A feruri na i nia i te hoê o te mau taairaa piri roa ˈˈe e vai ra i rotopu i te mau taata: te taairaa i rotopu i na maehaa mau. Mea piri roa raua. Ia au i te faatere rahi o te hoê pu maimiraa no nia i te mau maehaa, o Nancy Segal to ˈna iˈoa e e maehaa atoa oia, e nehenehe vetahi maehaa “e faahiti i te hoê manaˈo i te tahi atu e ua taa maitai ia ˈna i te reira noa ˈtu aita i faataahia ˈtu.” Ua parau te hoê vahine eaha te huru taairaa e vai ra i rotopu ia ˈna e to ˈna tuahine maehaa mau: “Ua ite maitai maua ia maua.”

No te aha mea taa maitai ia raua i to raua huru mau? Ia au i te tahi mau hiˈopoaraa, e tauturu mai to raua huru tupuraa e to raua na metua. Hau atu, hoê â ihi tapao tupuna to na maehaa mau. E au ra e na te reira e tauturu roa ˈtu ia raua ia taa i to raua huru mau.

A FERURI NA: Inaha ua poiete te Atua i teie ihi tapao tupuna faahiahia mau, papu maitai ua taa ia ˈna i te huru mau o te taata taitahi. Tera hoi ta te papai salamo o Davida i faataa: “Na oe i tapoˈi ia ˈu i roto i te opu o tau metua vahine ra. To ˈu nei huru, aore ïa i moe ia oe, a hamanihia ˈi au i te vahi moe ra. . . . Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe.” (Salamo 139:13, 15, 16) O te Atua anaˈe o te ite ra e o te taa maitai ra eiaha noa i to tatou ihi tapao tupuna, oia atoa i te mau huru tupuraa atoa o te oraraa tei ohipa i nia i to tatou huru taata. Te haapapu ra te reira e te taa maitai ra te Atua ia tatou i roto i te mau tuhaa rii atoa o to tatou oraraa.

Ua pure o Davida: “E Iehova, ua hiˈopoahia vau e oe e ua itea: ua ite oe i tau parahiraa i raro e tau tiaraa i nia; ua ite oe i to ˈu nei manaˈo i te atea ê ra. E aita roa e parau o roto i tau vaha i toe i te itea-hua-hia e oe, e Iehova.” (Salamo 139:1, 2, 4) Hau atu, te ite ra Iehova i to tatou mau huru aau hohonu roa ˈˈe e “te ite ra oia i te mau manaˈo atoa.” (Paraleipomeno 1, 28:9; Samuela 1, 16:6, 7) Eaha ta teie mau irava e faaite ra no nia i te Atua?

Aita paha tatou e ite e nafea ia faaite i to tatou mau manaˈo e huru aau atoa na roto i te pure. Te haapao nei râ te Atua poiete eiaha noa i te ohipa ta tatou e rave ra, te taa atoa ra oia no te aha tatou e na reira ˈi. Hau atu, te taa ra oia e te hinaaro ra tatou e rave i te mea maitai, noa ˈtu aita tatou e manuïa ra no to tatou mau taotiaraa. Ua poiete te Atua ia tatou ia nehenehe tatou e haafaufaa i te here i roto i to tatou aau. Papu maitai ïa te hinaaro rahi ra te Atua e ite e e taa i to tatou mau manaˈo e hinaaro mau î i te here.—Ioane 1, 4:7-10.

 Te haapapu mai ra te Bibilia

• “Tei nia iho hoi te mata o Iehova i te feia parau-tia, e te faaroo ra to ˈna tariˈa i ta ratou taparuparuraa.”​—PETERO 1, 3:12.

• Te fafau ra te Atua: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.”​—SALAMO 32:8.

A ite ai e te taa ra te Atua i to tatou huru tupuraa e huru aau, te tauturu ra anei te reira ia tatou ia faaruru i te mau fifi? A hiˈo na i tei tupu no Anna, no te fenua Nigéria. Te faataa ra oia: “Ua ui au mea faufaa anei te oraraa inaha mea ino mau te mau tupuraa ta ˈu i faaruru. E vahine ivi au e te haapao ra vau i ta ˈu tamahine iti. Ua tapeahia oia i te fare maˈi no te mea mea rahi te pape i roto i to ˈna roro. I tera taime atoa i itehia ˈi e maˈi mariri ai taata to ˈu. Ua titauhia ia tâpûhia vau e ia rapaauhia e te raau e te hihi. Ua mauiui roa vau no te mea tei te fare maˈi au, oia atoa ta ˈu tamahine iti tei maˈihia.”

Eaha tei tauturu ia Anna ia faaruru i te reira? Te pahono ra oia: “Ua feruriruri au i nia i te mau irava Bibilia mai te Philipi 4:6, 7 o te faaite ra e ‘na te hau o te Atua, tei hau ê i te mau manaˈo atoa, e tiai i to outou aau e feruriraa.’ I te taime atoa e feruri ai au i nia i tera irava, e piri atu â vau ia Iehova. Mea papu ia ˈu e te taa maitai ra oia ia ˈu. Ua fanaˈo atoa vau e rave rahi faaitoitoraa no ô mai i ta ˈu mau taeae e tuahine here o ta ˈu amuiraa Kerisetiano.”

“Noa ˈtu te faaruru noa â ra vau i to ˈu maˈi, ua maitai mai au e ta ˈu tamahine. Inaha tei to tatou pae o Iehova, ua haapii maua ta ˈu tamahine ia ore ia manaˈo ino i mua i te mau tupuraa fifi mau. Te haapapu mai ra te Iakobo 5:11: ‘Te parau nei matou e ia oaoa te feia tei faaoromai tamau. Ua faaroo outou i te faaoromai tamau o Ioba e ua ite outou i ta Iehova i rave e e Atua here [aore ra “aumauiui,” nota i raro aˈe i te api] rahi Iehova e te aroha hamani maitai.’” Ua taa maitai ia Iehova i te huru tupuraa o Ioba. Papu maitai te taa atoa ra oia i te mau fifi atoa ta tatou e faaruru ra.