Hali Abahebburaniya 3:1-19
3 Ab’oruganda abarukwera, abaine omugabo omu kwetwa* okw’omu iguru, muteekerezeeho omukwenda kandi nyakatagara omukuru ou twaikiriize,* Yesu.
2 Akaba mwesigwa hali Ogu ayamukomere, nkooku Musa na uwe akaba ali mwesigwa omu nju yoona ey’Ogu.
3 Yesu naabarwa nk’ow’asemeriire ekitiinisa kingi kukira Musa, habwokuba ogu ow’ayombeka enju aine ekitiinisa kingi kukira enju.
4 Amananu gali, buli nju yoona eyombekwa omuntu, baitu ayayombekere byona ni Ruhanga.
5 Hati Musa akaba ali mwesigwa nk’omuheereza omu nju yoona ey’Ogu, obuheereza bwe bunu bukaba buli nk’obwakaiso bw’ebintu ebikaba nibigenda kubazibwaho hanyuma,
6 baitu Kristo akaba ali mwesigwa nk’omwana arukwebembera enju ya Ruhanga. Tuli nju ya Ruhanga obu twikara nitubaza tutarukutiina kandi tukakwatira kimu okunihira kwaitu oku turukwenyumiririzaamu kuhikira kimu ha mpero.
7 Nahabweki, nkooku omwoyo ogurukwera gugamba guti: “Kiro Kinu obu muraahurra iraka lye,
8 mutagumanganiza emitima yanyu nka baisenkuruinywe obu bambiihiize muno, nkooku baakozere ha kiro eki omu irungu obu bandengere,
9 bakandenga noobu kiraaba ngu bakaba barozere ebikorwa byange n’emirimo yange kumara emyaka 40.
10 Enu niyo ensonga habwaki natamirwe abantu ab’obusinge bunu kandi nagamba nti: ‘Baikara nibahaba omu mitima yabo, kandi tibakamanyaga emihanda yange.’
11 Nahabweki, omu kiniga kyange nkarahira nti: ‘Tibalitaaha omu kuhuumura kwange.’”
12 Ab’oruganda, mwerinde hatabaho n’omu omuli inywe ayatunga omutima omubi ogutaine kwikiriza akaruga hali Ruhanga omwomeezi,
13 baitu mwikale nimugarramungana amaani buli kiro, obu kirukuba nikyetwa “Kiro Kinu,” nukwo hatabaho n’omu omuli inywe ayagumangana habw’ebisuba by’amaani g’ekibi.
14 Nitwija kubagana hamu na Kristo, kakuba tukwatira kimu obwesige obu tukaba twine ha kubanza kuhikira kimu ha mpero.
15 Nkooku kyagambirwe kiti: “Kiro kinu obu muraahurra iraka lye, mutagumanganiza emitima yanyu, nkooku baisenkuruinywe baakozere baamubiihiza muno.”
16 Nibaha abaahuliire kandi baabiihiza muno Ruhanga? Tinubo abo boona abaarugire Misiri beebembiirwe Musa?
17 Kandi nibaha Ruhanga aba yatamirwe kumara emyaka 40? Tinubo abo abaasiisire, emitumbi yabo yagwa omu irungu?
18 Kandi nibaha aba yarahiriire ngu tibarukwija kutaaha omu kuhuumura kwe? Tinubo abo abaamujeemiire?
19 Nahabweki, niturora ngu batasobole kukutaahamu habwokuba bakaba bataine okwikiriza.
