Ki te Kau Epelu 9:1-28

  • Taviniga tapu i te faletapu i te lalolagi (1-10)

  • Ko ulu atu a Keliso ki te lagi mo tena toto (11-28)

    • Sokoga o te feagaiga fou (15)

9  Ne aofia i te feagaiga mua a manakoga o te tulafono e uiga ki te taviniga tapu mo tena koga tapu+ i te lalolagi.  Me ne fakatu aka i te faleie muamua se potu telā e tuku i ei te tugamoli+ mo te taipola mo falaoa kolā ko oti ne ofo atu ki te Atua;+ kae ne fakaigoa te potu tenā ki te Potu Tapu.+  Kae mai tua o te lua o ‵pui laugatu+ ko te potu o te faleie telā e fakaigoa ki te Potu Tafasili i te Tapu.+  E tuku i te potu tenei a te mea tuku afi aulo+ e ‵sunu ei a mea ma‵nogi mo te pusa o te feagaiga+ telā e ufi kātoa ki te aulo,+ kae e tuku i loto i ei te tiā aulo telā e tuku ei te manai+ mo te tokotoko o Alona telā ne ‵somo aka i ei a lau+ mo papa fatu+ o te feagaiga;  kae mai luga i ei ko kelupi* ‵malu kolā e fakamalu ne lāua te ‵pono* o te pusa.+ Kae e se tenei te taimi ke fakamatala likiliki atu a mea konei.  I te otiga ne faite a mea konei i te auala tenei, e ulu atu faeloa a faitaulaga ki te potu muamua o te faleie o fai te taviniga tapu;+  kae ko te faitaulaga sili fua e ulu atu ki te lua o potu fakatasi i te tausaga,+ mo toto+ kolā e ofo atu ne ia mō ia eiloa+ e pelā foki mo agasala a tino+ katoa kolā ne fai ona ko te lotou va‵lea.  Tela la, e fakaasi manino mai ne te agaga tapu me i te auala ki loto i te koga tapu ne seki fakaasi mai i te taimi koi tu ei te faleie muamua.+  A te faleie tenei se fakatusa fua mō te taimi tenei,+ kae e ‵tusa mo te fakatokaga tenei, e ofo atu i ei a meaalofa mo taulaga.+ E tiga te feitu tenā, e se mafai ne mea konei o fai ke ‵lei katoatoa te loto lagona o te tino telā e fai ne ia a te taviniga tapu.+ 10  A mea konā ko mea fua e uiga ki meakai mo meainu mo te ‵fuluga o mea kese‵kese.*+ A mea konei ne manakoga o te tulafono e uiga ki te foitino+ kae ne fakagalue aka ke oko ki te taimi ne fuafuagina ke faka‵tonu ei a mea katoa. 11  Kae i te taimi ne vau ei a Keliso e pelā me se faitaulaga sili o mea ‵lei kolā ko oti ne taunu, ne ulu atu a ia ki loto i te faleie telā e sili kae e ‵lei atu kae ne seki faite ki lima o tino, kae e sē se vaega o mea ne faite i te lalolagi. 12  Ne ulu atu a ia ki loto i te koga tapu, e se mo toto o kouti io me ko tamā pulumakau, kae mo tena toto eiloa,+ fakatasi eiloa mō taimi katoa ke maua ei te fakaolataga ki te se-gata-mai mō tatou.+ 13  Me kafai e fakamatulutulu a toto o kouti mo pulumakau tāgata+ mo lefu o se pulumakau* fafine ki luga i tino kolā e se ‵ma ke fakatapu mō te faka‵māga o te foitino,+ 14  e se sili fakafia atu la a te toto o Keliso,+ telā ne ofo atu ne ia a ia eiloa e auala i te agaga o te se-gata-mai e aunoa mo se pona ki te Atua, i te faka‵māga o ‵tou loto lagona mai galuega sē aoga*+ ko te mea ke mafai o tuku atu ne tatou te taviniga tapu ki te Atua ola?