Hali Abahebburaniya 9:1-28
9 Ekiragaano eky’okubanza kikaba kiine ebiragiro ebirukukwata ha buheereza oburukwera n’ekiikaro ekirukwera hanu omu nsi.
2 Ekisiika eky’okubanza omu heema kikombekwa kandi kikaba kirumu ekikondo ky’etaara, emeeza n’emigaati ey’okwoleka* kandi ekisiika eki kyayetwaga Ekiikaro Ekirukwera.*
3 Baitu enyuma y’orutimbi* orwa kabiri hakaba haliyo ekisiika ekirukwetwa Aharukukirayo Okwera.*
4 Hakaba harumu eky’okwoterra emigaju* eky’ezaabbu n’esanduuko ey’ekiragaano* yoona eswekerwe ezaabbu kandi hakaba harumu ekibindi ky’ezaabbu ekirumu emanu kandi harumu omwigo gwa Aroni ogwarokiire hamu n’amabaale ag’ekiragaano;
5 kandi haruguru yayo hakaba haroho abakerubbi* ab’ekitiinisa basiikiriize omufundikizo gw’esanduuko.* Baitu kanu tinuko akasumi ak’okubazaaho ebintu binu omu bwijwire.
6 Hanyuma y’ebintu binu kuteekanizibwa omu mulingo gunu, banyakatagara bataaha butoosa omu kisiika eky’eheema eky’okubanza kukora emirimo ey’obuheereza oburukwera;
7 baitu nyakatagara omukuru nuwe wenka ataaha omu kisiika ekya kabiri omurundi gumu omu mwaka, aine esagama ei ahayo habwe wenka na habw’ebibi by’abantu ebi bakora batamanyire.
8 Nahabweki omwoyo ogurukwera gukyoleka kurungi ngu omuhanda ogurukugenda omu kiikaro ekirukwera gukaba gutakoolekerwe eheema ey’okubanza obu ekaba ekyaroho.
9 Eheema enu kokurorraho aka kasumi akaroho hati, kandi kusigikirra ha nteekaniza enu, ebisembo n’ebihongwa nibiheebwayo. Baitu ebintu binu tibisobora kusobozesa omuntu ow’omunda ow’omuntu kukora emirimo ey’obuheereza oburukwera ahikiriire.
10 Biine akakwate n’ebyokulya n’eby’okunywa byonka, hamu n’okunaaba n’okwogya ebintu okw’emiringo erukwahukana.* Binu byali bintu by’omubiri ebirukwetaagisa omu biragiro ebyatairweho kuhika ha kasumi akaatairweho ak’okutereekereza ebintu.
11 Baitu Kristo obu yaizire nka nyakatagara omukuru ow’ebintu ebirungi ebimazire kubaho, akaraba omu heema ey’erukukirayo obukuru kandi ey’erukukirayo kuba enyakuhikiriire ey’etakozerwe n’emikono, kandi ey’etali emu ha bintu ebyahangirwe omu nsi.
12 Akataaha omu kiikaro ekirukwera omurundi gumu yamara, ataine esagama ey’enimi n’ey’embuzi ento, baitu n’esagama ye, kandi yatutungira okujunwa* okw’ebiro n’ebiro.
13 Obu kiraaba ngu esagama ey’embuzi, n’ey’enimi, hamu niiju ery’enyana ebimiisirwa abo abatali beecumi, bibeeza nibafooka beecumi omu mubiri,
14 esagama ya Kristo eyahairweyo hali Ruhanga nk’ekihongwa ekitaroho kamogo, kuraba omu mwoyo ogw’ebiro n’ebiro, terikiraho muno kweza omuntu waitu ow’omunda kuruga omu bikorwa ebifiire nukwo tusobole kuheereza Ruhanga omwomeezi omu buheereza oburukwera?
15 Egi niyo ensonga habwaki nuwe omuteeraniza ow’ekiragaano ekihyaka, eki kikabaho nukwo abo abaayeserwe basobole kutunga omurago ogw’obugwetwa ogw’ebiro n’ebiro. Kinu kikasoboka habw’okufa kwe nukwo kuraba omu kicunguro balekerwe kuruga omu kusiisa oku bakaba barumu bali hansi y’ekiragaano ekyabandize.
