Ki te Kau Epelu 12:1-29

  • Iesu, Tino e fakakatoatoa ne ia ‵tou fakatuanaki (1-3)

    • Kaumana lasi o molimau (1)

  • Sa fakaseaoga te polopolokiga a Ieova (4-11)

  • Faka‵tonu a auala mo ou vae (12-17)

  • Fakapilipili atu ki te Ielusalema faka-te-lagi (18-29)

12  Tela la, ona ko tatou ko sikomia ne molimau e tokouke,* ke na ‵pei foki ne tatou kea‵tea a mea ‵mafa katoa mo te agasala telā e faigofie o lave‵lave tatou i ei,+ kae ke na ‵tele tatou mo te kufaki i te fakatau‵telega tenei i ‵tou mua,+  mai te ‵kilo atu faeloa ki te Sui Sili mo te Tino telā e fakakatoatoa ne ia te ‵tou fakatuanaki, ko Iesu.+ Ona ko te fiafia telā i ana mua ne kufaki ei ne ia te pou fakasaua,* ne seki saga atu ki tena masiasi, kae ne sagasaga ifo i te feitu fakaatamai o te nofogaaliki o te Atua.+  E tonu, mafaufau faka‵lei ki te tino telā ne kufaki ne ia a pati ‵teke a tino agasala+ kolā e fakamasei atu fua ki a latou eiloa, ko te mea ke mo a koutou ma fi‵ta kae ‵fiu.+  I te otou taua atu ki te agasala tenā, ne seki ‵teke aka eiloa koutou ke oko ki te tulaga telā ko fakama‵ligi ei otou toto.  Kae ko puli galogalo i a koutou te fakamalosiga telā e taku ei koutou ko tama: “Taku tama, sa manatu māmā ki polopolokiga mai i a Ieova,* io me ‵fiu māfai e fakatonutonu koe ne ia;  me ko latou kolā e alofa ki ei a Ieova* e polopoloki ne ia, e tonu, e ‵kini* ne ia a tino katoa kolā ko oti ne fai ne ia mo fai se tama.”+  E ‵tau o kufaki koutou e pelā me se vaega o te otou polopolokiga.* E fai ne te Atua a koutou e pelā me ne ana tama.+ Kae ko oi la te tama e se polopoloki ne tena tamana?+  Kae kafai ne seki maua ne koutou katoa a te polopolokiga tenei, a koutou ne tama fua‵taka eiloa kae e se ne tama ‵tonu.  E se gata i ei, e masani sāle o polopoloki tatou ne ‵tou tamana faka-te-foitino, kae e āva tatou ki a latou. E se sili fakafia atu la ke faka‵logo tatou ki ‵tou Tamana faka-te-agaga* ko te mea ke ola tatou?+ 10  Me ne polopoloki ne latou a tatou i se taimi toetoe e ‵tusa mo mea kolā e ‵lei i te lotou faka‵tau, kae e polopoloki ne ia tatou mō te ‵tou ‵lei ko te mea ke ‵kau fakatasi tatou i tena ‵malu.+ 11  E tonu, e seai se polopolokiga e foliga mai me e fakafiafia i te taimi nei, kae e fakalogo‵mae* mai fua; kae fakamuli loa ka fua mai i ei a te fuataga filemu o te amiotonu i a latou kolā ne akoakogina e auala i ei. 12  Tela la, ke fakama‵losi aka a lima kolā ko gau‵gau mo tulivae kolā ko vāi‵vai,+ 13  kae ke faka‵tonu aka faeloa a auala mō otou vae,+ ko te mea ke se seke se sokogā ivi o se tino vae masei, kae ke mafai o toe faka‵lei aka. 14  Kausaki atu ke maua te filemu mo tino katoa+ mo te fakatapūga+ telā e ‵tau o maua, me kafai e se maua, e se mafai o lavea ne se tino a te Aliki. 