Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! No 1 2016

 TUMU PARAU MATAMUA | IA VAI HAU NOA TE UTUAFARE

Ia faaea te tatama‘iraa

Ia faaea te tatama‘iraa

EAHA te huru mai te peu e tupu noa te tatama‘iraa? Peneia‘e, mea pinepine e ua rahi roa te reira. Aita atoa paha oe i ite mea nafea te haamataraa. Ua here râ orua ia orua e aita atoa i hinaaro ia mauiui te tahi e te tahi.

A haamana‘o, e ere te auraa ua taa ê to te tahi e te tahi mana‘o, ua ino roa te oraraa utuafare. E tupu iho â te tatama‘iraa, e faaite râ ta oe e rave no te faaafaro i te reira mea hau anei i te fare aore ra eita. E hi‘o ana‘e te tahi mau mana‘o e tauturu atu ia faaea i te tatama‘i.

1. EIAHA E PAHONO OIOI.

E tupu te tatama‘iraa e piti ana‘e te paraparau. Ia faaroo râ hoê ia paraparau te tahi atu, e ore mǎrû noa te riri. Eiaha ïa e pahono oioi ua ura ana‘e oe. A haavî ia oe no te ore e rave i te tahi ohipa ino e te haama. A haamana‘o, mea faufaa a‘e te hau o to utuafare i te ite na vai te parau hopea.

“Aore e vahie ra, e pohe ïa auahi; e aore hoi e hopoi parau ra, e ore atoa te mârô.”Maseli 26:20.

2. A VAIIHO I TO HOA IA HAAMAHORA I TO ’NA AAU.

Eaha te rave ia ore te riri ia rahi atu â e ia hau orua? A faaroo maite ma te ore e tâpû i te parau e eiaha e faahapa oioi. Eiaha e hamani i te mana‘o, a vaiiho râ ia ’na ia haamahora i to ’na aau. Eiaha e mana‘o ino ia ’na, a feruri râ, peneia‘e ua na reira oia no to ’na huru tia ore. E nehenehe te tahi parau mauiui mau e faahitihia no te mea aita te taata i feruri na mua aore ra ua puta roa o ’na. E ere râ te auraa e taata ino aore ra ua opua oia e tahoo.

“E faaaau aroha noa, e te hamani maitai, e te haehaa, e te mǎrû, e te faaoromai rahi.”Kolosa 3:12.

3. A TIAI IA MǍRÛ OE.

Mai te peu ua riri oe, mea maitai a‘e ia ani mǎrû noa i te tatarahapa e ia haere no te tamǎrû ia oe. Peneia‘e, e haere i roto i te tahi atu piha aore ra i rapae. Aita oe e ape ra aore ra e tahoo ra ma te vai mû noa. E faaohipa râ oe i tera taime no te ani i te Atua i te faaoromai e te paari.

“E faarue râ i te avau ra, a riro ei parau faaino.”Maseli 17:14.

 4. A FERURI MAITE EAHA TE PARAU E NAFEA IA PARAU.

Eita te fifi e afaro ia haapao noa oe nafea ia pahono no te haamauiui atu. A tutava râ i te faahiti i te tahi mea e tamǎrû i te aau o to hoa here. Eiaha e parau atu eaha te huru e tia ia ’na ia faaite. A ani râ ma te haehaa i te tahi mau faataaraa. A haamauruuru atoa no te tauturu aore ra mana‘o ta ’na e horoa ’tu.

“Te taata vavi noa ra, e au ïa i te ‘o‘e patiatia ra; o te arero râ o te taata paari ra, mai te raau rapaau ma‘i ra ïa.”Maseli 12:18.

5. EIAHA E TUTUÔ, A PARAPARAU RÂ MA TE MǍRÛ.

Mea ohie no te tahi atu ia ura atoa ua riri ana‘e hoê melo o te utuafare. Eiaha e faatihaehae, e faaino aore ra e tutuô noa ’tu ua puta roa oe. Eiaha e faahiti i te parau mauiui mai teie: “Aita oe e tâu‘a ra ia ’u” aore ra “Eita iho â oe e faaroo ia ’u.” Ma te mǎrû râ, a faaite i to hoa faaipoipo eaha ta ’na i rave i mauiui ai oe (“Ua mauiui roa vau i to oe . . .”). Eiaha roa e hamani ino i to hoa ma te turai, poara, tue aore ra rave i te tahi atu peu. Eiaha atoa e parau faufau, e haafaufaa ore aore ra e faariaria ia ’na na roto i ta oe mau parau.

“Ia haapae-roa-hia te mamahu ore, e te iria, e te riri, e te avau e te faaino, e te tairoiro, eiaha roa atoa ïa.”Ephesia 4:31.

6. A FAAORE OIOI I TE HAPA E A FAAITE I TA OE E RAVE IA AFARO TE FIFI.

Eiaha e vaiiho i to huru ia haamoe atu i ta oe fa, e faatupu i te hau. A haamana‘o, eita ana‘e hoê e tuu, orua toopiti te pau. Ia hau râ, orua e piti tei re. A farii ïa e ohipa atoa ta oe i rave i tupu ai te tatama‘iraa. Noa ’tu aita oe i hape, e nehenehe oe e ani i te tatarahapa no te mea ua riri, ua rave aore ra ua parau oe i te tahi mea o tei turai ia ’na ia riri. Mea faufaa a‘e te hau i te teoteo e te iteraa na vai te parau hopea. Ia ani atu te tahi i te tatarahapa, a faaore oioi i ta ’na hapa.

“E haere, e faahaehaa ia oe iho, e onoono maite atu [aore ra taparuparu oioi] oe i to hoa na.”Maseli 6:3.

Ia oti te tatama‘iraa, eaha te rave ia vai hau noa te utuafare? E hi‘opoahia te reira i roto i te tumu parau i muri nei.