+ 15  Tenā te pogai ko fai ei a ia mo fai te sokoga o te feagaiga fou,+ ona ko te mea ko oti ne mate se tino mō te lotou fakasaolotoga e auala i te togiola+ mai amioga solitulafono kolā ne fai mai lalo i te feagaiga mua, ke maua ne tino kolā ko oti ne kalagagina a te folafolaga e uiga ki te tofi se-gata-mai.+ 16  Me kafai e isi se feagaiga e fai mo te Atua, e ‵tau o tuku atu te tino fai feagaiga* ke mate, 17  ona ko te mea e fakamau‵tu aka te feagaiga māfai ko mate se tino,* me e se mafai o fakagalue aka te feagaiga i te taimi koi ola ei te tino fai feagaiga tenā. 18  Tela la, ne seki fakagalue te feagaiga mua e aunoa mo te toto. 19  Me i te otiga ne faipati atu ne Mose a fakatonuga katoa o te Tulafono ki tino katoa, ne puke ne ia a toto o tamā pulumakau mo kouti, fakatasi mo vai, vulu kula, mo te isopo kae fakamatulutulu atu ki luga i te tusi* mo tino katoa, 20  ana muna: “Tenei te toto o te feagaiga telā ne fakatonu atu te Atua ke tausi ne koutou.”+ 21  Ne fakamatulutulu foki ne ia a te faleie tapu mo ipu katoa kolā e fakaaoga i te taviniga ‵malu* ki te toto.+ 22  Ao, e ‵tusa mo te Tulafono toeitiiti ko mea katoa e faka‵ma ki te toto,+ kae e seai se agasala e mafai o fakamagalo seiloga ke ‵ligi ki tua te toto.+ 23  Tela la, e ‵tau eiloa o faka‵magina a mea kolā e fakaata+ mai ne latou a mea i te lagi e auala i mea konei,+ kae ko mea i te lagi e manakogina i ei a taulaga kolā e ‵lei fakafia atu. 24  Me ne seki ulu atu a Keliso ki loto i se koga tapu telā ne faite ki lima o tino,+ telā se fakatusa fua o te mea tonu,+ kae ne ulu atu eiloa ki te lagi,+ ko te mea ke tu atu a ia i mua o te Atua mō tatou.+ 25  Ne seki fai te mea tenei ko te mea ke ofo atu faeloa ne ia a ia eiloa, e pelā mo te faitaulaga sili māfai e ulu atu ki loto i te koga tapu i tausaga takitasi+ mo te toto telā e se ko tena toto. 26  Moi fai penā, penei ne ‵tau o logo‵mae faeloa a ia talu mai te taimi ne fakavae* ei te lalolagi. Kae nei la, ko oti ne fakaasi mai a ia fakatasi eiloa mō taimi katoa i te vaitaimi o te gataga o te olaga tenei, ke fakaseai ne ia te agasala i tena faiga mo fai te taulaga.+ 27  Me e pelā mo te fakatokaga ke ‵mate a tino i te taimi fua e tasi mō taimi katoa, kae mai tua i ei ko te fakamasinoga, 28  e penā foki a Keliso ne ofo atu fakatasi mō taimi katoa ke amo ne ia a agasala a tino e tokouke;+ kae ko te lua o taimi e fakaasi mai ei a ia, e se fai mō te tapalega o agasala, kae ka lavea a ia ne latou kolā e ‵sala atu mo te loto naunau ki a ia mō te lotou fakaolataga.+

Fakamatalaga mai lalo

A kelupi ne agelu kolā e maluga ‵ki olotou tulaga.
A te pati Eleni telā ne ‵fuli ki te ‘‵pono’ e mafai foki o fakasino atu ki se taulaga o te faka‵māga ke maua i ei te taliaga a te Atua.
Eleni, “papatisoga kese‵kese.”
Io me “se tamā pulumakau.”
Eleni, “mate.”
Io me “te sokoga o te feagaiga.”
E mafai o fakasino atu te mea tenei ki te mate o se tino io me se manu.
Io me “peluga tusi.”
Io me “te tavini atu i mua o tino.”
Onoono ki te fml i te 1Pe 1:20.