15  Onoono faka‵lei ke mo a ma sē maua ne se tino i a koutou a te alofa tauanoa o te Atua; ko te mea ke seai se aka poisini e ‵somo aka o faka‵tupu fakalavelave kae fakalailai i ei a tino e tokouke;+ 16  kae onoono ke seai se tino i a koutou e fina ki amioga fakatauavaga sē ‵tau io me se tino telā e se fakatāua ne ia a mea tapu, e pelā mo Esau, telā ne tuku atu ne ia tena tulaga toekimua ke fesuiaki mo se ‵kaiga fua e tasi.+ 17  E iloa ne koutou me fakamuli ifo i te taimi ne manako ei ke maua ne ia te fakamanuiaga, ne seki toe talia ke maua ne ia; me e tiga eiloa ne taumafai malosi a ia mo loimata+ ke ‵fuli tena mafaufau,* ne seki manuia eiloa a ia. 18  Me i a koutou ne seki fakapili‵pili atu ki te mauga telā ne mafai o puke koutou ki ei+ kae telā ko ‵ka i te afi,+ mo se kaumana pouli mo te pouli tagataga mo se kaumatagi,+ 19  mo te ‵tagi o te pu+ mo te leo e faipati mai,+ kae i te lagonaga ne latou a mea konā ne fakatagi atu ei a tino ke se toe fai atu ne pati ki a latou.+ 20  Me ko se mafai ne latou o fa‵ki te fakatonuga tenei: “Kafai foki eiloa e patele se manu ki te mauga, e ‵tau o peipei ki fatu.”+ 21  E se gata i ei, ona ko te fakama‵taku o mea konā, ne fai mai ei a Mose: “Au ko mataku kae polepole.”+ 22  Kae ko oti ne fakapili‵pili atu koutou ki se Mauga o Siona+ mo te fakai o te Atua ola, ko Ielusalema faka-te-lagi,+ mo agelu e se lausia,* 23  e maopoopo fakatasi,+ mo te fakapotopotoga o toekimua kolā ko tusi olotou igoa i te lagi, mo te Atua te Famasino o tino katoa,+ mo ola faka-te-agaga+ o tino amio‵tonu kolā ko oti ne fai ke ‵lei katoatoa,+ 24  mo Iesu te sokoga+ o te feagaiga fou,+ mo te toto ne fakamatulutulu, telā e faipati mai i se auala e ‵lei atu i lō te toto o Apelu.+ 25  Fakaeteete ke mo a ma ita koutou o faka‵logo ki* te tino telā e faipati mai. Me kafai ne seki ‵sao a latou kolā ne ita ma faka‵logo ki te fakatonuga a te Atua telā ne fai atu i te lalolagi, ka sili atu la te sē ‵sao o tatou māfai e fulitua atu tatou ki a ia telā e faipati mai i te lagi!+ 26  I te taimi tenā ne galulu ei te lalolagi+ i tena leo, kae nei la ko tauto mai a ia, “E toe tasi te taimi kae ka lūlū ne au e se ko te lalolagi fua kae ko te lagi foki.”+ 27  A te tugapati “e toe tasi te taimi” e fakasino ki te avega kea‵tea o mea kolā e lūlūgina, ko mea kolā ko oti ne faite, ko te mea ke tumau a mea kolā e seki lūlūgina. 28  Tela la, i te lavea atu me ka maua ne tatou te Malo telā e se mafai o lūlūgina, ke na maua faeloa ne tatou te alofa tauanoa, telā e mafai o ofo atu i ei ne tatou a te taviniga tapu telā e talia ne te Atua mo te mataku mo te fakaaloalo lasi. 29  Me i te ‵tou Atua e fai pelā me se afi ‵ka ulaula.+

Fakamatalaga mai lalo

Eleni, “ne molimau e tokouke e pelā me se kaumana lasi.”
Onoono ki te FP.
Onoono ki te MF A5.
Onoono ki te MF A5.
Io me “fakasala.”
Io me “fakamasaniga.”
Io me “Tamana o te ‵tou ola faka-te-agaga.”
Io me “fakafanoanoa.”
Telā ko te mafaufau o tena tamana.
Io me “fia sefuluafe.”
Io me “e se fai ne fakamasakoga ke; e se saga atu.”