’tu â ia mâua e mea faufaa to mâua oraraa.”—Gregorio e Marilou

Te faatia ra Gregorio: “E maha noa Ite a haere ai mâua i ǒ. Ua oaoa mau ratou a haamata ’i au i te horoa i te hoê oreroraa parau i te mau hebedoma atoa e a faata‘i ai au i ta ’u tita no te apee i te mau himene o te Basileia.” I roto hoê matahiti, ua ite teie na hoa faaipoipo i teie pǔpǔ iti ia riro mai ei amuiraa ruperupe e 24 taata poro. Te na ô ra Gregorio: “Ua putapû roa mâua i te here ta teie amuiraa i faaite mai.” Ua hau atu i te ono matahiti tei mairi. A haamana‘o ai i ta raua taviniraa i roto i tera tuhaa fenua moemoe, te parau nei raua: “Aita e nehenehe e faaau i te oaoa i te ite e rave rahi taata ia riro ei melo o te amuiraa. Ua  papu roa ’tu â ia mâua e mea faufaa to mâua oraraa.”

“UA TAMATA VAU E UA ITE AU I TE MAITAI O IEHOVA!”

I Philipino, fatata e 3 000 taeae e tuahine tei haere i te tuhaa fenua e hinaaro-rahi-hia ra te taata poro i te Basileia. Fatata e 500 o ratou, e tuahine taa noa ïa. O Karen te tahi.

Karen

Ua paari Karen, e 20 tiahapa matahiti to ’na i teie nei, i Baggao i Cagayan. A taurearea ’i, i mana‘o noa na oia e tavini atu â i te Atua. Te faatia ra Karen: “Mea poto te taime e toe ra e mea faufaa ia faaroo te mau huru taata atoa i te poroi o te Basileia. Ua hinaaro ïa vau e tavini i te vahi e hinaaro-rahi-hia ra te taata poro.” Aita te tahi mau melo o to ’na utuafare i turai ia ’na ia na reira, ua faaitoito atu râ ia haere i te haapiiraa teitei. Noa ’tu râ, ua ani Karen i ta Iehova aratairaa. Ua paraparau atoa i te mau Kerisetiano e tavini ra i te hoê vahi aita e amuiraa. I te 18raa o to ’na matahiti, ua haere oia i te hoê tuhaa fenua moemoe fatata e 60 kilometera i to ’na oire tumu.

Te haapao ra te amuiraa iti ta Karen i apiti atu i te hoê vahi mou‘a i te pae miti Patitifa. Te haamana‘o ra Karen: “No te haere noa i te amuiraa apî mai Baggao atu, i haere avae na matou e toru mahana. I titauhia na ia haapaiuma i te mau mou‘a e ia haapou mai e ia na roto atu i te anavai hau atu i te 30 taime. No te hi‘o i te tahi mau piahi Bibilia, e na avae vau e ono hora a taoto atu ai i ǒ ratou. I to muri iho mahana, e na avae faahou vau e ono hora no te ho‘i i te fare.” Mea hoona anei? “I te tahi taime, e mauiui to ’u avae. Ua faatere râ vau 18 haapiiraa Bibilia. Ua tamata vau e ua ite au i te maitai o Iehova!,” ta Karen ïa i parau ma te mata ataata.—Sal. 34:8.

‘UA HAAPII AU I TE TIATURI IA IEHOVA’

Sukhi

E tuahine Initia taa noa o Sukhi, e 40 tiahapa matahiti, o tei ora na i Marite. Ua haere râ o ’na e faaea i Philipino. No te aha? I 2011, i te hoê tairururaa haaati, ua faaroo o ’na i te uiuiraa mana‘o o na hoa faaipoipo. Ua faatia raua mea nafea raua i te hooraa ’tu i te rahiraa o ta raua mau taihaa no te haere i Mehiko e poro. Te na ô ra Sukhi: “Ua haaferuri mai teie uiuiraa mana‘o ia ’u no nia i te mau fa ta ’u i ore i mana‘o a‘enei.” A faaroo ai e te hinaarohia ra te tauturu no te poro i te feia reo Punjabi i Philipino, ua faaoti o ’na e haere i ǒ. Ua fifihia anei oia?

