Ki te Kau Epelu 13:1-25
13 Ke na fakatumau te otou a‵lofa fakataina.+
2 Sa puli a te uiga talimalo,*+ me e auala i ei, ne talimalo ne nisi tino a agelu mo te sē iloa.+
3 Ke masaua a latou kolā i loto i falepuipui,+ e pelā eiloa me e ‵loka fakatasi koutou mo latou,+ mo tino kolā e fai fakamaseigina, ona ko te mea koi ola koutou i te lalolagi.
4 E ‵tau o faka‵malu ne tino katoa te fakaipoipoga, kae ke se lailai te moega o te fakaipoipoga,+ me ka fakamasino ne te Atua a tino e fina ki amioga fakatauavaga sē ‵tau mo tino mulilua.+
5 Ke ‵kalo kea‵tea mai te fia‵fai ki tupe+ i otou olaga, kae ke lotoma‵lie ki mea ko maua ne koutou.+ Me ne fai mai a ia: “Ka se tiaki lele eiloa ne au a koe, kae ka se tuku tiaki lele eiloa ne au a koe.”+
6 Ko te mea ke loto ‵toa tatou o fai aka: “A Ieova* ko toku fesoasoani; ka se mataku eiloa au. Ne a mea e mafai ne tino o fai mai ki a au?”+
7 Ke masaua a tino kolā e fai ne latou te takitakiga i a koutou,+ kolā ne faipati atu ne latou te muna a te Atua ki a koutou, kae kafai e mafau‵fau koutou ki ikuga o olotou amioga, fakaakoako ki te lotou fakatuanaki.+
8 A Iesu Keliso e ‵pau eiloa i te aso anafi mo te aso nei, ke oko eiloa ki te se-gata-mai.
9 Ke mo a ma takitaki ‵se koutou ne akoakoga kese‵kese kae ‵fou, me e ‵lei atu māfai e fakamalosigina a te loto ne te alofa tauanoa i lō meakai,* kolā e se aoga ki a latou kolā e fakalave‵lave i te ‵sala atu ki ei.+
10 E isi se ‵tou fatafaitaulaga telā e se ‵tau o ‵kai i ei a latou kolā e fai ne latou te taviniga tapu i te faleie.+
11 Me i foitino o manu kolā e ave olotou toto ne te faitaulaga sili ki loto i te koga tapu e pelā me se taulaga mō agasala e ‵sunu i tua o te fakai.+
12 Tela la, ne logo‵mae foki a Iesu i tua o te mataloa o te fakai+ ko te mea ke fakatapugina a tino ki tena toto eiloa.+
13 Tela la, ke na olo atu tatou ki a ia i tua o te fakai, kae tauave a fakatauemuga kolā ne tauave ne ia,+
14 me e se maua ne tatou i konei se fakai telā e tumau, kae e ‵sala malosi atu eiloa tatou ki te fakai telā ka oko mai.+
15 E auala i a ia, ke ofo atu faeloa ne tatou se taulaga o vikiga ki te Atua,+ telā ko fuataga o ‵tou laugutu+ kolā e tavae atu ki tena igoa i mua o tino katoa.+
16 E se gata i ei, ke mo a ma puli o fai a mea ‵lei kae tufa atu a mea kolā ko maua ne koutou ki nisi tino,+ me i te Atua e fiafia malosi ki vaegā taulaga penā.+
17 Ke faka‵logo ki a latou kolā e fai ne latou te takitakiga i a koutou+ kae ke ‵lago atu ki ei,+ me e puipui ne latou otou ola kae e tuku atu ne latou se tala ki te Atua e uiga ki ei,+ ko te mea ke fai ne latou te mea tenā mo te fiafia kae se mo te fi‵ta, me e fakamasei atu te mea tenei ki a koutou.
18 ‵Talo faeloa mō matou me tali‵tonu matou me ko maua ne matou se loto lagona ‵ma, kae e ma‵nako matou ke fakamaoni i mea katoa e fai ne matou.+
19 Kae e fakamalosi atu au i se auala fakapito ke ‵talo koutou ko te mea ke vave o oko atu au ki a koutou.
20 Nei la, a te Atua o te filemu, telā ne avaka ne ia mai te mate te tausi mamoe sili+ o mamoe, te ‵tou Aliki ko Iesu, fakatasi mo te toto o te feagaiga ki te se-gata-mai,
21 ke faka‵fonu ne ia koutou ki mea ‵lei katoa i te faiga o tena loto, ke ga‵lue i loto i a tatou e auala i a Iesu Keliso a mea kolā e fakafiafia atu ki a ia, ke i luga i a ia te ‵malu ki te se-gata-mai, se-gata-mai eiloa. Amene.
22 Nei la, ko fakamalosi atu au ki a koutou, e oku taina, ke faka‵logo mo te kufaki ki pati fakamalosi loto konei, me ko oti ne tusi atu ne au se tusi toetoe ki a koutou.
23 Au e manako ke iloa ne koutou i te ‵tou taina ko Timoteo ko oti ne fakasaoloto. Kafai e oko vave mai a ia, ka olo fakatasi atu māua ki a koutou.
24 ‵Moli atu oku alofaaga ki a latou katoa kolā e fai te takitakiga i a koutou e pelā foki ki tino tapu katoa. E ‵moli atu foki alofaaga o latou i Italia+ ki a koutou.
25 Ke i luga i a koutou katoa te alofa tauanoa o te Atua.