Ki te Kau Epelu 7:1-28

  • Mekisatiko, tupu mo te faitaulaga tu ‵kese (1-10)

  • Te sili atu o te tulaga faitaulaga o Keliso (11-28)

    • E mafai o fakasao katoatoa ne Keliso (25)

7  Me i a Mekisateko tenei, te tupu o Salema, ko te faitaulaga a te Atua Tafasili i te Maluga, ne fakafetaui atu ki a Apelaamo i tena fokimaiga i te otiga ne tamate ne ia a tupu, kae fakamanuia atu ki a ia,+  kae ne tuku* atu ne Apelaamo ki a ia te tasi-vae-sefulu o mea katoa. Muamua la, a te uiga o tena igoa ko te “Tupu o te Amiotonu,” kae ko ia foki te tupu o Salema, telā ko te “Tupu o te Filemu.”  Ona ko te mea e seai sena tamana, e seai sena mātua, e seai sena gafa, e seai se tala e uiga ki te kamataga mo te gataga o tena olaga, kae i te faiga o ia ke pelā mo te Tama a te Atua, ne tumau a ia e pelā me se faitaulaga mō taimi katoa.+  Onoono ki te maluga o te tagata tenei, me ne tuku atu ki ei ne Apelaamo, telā ko te ulu o te kāiga, a te tasi-vae-sefulu o toe mea ‵lei katoa mai te taua.+  E tonu, e ‵tusa mo te Tulafono, a tama a Levi+ kolā ne maua te lotou tofi fakafaitaulaga ne tuku atu se fakatonuga ki ei ke ‵tae ne latou a tasi-vae-sefulu mai i tino,+ kolā ko olotou taina, faitalia eiloa me ne ‵tupu mai* a latou konei i a Apelaamo.  Kae ko te tagata tenei ne seki vau i te lotou gafa, ne puke ne ia te tasi-vae-sefulu mai i a Apelaamo kae fakamanuia atu ki te tino ne maua ne ia a folafolaga.+  Nei la, e se mafai o fakafiti ne tatou a te manatu me ne fakamanuia ne te tino maluga a te tino malalo.  I te feitu e tasi, e maua ne tino kolā e oko ki ei te mate a tasi-vae-sefulu, kae i te suā feitu, ko te tino telā e molimau ki ei a Tusitusiga Tapu e ola.+  Kae e mafai foki o fai atu me i a Levi telā ne maua ne ia a tasi-vae-sefulu ko oti ne ‵togi atu ne ia a tasi-vae-sefulu e auala i a Apelaamo, 10  me i a ia koi fai eiloa pelā me se tino ka tupu mai* i tena tupuga i te taimi ne fetaui ei lāua mo Mekisateko.+ 11  Tela la, kafai ne maua te tulaga ‵lei katoatoa e auala i te tofi fakafaitaulaga mai te matakāiga o Levi+ (me se vaega tenā o te Tulafono telā ne tuku atu ki tino), kaia la ne manakogina ei ke toe sae mai se isi faitaulaga e pelā mo Mekisateko+ kae e se pelā mo Alona? 12  Ona ko te kau faitaulaga ko ‵fuli, se mea ‵tau ke ‵fuli foki a te Tulafono.+ 13  Me i te tagata telā e fakauiga ki ei a mea konei ne vau mai se isi matakāiga, telā e seai se tino mai i ei ne galue i te fatafaitaulaga.+ 14  Me e manino ‵lei i te ‵tou Aliki ne tupu mai i te gafa o Iuta,+ kae seai ne pati a Mose me ka o‵mai a faitaulaga mai te matakāiga tenā. 15  Kae ko gasolo o manino faka‵lei a te mea tenei i te taimi ne sae mai ei te suā faitaulaga+ e pelā mo Mekisateko,+ 16  telā ko oti ne fai penā, e se auala i te manakoga o te tulafono telā e fakavae ki luga i te gafa o te tino, kae e auala i te ‵mana o te ola telā e se mafai o fakaseai.+ 17  Me ne fai mai penei te molimau e uiga ki a ia: “A koe ko te faitaulaga ki te se-gata-mai e pelā eiloa mo Mekisateko.”+ 18  Tela la, ne ave kea‵tea te fakatonuga mua ona ko tena vāivāi mo tena sē aoga.+ 19  Me e seai se mea e fai ne te Tulafono ke ‵lei katoatoa,+ kae ko te fakaasimaiga fua o te fakamoemoega telā e ‵lei atu,+ telā e fakapili‵pili atu ei tatou ki te Atua.+ 20  Kae ne seki tuku mai foki e aunoa mo se tautoga 21  (me e isi ne tāgata kolā ne fai mo fai ne faitaulaga e aunoa mo se tautoga, kae ko te tino tenei ne fai penā e auala i se tautoga ne fai e uiga ki a ia ne te Atua telā ne fai mai: “A Ieova* ko oti ne tauto, kae ka se ‵fuli a tena mafaufau,* ‘A koe ko te faitaulaga ki te se-gata-mai’”),+ 22  ko fai a Iesu e pelā me se fakamaoniga* o se feagaiga telā e ‵lei atu.+ 23  E se gata i ei, ne ‵tau o tokouke a faitaulaga i te fakasologa tenā+ me e se mafai o tumau se tino e tokotasi i te tofi tenā ona ko te mate, 24  kae ona ko ia e ola ki te se-gata-mai,+ e seai se tino e sui ne ia tena tofi fakafaitaulaga. 25  Tela la, e mafai foki o faka‵sao katoatoa ne ia a tino kolā e olo atu ki te Atua e auala i a ia, me e ola faeloa a ia o fakamolemole atu mō latou.+ 26  Me e ‵tau eiloa o maua ne tatou se vaegā faitaulaga sili penei, telā e fakamaoni, e se agasala, e se lailai,+ e ‵vae kea‵tea mai i tino agasala, kae e fakamaluga aka ke maluga atu i lagi katoa.+ 27  E se pelā mo faitaulaga sili konā, e se manakogina ke ofo atu ne ia a taulaga i aso takitasi,+ muamua mō ana agasala totino kae fakamuli mō agasala a tino katoa,+ me ne fai ne ia te mea tenei fakatasi eiloa mō taimi katoa i te taimi ne ofo atu ei ne ia a ia eiloa.+ 28  Me ne faka‵sopo ne te Tulafono a tāgata kolā e isi ne olotou vāivāiga e pelā me ne faitaulaga sili,+ kae ko te muna o te tautoga+ telā ne fai mai tua o te Tulafono ne fakasopo ne ia se tama telā ko oti ne fai ke ‵lei katoatoa+ ki te se-gata-mai.

Fakamatalaga mai lalo

Eleni, “ne ‵vae.”
Eleni, “ne ‵mai ki tua mai i te kautega.”
Eleni, “i kautega.”
Onoono ki te MF A5.
Io me “ka se salamō eiloa a ia.”
Io me “te tino ne tuku atu ke fakatalitonu.”