Eaha to roto?

Tapura tumu parau

“Mea faufaa a‘e outou.”​—MATAIO 10:31

Te ite ra anei te Atua ia oe?

Te ite ra anei te Atua ia oe?

TA TATOU E HAAPII MAI RA MAOTI TE POIETERAA

Mea faufaa roa na 60 minuti matamua o te hoê aiû tei fanau-noa-hia ’tura. No te aha? No te mea i taua taime fifi no te aiû, e faatupu te metua vahine i te hoê niu e te pêpe. Maoti te reira e paari maitai atu â ’i ta ’na tamarii. *

Eaha te turai i te hoê metua vahine ia haapao i ta ’na aiû ma te here? Te faataa ra te aivanaa o Jeannette Crenshaw i roto i te hoê vea e rahi mai te oromona parauhia oxytocine “o te haapuai i te huru aau o te metua vahine i muri a‘e i te fanauraa a tapea ’i oia i ta ’na aiû, a hi‘o ai oia ia ’na e a horoa ’tu ai i to ’na û.” (The Journal of Perinatal Education) Te vai atoa ra te tahi atu oromona i taua taime ra o te “tauturu i te metua vahine ia ite eaha te rave” e o te haapuai i te niu ta ’na e faatupu ra e te aiû. No te aha mea faufaa ia ite i te reira?

Ua poiete to tatou Atua î i te here o Iehova * i te metua vahine ia nehenehe oia e faatupu i tera niu e ta ’na aiû. Ua haapapu te arii Davida e na te Atua i rave ia ’na “mai roto i te opu” e i tamahanahana ia ’na i roto i te rima o to ’na metua vahine. Ua pure oia: “Ua tuuhia ’tu vau ia oe mai tau fanauraa mai â; o tau Atua hoi oe mai te opu mai â o tau metua vahine.”—Salamo 22:9, 10.

A FERURI NA: Mai te peu ua poiete te Atua i teie faanahoraa î i te paari ia papu ia ’na e haapao te hoê metua vahine i ta ’na aiû ma te here e e horoa oia i ta te aiû e hinaaro mau ra, mea papu ïa e te tâu‘a ra te Atua ia tatou, te ‘tamarii na te Atua,’ e ere anei?—Ohipa 17:29.

TA TE BIBILIA E HAAPII MAI RA NO NIA I TO TE ATUA TÂU‘ARAA IA TATOU

Ua ite maitai a‘e Iesu Mesia o vai te Atua poiete e ua haapii atu oia: “E piti manu rii te hoohia i te hoê noa moni veo, e ere anei? Ia mairi noa ’tu râ hoê o ratou i raro, e ite iho â to outou Metua i te reira. Ua taio-pauroa-atoa-hia te rouru o to outou upoo. Eiaha ïa e mǎta‘u. Mea faufaa a‘e outou i te manu rii e rave rahi.”—Mataio 10:29-31.

Mea iti i rotopu ia tatou o te tâu‘a ra i te manu rii taitahi, mea iti atu â ïa tei tapao e ua ‘mairi hoê o ratou i raro.’ Ua ite râ i to tatou Metua i te ra‘i i te manu rii taitahi! No ’na, mea faufaa a‘e te hoê taata i te mau manu, noa ’tu e rave rahi manu. Mea papu ïa te haapiiraa ta tatou e huti mai: “Eiaha ïa e mǎta‘u,” te tâu‘a iho â ra te Atua ia oe. Te haapao maite ra oia ia oe!

Te haapao mau nei te Atua i to tatou maitai e te tâu‘a ra oia ia tatou ma te here

 Te haapapu mai ra te Bibilia

  • “Tei te mau vahi atoa nei to Iehova mata, i te hi‘oraa mai i te ino e te maitai.”—MASELI 15:3.

  • “Tei te feia parau-tia ra to Iehova mata; e tei ta ratou pure to ’na tari‘a.”—SALAMO 34:15.

  • “E oaoa vau, e mauruuru vau i to oe ra aroha; i hi‘o na hoi oe i to ’u atiraa, e ua ite mai oe i tau varua i te mau ati no ’u nei.”—SALAMO 31:7.

“UA MANA‘O VAU AITA IEHOVA E HERE RA IA ’U”

E taui anei to tatou oraraa mai te peu e ite tatou te haapao mau nei te Atua i to tatou maitai e te tâu‘a ra oia ia tatou ma te here? Papu maitai e. O ta Hannah, * no te fenua Beretane i faataa:

“E rave rahi taime, ua mana‘o vau aita Iehova e here ra ia ’u e aita oia e pahono i ta ’u mau pure. No te mea paha ua ere au i te faaroo. Ua mana‘o vau e te faautua ra aore ra te tâu‘a ore ra te Atua ia ’u no te mea mea faufaa ore au. E au ra e aita te Atua i tâu‘a a‘e ia ’u.”

I teie nei râ, aita roa ’tu Hannah e feaa ra no nia i to Iehova here e to ’na tâu‘araa ia ’na. No te aha oia i taui ai i to ’na mana‘o? Te faataa ra oia: “Ua taui mǎrû mai au i to ’u mana‘o. Ua haamana‘o vau i te hoê oreroraa parau Bibilia vauvauhia e rave rahi matahiti i teie nei no nia i te tusia taraehara o Iesu. Ua putapû roa to ’u aau i tera oreroraa parau e ua tauturu mai te reira ia ore e feaa no nia i to Iehova here. E ia pahonohia ta ’u mau pure, pinepine au i te ta‘i no te mea te taa ra ia ’u e te here mau ra Iehova ia ’u. Hau atu, maoti te haapiiraa i te Bibilia e te haereraa i te mau putuputuraa Kerisetiano, ua haapii atu â vau no nia ia Iehova, to ’na huru mau e to ’na mana‘o no nia ia tatou. I teie nei, mea papu ia ’u e te tauturu e te here ra Iehova ia tatou pauroa. Te hinaaro atoa oia e haapao ia tatou taitahi.”

E mau parau faaitoito mau ta Hannah i faahiti, e ere anei? Eaha râ te haapapu mai nei e te taa e te haamana‘o ra te Atua i to oe mau huru aau? E pahonohia mai teie uiraa i roto i to muri iho tumu parau.

^ par. 3 Te vai ra vetahi mau metua vahine o te hepohepo rahi ra i muri noa mai i te fanauraa. Mea fifi no ratou ia faatupu i te niu e ta ratou aiû. Eiaha râ e mana‘o e o ratou te tumu o tera fifi. Ia au i te faanahoraa i Marite no nia i te ea i te pae feruriraa, ua riro te hepohepo rahi i muri noa mai i te fanauraa “ei faahopearaa o e rave rahi tumu i te pae o te ea e o te mau huru aau. Aita râ te reira e tupu no te mea ua rave te metua vahine i te hoê ohipa aore ra aita.” No te ite atu â, a hi‘o i te tumu parau “No te ite eaha te hepohepo rahi i muri noa mai i te fanauraa” o te vea A ara mai na! o te 8 no Tiunu 2003 (Farani).

^ par. 5 O Iehova to te Atua i‘oa i roto i te Bibilia.—Salamo 83:18.

^ par. 15 Ua tauihia te tahi mau i‘oa i roto i teie tumu parau.