Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2013

 TAUTURU NO TE UTUAFARE | NO TE FEIA FAAIPOIPO

E nafea ia ore e mamû noa?

E nafea ia ore e mamû noa?

TE FIFI

E nafea na hoa faaipoipo i euhe e i here i te tahi e te tahi e ore ai e paraparau tau hora aore ra mahana? E na ô paha ïa raua, ‘Mea au tera aita mâua e tatama‘i ra.’ Aita râ te fifi i faaafarohia, eita atoa ïa raua e oaoa.

TE TUMU

No te tahoo. E mamû noa vetahi hoa faaipoipo no te tahoo. A feruri na i te tane e faanaho e rave i te hopea hebedoma ma te ore e tauaparau i ta ’na vahine. Ite a‘era oia, riri atura ma te parau e aita iho â ta ’na tane e tâu‘a ra ia ’na. Pahono atura te tane e huru ê hanoa oia. Ma te riri, mamû a‘era te vahine. E au ra e te na ô ra oia, “Ua haamauiui mai oe ia ’u, tiai mai ïa ta oe.”

No te faatia i to hinaaro. E mamû vetahi ia faatiahia to ratou hinaaro. A feruri na i na hoa faaipoipo e faaineine ra i te reva. Hinaaro atura te vahine e rave atoa i to ’na na metua. Patoi atura te tane ma te na ô, “Ua faaipoipo oe ia ’u eiaha i to oe na metua.” Faaea mû noa ’tu ra te tane a faaoti roa ’i ta ’na vahine ia rave mai ta ’na i parau atu.

Ia tupu te fifi a hinaaro atu ai te tahi e tamǎrû, e maitaihia na hoa faaipoipo ia mamû no te hoê taime poto. E faufaahia raua i taua mamûraa ra. Te na ô ra te Bibilia: “E taime to te mamû noa.” (Koheleta 3:7) Eiaha râ no te tahoo aore ra no te faatia i te hinaaro o te tahi. Ua na reira-ana‘e-hia, e rahi atu â te fifi e eita na hoa faaipoipo e faatura faahou te tahi i te tahi. E nafea ia ore te reira e tupu atoa no oe?

 E NAFEA?

Na mua, a fa‘i e e ore te fifi e faaafarohia ia mamû noa. Ma te na reira e nehenehe paha oe e tahoo aore ra e turai i to hoa ia rave mai ta oe e hinaaro. Tera anei râ to oe huru i nia i te taata ta oe i euhe e here? Te vai ra te ravea maitai a‘e no te faaafaro i te fifi.

A feruri. Te na ô ra te Bibilia e eita te here “e riri vave.” (Korinetia 1, 13:4, 5) Eiaha ïa e riri taue ia parau atu to hoa faaipoipo, “Eita iho â oe e faaroo ia ’u” aore ra “Mea taere noa iho â oe.” A feruri râ eaha te auraa mau. A parau ai “Aita iho â oe e faaroo ia ’u,” te na ô ra paha ïa oia “No ’u, aita oe e tâu‘a ra i to ’u mana‘o.”—Faaueraa Bibilia: Maseli 14:29.

Ia riro to hoa faaipoipo ei tauturu eiaha râ ei enemi

A paraparau ma te mǎrû. E faarahi te aimârô i te fifi. E nehenehe râ e taui i te reira. E nafea? Te na ô ra te tahi buka (Fighting for Your Marriage): “A paraparau ma te mǎrû e ia riro te mana‘o o to hoa ei ravea no te faaore i te fifi a ore ai te reira e rahi atu â. E pinepine tera noa te tia ia rave.”—Faaueraa Bibilia: Maseli 26:20.

A feruri no “orua” eiaha no “oe” ana‘e. Te na ô ra te Bibilia: “Eiaha roa ei taata e imi i to ’na ana‘e iho maitai, e imi râ te taata atoa i te maitai o vetahi ê atoa.” (Korinetia 1, 10:24) Ia riro to hoa faaipoipo ei tauturu eiaha râ ei enemi. Eita ïa e tupu te inoino e te tatama‘iraa. Eita atoa ïa orua e mamû noa.—Faaueraa Bibilia: Koheleta 7:9.

Ia mamû noa na hoa faaipoipo, aita ïa e haapaohia ra ta te Bibilia a‘oraa: “E aroha râ te taata atoa i tana iho vahine, mai te aroha ia ’na ihora, e te vahine ra ia auraro oia i tana tane.” (Ephesia 5:33) Ei taata faaipoipo, a faaoti amui eiaha e mamû noa ia tupu te fifi.

No te ite atu â

A tiaturi i te Atua no te oaoa e to hoa faaipoipo

Ma te pahono noa i na uiraa e piti, e nehenehe oe e oaoa ’tu â e to hoa faaipoipo.