Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2013

 IA AU I TE BIBILIA

Te parau mau no nia i te Atua

Te parau mau no nia i te Atua

Mai te aha te tino o te Atua?

“E Varua te Atua.”—Ioane 4:24.

TA TE BIBILIA E PARAU RA

Ia au i te Bibilia, e Varua te Atua. (Korinetia 2, 3:17) Mea teitei roa ïa oia ia tatou. Te na ô ra te Timoteo 1, 1:17, o ’na “te Arii hau mure ore e te pohe ore, e te itea ore ia hi‘o.” Te parau-atoa-hia ra: “Aita e taata i hi‘o i te Atua.”—Ioane 1, 4:12.

No te hau ê o te Atua Poiete e ore ai tatou e nehenehe e ite mai te aha mau na to ’na hoho‘a. Te na ô ra te Isaia 40:18: “O vai ta outou e faafaito i te Atua? eaha ta outou hoho‘a ia faaau ia ’na?” Mea faahiahia a‘e iho â te Manahope i te mau ra‘i.—Isaia 40:22, 26.

Te vai ra râ te ite e te paraparau roa ’tu i te Atua. No te aha e nehenehe ai? No te mea e varua atoa ratou e ora ra i te ra‘i. (Te mau arii 1, 22:21; Hebera 1:7) No te mau melahi, ua parau Iesu Mesia: “E tia ïa [ratou] i te hi‘oraa ’tu i te mata o tau Metua i te ao.”—Mataio 18:10.

 Tei te mau vahi atoa anei te Atua?

“E na ô outou ia pure: E to matou Metua i te ao.”—Mataio 6:9.

TA TE BIBILIA E PARAU RA

Aita te Bibilia e haapii ra e tei te mau vahi atoa te Atua i te mau taime atoa. Te faaite ra râ ta Iesu i parau i roto i te Mataio 6:9 e 18:10 e mea mau te Atua. E “Metua” oia e ora ra i te ra‘i, to ’na “parahiraa mau.”—Te mau arii 1, 8:43.

Hou a pohe ai, ua na ô Iesu: “Te faarue nei au i teie nei ao, e te ho‘i faahou nei au i te Metua.” (Ioane 16:28) I muri a‘e i to ’na poheraa e tia-faahou-raa ei varua, ua reva ’tura te Mesia i “te ra‘i . . . ia faaite oia ia ’na iho i mua i te aro o te Atua.”Hebera 9:24.

Mea faufaa anei tei faaitehia ’tu na? E. I te mea e te vai mau ra te Atua, e nehenehe tatou e matau e e haafatata ’tu ia ’na. (Iakobo 4:8) A ite ai i te parau mau no nia i te Atua e ore ai tatou e farii i te haapiiraa hape, mai te haamoriraa i te mau hoho‘a e tii. Te na ô ra te Ioane 1, 5:21: “E au mau tamarii ra, e ara ia outou i te mau idolo.”

Eaha te auraa e ua hamanihia te taata ma to te Atua huru?

“Hamani ihora hoi te Atua i te taata ma to ’na ihora huru, i hamani oia ia ’na ma te hoho‘a o te Atua ra; i hamani oia ia raua, o te tane e te vahine.”—Genese 1:27.

TA TE BIBILIA E PARAU RA

Ei taata, e nehenehe tatou e faatupu i te mau huru maitatai o te Atua mai te here, te parau-tia e te paari. No reira te Bibilia e na ô ai: “Ei pee outou i te Atua mai te tamarii herehia ra; ei haerea aroha to outou.”—Ephesia 5:1, 2.

Ua hamani atoa te Atua ia tatou ma te tiamâraa e maiti i te mea maitai i te mea ino e ia faaite i te here i nia ia vetahi ê ma te ravea rau. (Korinetia 1, 13:4-7) E nehenehe ta tatou e feruri e e hamani, e ite i te mea nehenehe e ia faahiahia i te mau mea maere e haaati maira. Hau roa ’tu â, e hinaaro iho â tatou e haapii no nia i te Atua Poiete e to ’na hinaaro.—Luka 11:28.

E faufaahia anei ia ite i te parau mau? Rahi atu â tatou i te haapii no nia i te Atua e i te pee i to ’na huru, rahi atu â tatou i te ora ia au i to ’na hinaaro. E mauruuru mau e e hau roa ïa tatou a oaoa ’tu â ai. (Isaia 48:17, 18) Ua ite iho â te Atua e te vai ra to ’na mau huru maitatai i roto i te aau o te taata. Na te reira e faatae mai ai i te feia haavare ore ia ’na a haere atu ai ratou na te e‘a o te ora mure ore.—Ioane 6:44; 17:3.