Hali Abahebburaniya 2:1-18
2 Egi niyo ensonga habwaki tusemeriire kweyongera kuta omutima ha bintu ebi tuhuliire, nukwo tutahaba.
2 Ekigambo ekyabaziibwe kuraba omu bamalaika obu kiraaba kyagumiibwe ngu ky’amananu, kandi omuntu weena arukusiisa kandi omujeemu yaheebwa ekifubiro ekirukusigikirra ha bwinganiza,
3 itwe turaakira tuta obu turaaba tunagiriize okujunwa okw’amaani? Habwokuba obutumwa bunu bukabanza kubazibwaho kuraba omu Mukama waitu, kandi abo abaabuhuliire baabutugambira,
4 Ruhanga na uwe yabeeteeranizaaho omu kuha obwakaiso kuraba omu bwokurorraho, ebirukuhuniiriza, n’ebyamahano ebirukwahukana, hamu n’omwoyo ogurukwera ogwagabirwe kusigikirra ha kugonza kwe.
5 Bamalaika tibali nubo yahaire obusobozi bw’okulema ensi erukugenda okwija ei turukubazaaho.
6 Baitu kaiso omu akahandiika ati: “Omuntu nuwe oha, iwe kwikara noomuteekerezaaho, rundi omwana w’omuntu iwe kumufaaho?
7 Okamukora naaburaho kake kwingana bamalaika; okamujweka ekondo ey’ekitiinisa n’okutiinwa kandi wamukoma kulema ebi wakozere n’emikono yaawe.
8 Ebintu byona okabiteeka hansi y’ebigere bye.” Ebintu byona obu byatairwe hansi ye, busaho kintu na kimu Ruhanga eki atarataire hansi y’obusobozi bwe. Noobu kiraaba ngu hati titukarozere ebintu byona biri hansi y’obusobozi bwe.
9 Baitu niturora Yesu ayafoirwe owa hansiho kake hali bamalaika, hati ajwekerwe ekondo ey’ekitiinisa n’okutiinwa habw’okubonabona kuhika ha kufa, nukwo habw’embabazi za Ruhanga enyingi muno* asobole kurozaaho okufa habwa buli omu.
10 Ebintu byona biroho habw’ekitiinisa kya Ruhanga kandi biroho kuraba omuli uwe. Nahabweki, kusobora kuhikya abaana baingi omu kitiinisa, akaba asemeriire kumufoora Omwebembezi Omukuru* ow’ahikiriire habw’okujunwa kwabo kuraba omu kubonabona.
11 Habwokuba abarukwezebwa n’ogu arukubeeza boona nibaruga hali omu, kandi habw’ensonga egi, taswara kubeeta bagenzi be,
12 naagamba ati: “Ndirangirra ibara lyawe hali bagenzi bange; ndikukugiza n’ekizina hagati y’ekitebe.”
13 Kandi ati: “Ndita obwesige bwange omuli uwe.” Kandi ati: “Dora! Nyowe hamu n’abaana abato Yahwe* aba yampaire.”
14 Nahabweki, nkooku “abaana abato” bali b’esagama n’omubiri, na uwe akafooka w’esagama n’omubiri, nukwo kuraba omu kufa kwe asobole kuhwerekereza ogu ow’aine obusobozi obw’okuleetaho okufa, kandi ogu nuwe Sitaani,*
15 kandi asobole kulekera* abo boona abakaba bali bairu omu bwomeezi bwabo bwona habw’okutiina okufa.
16 Habwokuba tarukukoonyera bamalaika, baitu naakoonyera oruzaaro rwa* Ibburahimu.
17 Kandi akaba aine kufooka nka “bagenzi” be omu miringo yoona, nukwo asobole kuba nyakatagara omukuru* ow’embabazi kandi omwesigwa ha bintu ebiine akakwate na Ruhanga, nukwo asobole kuhayo ekihongwa eky’okulihirra habw’ebibi by’abantu.
18 Habwokuba uwe weenyini akabonabona obu akaba naalengwa, naasobora kukoonyera abo abarukulengwa.
Obugambo Obuli Hansi
^ Rora, Kusoborra Ebigambo; “Embabazi enyingi muno.”
^ Rora, Kusoborra Ebigambo.
^ Rora, Ebyong. A5.
^ Nkooku kiri, “Diabolo,” ekirukumanyisa “omuhangirizi.” Rora, Kusoborra Ebigambo; “Diabolo.”
^ Rundi, “kujuna.”
^ Nkooku kiri, “embibo ya.”
^ Rora, Kusoborra Ebigambo.
