Hali Abahebburaniya 13:1-25
13 Mweyongere kugonzangana nk’ab’oruganda.
2 Muteebwa kwolekaga amakune,* habwokuba bamu abaakikozere bakakunira bamalaika batakimanyire.
3 Mwikale nimuteekerezaaho abo abali omu nkomo, nimusisana nk’abatairwe omu nkomo hamu na bo, kandi muteekerezeehoga abo abarukutwazibwa kubi, musisane nk’abarukubonabonera hamu na bo.*
4 Leka obuswere buteekwemuga ekitiinisa abantu boona, kandi leka n’ekitabu ky’obuswere kiikalege kiri kyecumi, habwokuba Ruhanga alicwera omusango abantu abasiihani* hamu n’abo abali omu buswere abateerana n’omuntu ou batali na uwe omu buswere.
5 Omu bwomeezi bwanyu, mutaba n’engeso ey’okugonza sente, baitu mumarwege ebintu ebi mwine. Habwokuba akagamba ati: “Tindikulekaho, kandi tindikusigaho.”
6 Nukwo tusobole kuba bamanzi kandi tugambe tuti: “Yahwe* nuwe mukoonyezi wange; tinditiina. Omuntu naasobora kunkora ki?”
7 Mwijukege abo abarukwebembera omuli inywe, ababagambiire ekigambo kya Ruhanga, kandi obu muraaba nimwetegereza engeso zaabo oku ziri, mwegere ha kwikiriza kwabo.
8 Yesu Kristo nuwe omu kiro kinu, nyenkya, n’ebiro byona.
9 Mutahabisibwa enyegesa ezirukwahukana kandi ezitarukusisana n’ezi mwaikiriize, habwokuba kirungi omutima kugumibwa embabazi enyingi muno* kukira ebyokulya* ebitarukugasira abo ababyemaliireho.
10 Twine ekyoto nambere abo abaheereza omu buheereza oburukwera omu heema batarukwikirizibwa kulya ebikiroho.
11 Ebisoro ebiihwamu esagama nyakatagara omukuru* ei atwara omu kiikaro ekirukwera nk’ekihongwa eky’ekibi, enyama yabyo eyokebwa aheeru y’orusiisira.*
12 Nahabweki, Yesu na uwe akabonabonera aheeru y’omulyango gw’orubuga, nukwo asobole kweza abantu n’esagama ye.
13 Hati, leka tugende hali uwe aheeru y’orusiisira, twetwekere ekijumo eki yayetwekere,
14 habwokuba itwe hanu titwine orubuga orwikaraho, baitu nitwekamba kuserra orubuga orurukugenda okwija.
15 Kuraba omuli uwe, leka tuheyoga hali Ruhanga ekihongwa* eky’okukugiza, kandi eki nikyo ekyana eky’eminwa yaitu ey’erukurangirra ibara lye omu rwijwire.
16 Kandi muteebwa kukorra abandi ebirungi n’okubagana ebi mwine n’abandi, habwokuba ebihongwa nk’ebi bisemeza muno Ruhanga.
17 Muhuliirizeege abo abarukwebembera omuli inywe kandi mubooroberege, habwokuba baikara bulindaara habwanyu* nk’abo abalijunaanwa, nukwo bakikole n’okusemererwa hatali kukikora n’okusinda, habwokuba kinu nikisobora kuba ky’akabi hali inywe.
18 Mwikale nimutusabira habwokuba nitukigumya ngu twine omuntu ow’omunda omurungi,* kandi nitugonza kuba beesigwa omu bintu byona.
19 Baitu kukira muno nimbeekambisa kusaba nukwo nsobole kugarurwa nambere muli omu bwangu.
20 Hati, leka Ruhanga ow’obusinge, ayahumbwire omuliisa omukuru ow’entaama, Mukama waitu Yesu kuruga omu bafu, aine esagama ey’ekiragaano eky’ebiro n’ebiro,
21 abahe buli kintu kyona ekirungi, nukwo musobole kukora ebi agonza, obu naakorra omuli itwe ebirukumusemeza, kuraba omuli Yesu Kristo, Ruhanga ogu, aheebwe ekitiinisa ebiro n’ebiro. Amiina.
22 Hati ab’oruganda, nimbateererra kuba abarukugumiisiriza obu muraaba nimuhuliiriza ebigambo binu ebirukugarramu amaani, habwokuba mbahandiikiire ebbaruha engufu.
23 Ningonza mumanye ngu Timoseo ow’oruganda mugenzi waitu, alekiirwe. Kandi obu araija bwangu, ndiija na uwe kubarora.
24 Mundamukize abo boona abarukwebembera omuli inywe hamu n’abarukwera boona. Abo abali omu Itale babaramukize.
25 Embabazi enyingi muno zibe na inywe inywena.
Obugambo Obuli Hansi
^ Rundi, “kugirra embabazi abantu mutamanyire.”
^ Nkooku kiri, “nkooku na inywe muli omu mubiri.”
^ Rora, Kusoborra Ebigambo; “Obusiihani.”
^ Rora, Ebyong. A5.
^ Rora, Kusoborra Ebigambo.
^ Ebi nibyo, ebiragiro ebirukukwata ha byokulya.
^ Rora, Kusoborra Ebigambo.
^ Rundi, “y’orukande.”
^ Rora, Kusoborra Ebigambo.
^ Rundi, “habw’obwomeezi bwanyu.”
^ Rundi, “omwesigwa.”
