Eaha to roto?

Mau faaho'iraa ê

Tapura tumu parau

Ite no Iehova

Tahiti

A ARA MAI NA! TIURAI 2013

No teihea tumu tatou e hoo mai ai?

No teihea tumu tatou e hoo mai ai?

Ia au i te tahi titorotororaa i piahia i 2012, ua parau te afaraa o te taata uiuihia e ua hoo mai ratou i te ore e hinaaro-mau-hia. Te haapeapea ra e piti taata i nia e toru no te rahi o te mau tao‘a e hoohia maira. Mea tano iho â, i te mea e e rave rahi tei matau i te tarahu. Ua faaite te mau taata hi‘opoa e aita te taata i oaoa ’tu â, e hepohepo e e fifihia râ tei hoo rahi mai i te tao‘a! No te aha ïa tatou e hoo rahi mai ai?

TE ITE nei tatou e rave rahi faatianianiraa. No te aha? No te faariro i te hinaaro ei mea faufaa roa. Ua taa i te mau taata faatianiani e na te vai ra i roto i te aau e turai ia hoo mai. No reira te mau poroi faatianiani e faatupu ai i te hinaaro e hoo mai i te tao‘a.

Ia au i te hoê buka (Why People Buy Things They Don’t Need): “Hou a hoo mai ai i te tao‘a, e pinepine te taata i te mana‘ona‘o ia ’na e hoo maira i te reira.” No vetahi taata hi‘opoa, e ahoaho tera taata a hoo mai ai i ta ’na i hinaaro. Te na ô ra Jim Pooler, taata faatianiani: “Ua anaanatae ana‘e te taata i te tahi mea, e faatianiani atu â te hoo tao‘a ia hoo mai i te reira ma te feruri ore.”

E nafea ia ore e hema i te feia faatianiani aravihi? Eiaha e haapao noa i to mau hinaaro. A feruri râ i te poroi faatianiani e te tupuraa mau.

 TE POROI: “E maitai atu â to oe oraraa”

E hinaaro iho â tatou ia maitai atu â te oraraa. E rave rahi poroi faatianiani e turai mai ia mana‘o e a hoo mai ai i te tao‘a e tano e haamâhahia ïa to tatou mau hinaaro atoa mai te ea maitai a‘e, te oraraa peapea ore e te ahoaho ore e te taairaa maitai e vetahi ê.

TE PARAU MAU:

Ia rahi ta tatou tao‘a, e nehenehe te oraraa e fifihia. E titauhia ’tu â hoi te taime e te moni no te atuaturaa ’tu. No te tarahu, e ahoaho atu â atoa te taata a iti atu ai te taime no te utuafare e hoa.

Ia rahi ta tatou tao‘a, e nehenehe te oraraa e fifihia

Faaueraa: “Rahi noa iho hoi ta te taata nei tao‘a, e ere hoi tei taua tao‘a na ’na ra to ’na ora.”Luka 12:15.

TE POROI: “E monihia ’tu â oe”

Mea iti te fa‘i e ua hoo mai ratou i te tahi tao‘a ia hi‘o mai vera ma. Te na ô ra râ Jim Pooler: “E hoo mai te taata no te tata‘u e te mau hoa, taata tapiri, hoa rave ohipa e fetii.” No reira e faaitehia ’i te feia tuiroo e moni i roto i te mau hoho‘a faatianiani. Teie te poroi: “E nehenehe atoa oe e monihia!”

TE PARAU MAU:

E ore e itehia te mauruuru mau ia faaau noa tatou ia vetahi ê. Ua haamâha-ana‘e-hia te tahi hinaaro, oioi noa te tahi atu i te tupu mai.

Faaueraa: “O tei nounou i te ario ra, e ore ïa e mauruuru i te ario.”Koheleta 5:10.

TE POROI: “A faaite o vai oe ma ta oe mau tao‘a”

Te faataa ra te hoê buka (Shiny Objects): “Te tahi ravea e faaite ai o vai tatou (aore ra te huru taata ta tatou e hinaaro ra), o ta tatou ïa mau tao‘a aore ra faaohiparaa i te reira.” No te turai ia hoo mai, e haapuroro te feia faatianiani i te tahi hoho‘a e faaite ra i te taata moni e tera tao‘a.

Eaha to oe mana‘o ia oe iho? Ia hi‘o mai vetahi ê, eaha ta oe e hinaaro ia parau ratou? E taata haviti oe? E tino nehenehe to oe? Ia au i te mau poroi faatianiani, ia hoo noa mai oe i te tahi tao‘a taa ê e riro ai oe mai ta oe i hinaaro.

TE PARAU MAU:

E ere na te tahi noa ’‘e mea e taui aore ra e faatupu i te mau huru maitatai mai te haerea tia e te hapa ore.

Faaueraa: “To outou unauna . . . te tatuaraa i te auro ra, e te ahuraa i te ahu ra; o te taata moe râ o te aau.”Petero 1, 3:3, 4.