16 Obu harukuba haroho ekiragaano, omuntu ow’akikozere asemeriire kubanza kufa,
17 habwokuba ekiragaano kitandika kukora ha kufa habwokuba kiba kitarukukora omuntu ayakikozere obu aba akyali mwomeezi.
18 Enu niyo ensonga habwaki n’ekiragaano eky’okubanza kitaratandikire kukora,* hataroho esagama.
19 Habwokuba Musa obu yamazire kugambira abantu byona ebyaragiirwe omu Biragiro,* akatwara esagama ey’enimi ento, n’ey’embuzi hamu n’amaizi, yagimiisira ekitabu* n’abantu boona naakozesa ebyoya by’entaama ebirukutukura n’akati k’izobu*
20 naagamba ati: “Enu niyo esagama ey’ekiragaano Ruhanga eki abaragiire kuhikiiriza.”
21 Omu mulingo nugwo gumu yamiisira eheema n’ebibindi byona eby’obuheereza oburukwera esagama.
22 Kusigikirra ha Biragiro, haihi ebintu byona byezebwa n’esagama kandi esagama obu etaseeswa, tihabaho kuganyirwa.
23 Nahabweki, kyali nikyetaagisa ekisisani ekirukukiikirra ebintu eby’omu iguru kwezebwa omu miringo egi, baitu ebintu eby’omu iguru nibyetaaga ebihongwa ebirukukirrayo kimu oburungi.
24 Habwokuba Kristo atataahe omu kiikaro ekirukwera ekikozerwe n’emikono ekinyakuli kisisani ky’ekiikaro kyonyini, baitu akataaha omu iguru lyonyini kandi hati azooka omu maiso ga Ruhanga habwaitu.
25 Kinu atakikole ngu ayeheyoga butoosa nkooku nyakatagara omukuru yataahaga omu kiikaro ekirukwera mwaka ha mwaka n’esagama ey’etali ye.
26 Kitali eki, yaakubonaboine emirundi nyingi kurugira kimu ha kutandika kw’ensi. Baitu hati ayeyolekere omurundi gumu yamara, ha mpero ey’enteekaniza ey’ebintu* asobole kwihaho ekibi kuraba omu kwehayo nk’ekihongwa.
27 Nkooku abantu baahuliirwe okufa omurundi gumu, baitu hanyuma y’eki habeho okucwa omusango,
28 nukwo na Kristo yahairweyo omurundi gumu kyahwa, ayetweke ebibi bya baingi; kandi omurundi ogwa kabiri obu alizooka, aliba ataizire kwihaho ekibi, kandi alirorwa abo abarukwekamba kumuserra habw’okujunwa kwabo.
Obugambo Obuli Hansi
^ Rora, Kusoborra Ebigambo; “Emigaati ey’okwoleka.”
^ Rora, Kusoborra Ebigambo; “Aharukwera.”
^ Rora, Kusoborra Ebigambo; “Orutimbi.”
^ Rora, Kusoborra Ebigambo.
^ Rora, Kusoborra Ebigambo; “Eby’okwoterra emigaju.”
^ Rora, Kusoborra Ebigambo; “Esanduuko ey’ekiragaano.”
^ Rora, Kusoborra Ebigambo.
^ Rundi, “ekiikaro eky’okulihirraho.” Rora, Kusoborra Ebigambo; “Omufundikizo gw’esanduuko ey’ekiragaano.”
^ Nkooku kiri, “okubatiza okwa buli mulingo.”
^ Nkooku kiri, “okucungurwa.”
^ Rundi, “kitaratongoziibwe.”
^ Rora, Kusoborra Ebigambo; “Ebiragiro.”
^ Rundi, “omuzingo.”
^ Rora, Kusoborra Ebigambo; “Izobu.”
^ Rora, Kusoborra Ebigambo; “Empero ey’enteekaniza ey’ebintu.”
