Hali Abahebburaniya 1:1-14
1 Omu busumi obwa kara, Ruhanga yabazaaga na baisenkuruitwe emirundi nyingi n’omu miringo nyingi, kuraba omu banabbi.
2 Baitu omu kasumi kanu* abalize na itwe kuraba omu Mwana we ou yakomere kuba mugwetwa w’ebintu byona, kandi kuraba omuli uwe akakora ebintu byona.*
3 Ogu nuwe yayolekere ekitiinisa kya Ruhanga kandi nuwe kisisani kye kyonyini, kandi nuwe abaisaaho ebintu byona kuraba omu kigambo ky’amaani ge. Obu yamazire kutweza yatwihaho ebibi, akaikarra ha mukono gw’obulyo ogw’Ogu Ow’ekitiinisa Ekingi Muno omu iguru.
4 Nahabweki akafooka mukuru kukira bamalaika, kuhika ha rulengo orw’okugwetwa ibara erirukukira agaabo.
5 Ekyokurorraho, malaika ki Ruhanga ou yagambiire ati: “Oli mwana wange; kiro kinu nfookere so”? Kandi ati: “Ndiba ise, kandi aliba mwana wange”?
6 Baitu abazaaho akasumi obu alyongera kutuma omwana we Omuzigaijo omu nsi, ati: “Leka bamalaika ba Ruhanga boona bainame* omu maiso ge.”
7 Kandi abazaaho bamalaika ati: “Bamalaika be abafoora emyoyo, kandi abaheereza be abafoora endimi z’omurro.”
8 Baitu obukirukuhika ha Mwana we, Ruhanga agamba ati: “Ruhanga nuwe kitebe kyawe eky’obukama ebiro n’ebiro, kandi omwigo* gw’Obukama bwawe, mwigo gw’obwinganiza.*
9 Okagonza okuhikirra, wanoba obubi. Egi niyo ensonga habwaki Ruhanga, Ruhanga waawe, yakuseesereho amagita, yakuha okusemererwa kukira bataahi baawe.”
10 Kandi ati: “Ha kubanza, Ai Mukama, okataho emisingi y’ensi, kandi n’iguru mirimo y’emikono yaawe.
11 Nibiija kuhwaho, baitu iwe oliikaraho; kandi byona birikura nk’ekijwaro,
12 olibikuba nk’orugoye kandi birihindurwa nk’ekijwaro. Baitu iwe, tohinduka kandi emyaka yaawe terihwaho.”
13 Baitu obukirukuhika ha bamalaika, nooha ou yaakagambiraga ati: “Ikarra ha mukono gwange ogw’obulyo kuhikya obu ndifoora abanyanzigwa baawe nk’akatebe ak’ebigere byawe”?
14 Yoona teri myoyo erukukora obuheereza oburukwera, ey’etumwa kuheereza abo abarukwija kugwetwa okujunwa?
Obugambo Obuli Hansi
^ Nkooku kiri, “ha kumalirra kw’ebiro binu.”
^ Rundi, “akataho enteekaniza z’ebintu.” Omu Ruyonaani, ai·o n′as. Rora, Kusoborra Ebigambo; “Enteekaniza ey’ebintu.”
^ Rundi, “bamuramye.”
^ Rora, Kusoborra Ebigambo.
^ Rundi, “gw’okuhikirra.”
