“Te maoro, e Iehova, o ta ˈu tiaororaa, e aore oe i faaroo mai! te maoro o ta ˈu pii-hua-raa ˈtu ia oe, e hamani ino teie e vai nei, e aita oe i faaora!” (Habakuka 1:2, 3) O te mau parau ïa a Habakuka teie. E taata maitai oia tei fanaˈo i te farii maitai a te Atua. Te faaite ra anei ta ˈna mau parau e ua ere oia i te faaroo? Aita roa ˈtu! Ua tamahanahana te Atua ia Habakuka ma te parau atu ua faataa Oia i te taime e faaore roa oia i te mauiui.—Habakuka 2:2, 3.

Ia mauiui oe aore ra hoê taata herehia, mea ohie roa ia parau e mea taere roa te Atua aore ra e titauhia ia haa oia i teie nei. Tera râ, te haapapu ra te Bibilia: “E ere Iehova i te mea taere i te faatupu i ta ˈna parau fafau mai ta vetahi e manaˈo ra, mea faaoromai râ oia ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.”—Petero 2, 3:9.

Fatata roa! Ua parau Iesu e ite te hoê uˈi taa maitai i e rave rahi tupuraa o te faaite i te mau mahana hopea o “te faanahonahoraa o te ao nei.” (Mataio 24:3-42) Te tupu ra ta Iesu i tohu i teie mahana. Papu maitai ïa fatata roa te Atua i te haapao i te mau ohipa a te taata. a

E nafea râ te Atua e faaore roa ˈi i te mau mauiui atoa? A ora ˈi i nia i te fenua, ua faaite Iesu i to te Atua puai no te tamahanahana i te huitaata o te mauiui ra. Teie te tahi mau hiˈoraa.

Te mau ati natura: A tere ai na nia i te pahi i te miti no Galilea, ua faaruru Iesu e ta ˈna mau aposetolo i te hoê vero puai o tei nehenehe e faataahuri i to ratou pahi. Ua faaite râ Iesu e mana to ˈna e to to ˈna Metua i nia i te mau puai natura. (Kolosa 1:15, 16) Ua parau noa Iesu: “A faaea! Mamû!” Eaha tei tupu? “Pohe ihora te mataˈi e mania roa ˈtura.”—Mareko 4:35-39.

Te maˈi: Ua ite-maitai-hia e e mana to Iesu no te faaora i te matapo e te pirioi. Oia atoa i te taata tei roohia i te maˈi hopii, te lepera aore ra te tahi atu maˈi. “Faaora ˈtura [oia] i te feia maˈi atoa.”—Mataio 4:23, 24; 8:16; 11:2-5.

Te oˈe: Ua faaohipa Iesu i te puai ta to ˈna Metua i horoa ˈtu no te faarahi mai i te maa. Te parau ra te Bibilia ua horoa oia i te maa na e tausani taata e piti taime i roto i ta ˈna taviniraa.—Mataio 14:14-21; 15:32-38.

Te pohe: Mea papu maitai e mana to Iehova no te faaore roa i te pohe inaha ua faaora Iesu i te taata mai te pohe mai e toru taime. Ua pohe hoê o ratou e maha mahana i te maoro e ua faatia faahou mai Iesu ia ˈna.—Mareko 5:35-42; Luka 7:11-16; Ioane 11:3-44.