Te parau ra Sukhi: “Aita vau i mana‘o e mea fifi roa ia faaoti eaha te taihaa e hoo atu e eaha te tapea mai. I muri a‘e i te oraraa ma te au maitai 13 matahiti i roto i to ’u iho fare tahua, ua faaea vau maa taime e te hoê utuafare. E ere i te mea ohie. Ua faaineine maitai râ te reira ia ’u no te hoê  oraraa au noa.” Eaha te mau fifi ta ’na i faaruru a haere ai i Philipino? “Mea riaria roa na ’u te mau manumanu e ua mihi au i to ’u utuafare. Tera te mau mea fifi a‘e no ’u. Ua haapii au i te tiaturi atu â ia Iehova!” Ua hoona anei? Ma te mata ataata, te na ô ra Sukhi: “Te parau maira Iehova, ‘E tamata ia ’u nei, e ninii au i te tao‘a rahi roa ei maitai no outou.’ Ua taa maitai ia ’u i tera mau parau a ani mai ai te hoê taata, ‘E ho‘i faahou mai anei oe? Mea rahi â ta ’u uiraa.’ Ua oaoa e ua mauruuru atu â vau e e nehenehe ta ’u e tauturu i te taata e hiaai ra i te maa pae varua!” (Mal. 3:10) Te na ô faahou ra Sukhi: “Te tuhaa fifi a‘e, o te raveraa ïa i te faaotiraa e haere. I muri a‘e râ i to ’u na reiraraa, mea maere mau ia ite mea nafea Iehova i te aupururaa ia ’u!”

‘UA FAARUE AU I TA ’U OHIPA NOA ’TU TE MǍTA‘U’

Ua faarue Sime, te hoê Kerisetiano faaipoipo fatata e 40 matahiti, ia Philipino no te hoê ohipa aufau-maitai-hia i te hoê fenua i te pae apatoa tooa o te râ o Asia. Ua faaitoito te mau parau a te hoê tiaau haaati e te hoê oreroraa parau a te hoê melo o te Tino aratai ia Sime ia tuu ia Iehova na mua roa. Te na ô ra o ’na: “Ua haapeapea roa vau i te mana‘o e faarue i ta ’u ohipa.” Ua na reira râ o ’na e ua ho‘i i Philipino. I teie mahana, te tavini nei Sime raua ta ’na vahine o Haidee i Davao del Sur, i te pae apatoa o te fenua e hinaarohia ra te taata poro no te haapao i te tufaa fenua rahi mau. Te na ô ra Sime: “A hi‘o ai i muri, auê au i te oaoa i te faarueraa i ta ’u ohipa noa ’tu to ’u mǎta‘u no te tuu ia Iehova na mua roa! Aita ’tu mea mauruuru a‘e i te horoaraa na Iehova i tei maraa ia oe!”

Sime e Haidee

‘E MAURUURU RAHI TA MÂUA I ITE’

E pionie Ramilo e Juliet, na hoa faaipoipo e 30 tiahapa matahiti. A faaroo ai e te hinaaro ra te hoê amuiraa fatata e 30 kilometera i te atea i to raua fare i te tauturu, ua faaoti raua e haere atu. I te mau hebedoma atoa, noa ’tu te ûa e te mahana, e rave Ramilo e Juliet i to raua faurao e piti huira no te haere i te mau putuputuraa e no te poro. E ere i te mea ohie ia haere na nia i te purumu fifi mau e i te e‘aturu faatautauhia, te oaoa nei râ raua i te tavini atu â. Te na ô ra Ramilo: “Te faatere nei mâua ta ’u vahine 11 haapiiraa Bibilia! E titauhia ia rave i te mau haapaeraa no te tavini i te vahi e hinaaro-rahi-hia te tauturu, e mauruuru rahi râ ta mâua i ite!”—Kor. 1, 15:58.

Juliet e Ramilo

Te hinaaro ra anei oe e ite atu â no nia i te taviniraa i te vahi e hinaaro-rahi-hia ra te taata poro i te Basileia i to fenua aore na pihaiiho? A aparau ïa e te tiaau haaati e a taio i te tumu parau “E nehenehe anei outou e ‘fano i Makedonia’?” i roto i Ta tatou taviniraa i te Basileia no Atete 2011.

No te ite atu â

Eaha te haapiiraa faataahia no te mau pionie?

Eaha te haapiiraa taa ê tei faataahia no te feia e poro nei i te Basileia ma te taime taatoa?