Hali Abahebburaniya 6:1-20
6 Nahabweki, nkooku tuhingwire ha nyegesa ez’okubandizaaho ezirukukwata hali Kristo, leka twekambe kukura tutarukwongera kwombeka omusingi, obu nitwegesa ebirukukwata ha kwegarukamu kuruga omu bikorwa ebifiire, okwikiririza omuli Ruhanga,
2 okwegesa ebirukukwata ha kubatiza, okutaho emikono, okuhumbuuka okw’abafu, n’okucwa omusango ogw’ebiro n’ebiro.
3 Kandi nikyo turukwija kukora Ruhanga obu araaba agondeze.
4 Obukirukuhika hali abo abaamulikiirwe, baarozaaho ekisembo ekya busa eky’omu iguru, kandi abaatungire omwoyo ogurukwera,
5 kandi baarozaaho ekigambo kya Ruhanga ekisemiire, n’amaani ag’enteekaniza ey’ebintu* erukwija,
6 baitu baagwa, tikirukusoboka kwongera kubaleetera kwegarukamu, habwokuba bongera kuterra Omwana wa Ruhanga emisumaali ha muti kandi bamuswaza omu rwijwire rw’abantu.
7 Habwokuba itaka litunga omugisa kuruga hali Ruhanga obu linywa amaizi g’enjura aganyakwikara nigaligwaho kandi limeza ebimera ebinyakugasira abo ababibyaire.
8 Baitu obu limeza amahwa n’amatojo, lirekwaho kandi liba liri haihi kukyenwa kandi ha kumalirra liryokebwa.
9 Baitu noobu kiraaba ngu nitubaza tuti, nitukigumya ngu inywe abagonzebwa nimwija kuhikwaho ebintu ebirungi ebiraabarugiramu okujunwa.
10 Habwokuba Ruhanga tali atahikiriire okwebwa emirimo yanyu n’okugonza oku mwayolekere ibara lye, obu mwaheeriize abarukwera kandi nimukyagumizaamu kubaheereza.
11 Baitu nitugonza buli omu hali inywe kugumizaamu naayoleka obwekambi nubwo bumu nukwo musobole kwikara mwine okunihira okugumire kuhikira kimu ha mpero,
12 nukwo mutaba bagara, baitu mwegere hali abo abagwetwa emirago kuraba omu kwoleka okwikiriza n’okugumiisiriza.
13 Habwokuba hakaba hataroho arukukira Ruhanga obukuru, Ruhanga obu yaraganiize Ibburahimu, akeerahirra wenka
14 naagamba ati: “Mananu kwo ndikuha emigisa, kandi ndikukanyisa.”
15 Hanyuma ya Ibburahimu kwoleka okugumiisiriza, akatunga eki yaraganiziibwe.
16 Habwokuba abantu barahirra ogu arukubakira, okurahira kwabo kumaraho empaka zoona, kandi kugumya ngu eki babalize mananu.
17 Omu mulingo nugwo gumu, Ruhanga obu yacwiremu kwolekera kimu abagwetwa b’omurago ngu ekigendererwa kye tikihinduka, akakigumya n’ekirahiro,*
18 nukwo kuraba omu bintu bibiri* ebitasobora kuhinduka kandi omu ebi, Ruhanga atasobora kubiiha, nukwo itwe abairukiire omu kiikaro eky’okwirukiramu tusobole kugarurwamu amaani, tukwatire kimu okunihira okutuhairwe.
19 Okunihira kunu oku twine kuli nk’enanga* ey’obwomeezi,* kugumiire kimu, tikurukutengeeta, kandi kutaaha omu rutimbi,
20 nambere Yesu yabandize kutaaha habwaitu, kandi yafooka nyakatagara omukuru* omu mulingo gwa Merekizedeki ebiro n’ebiro.
Obugambo Obuli Hansi
^ Rora, Kusoborra Ebigambo; “Enteekaniza ey’ebintu.”
^ Rora, Kusoborra Ebigambo; “Ekirahiro.”
^ Binu nibyo, omurago n’ekirahiro.
^ Kandi eki nikyo eky’okusibika eryato.
^ Rundi, “ey’obwomeezi bwaitu.”
^ Rora, Kusoborra Ebigambo.
