Hali Abahebburaniya 10:1-39

  • Ebihongwa by’ebisoro tibisobora kwihaho omuntu ekibi (1-4)

    • Ebiragiro, biri kiituuru (1)

  • Ekihongwa kya Kristo kikaheebwayo omurundi gumu kyahwa (5-18)

  • Omuhanda omuhyaka kandi omwomeezi (19-25)

    • Tutaleka kusorrokanaga hamu (24, 25)

  • Obuhabuzi oburukukwata ha kukora ekibi okigenderiire (26-31)

  • Obwesige n’okwikiriza kusobora kugumiisiriza (32-39)

10  Nkooku Ebiragiro* kiituuru eky’ebintu ebirungi ebirukugenda okwija, baitu bitali ebintu ebi byonyini, Ebiragiro tibisobora* kufoora abo abaramya Ruhanga kuba abahikiriire, kuraba omu kuhayoga ebihongwa nibyo bimu mwaka ha mwaka. 2  Kitali eki, ebihongwa tibyakubaire birekere kuheebwayo habwokuba abo abarukubireeta* baakubaire beeziibwe omurundi gumu batarukuhurra ngu baine ekibi? 3  Baitu ebihongwa binu bibaijukya ebibi mwaka ha mwaka, 4  habwokuba tikirukusoboka esagama ey’enimi n’ey’embuzi kwihaho ebibi. 5  Nahabweki obu aija omu nsi, agamba ati: “‘Ekihongwa n’ekyonzira otabigonze, baitu iwe okanteekaniriza omubiri. 6  Ebihongwa byona ebyokeze* n’ebyonzira eby’ekibi, otabisiime.’ 7  Nubwo nagamba nti: ‘Dora! Nyizire (omu muzingo* kikampandiikwaho) kukora ebi ogonza, Ai Ruhanga.’” 8  Hanyuma y’okugamba ati: “Otagonze noobu kwakuba kusiima ebihongwa, ebyonzira, ebihongwa byona ebyokeze hamu n’ebihongwa eby’ekibi”* —ebihongwa ebiheebwayo kusigikirra ha Biragiro— 9  ayongera agamba ati: “Dora! Nyizire kukora ebi ogonza.” Aihaho eky’okubanza kusobora kutaho ekya kabiri. 10  Kusigikirra hali ebi Ruhanga ‘ebi agonza’ tweziibwe kuraba omu kuheebwayo kw’omubiri gwa Yesu Kristo omurundi gumu kyahwa. 11  Kandi buli nyakatagara, ayemerra omu kiikaro kye buli kiro kuheereza omu buheereza oburukwera, n’okuhayo ebihongwa nibyo bimu emirundi nyingi, ebitasobora kwihiraho kimu ebibi. 12  Baitu omuntu onu akahayo ekihongwa kimu habw’ebibi ebiro byona kandi yaikarra ha mukono ogw’obulyo ogwa Ruhanga, 13  kandi kuruga kasumi ako, alindiriire kuhikya abanyanzigwa be obu baraafoorwa nk’akatebe k’ebigere bye. 14  Habwokuba kuraba omu kihongwa kimu ekyahairweyo, aleetiire abo abarukwezebwa kuba abahikiriire ebiro byona. 15  N’omwoyo ogurukwera nagwo nigutuha obwakaiso, habwokuba hanyuma y’okugamba guti: 16  “‘Kinu nikyo ekiragaano* eki ndikora na bo hanyuma y’ebiro ebi,’ agambire Yahwe.* ‘Ndita ebiragiro byange omu mitima yabo, kandi ndibihandiika omu biteekerezo byabo.’” 17  Gwongera gugamba guti: “Kandi tindyongera kwijuka ebibi byabo n’ebikorwa byabo eby’obujeemu.” 18  Hati binu obu biraaba nibiganyirwa, tikikyayetaagisa kuhayo ekihongwa habw’ekibi. 19  Nahabweki, ab’oruganda, nkooku kuraba omu sagama ya Yesu, twine obumanzi obw’okuraba omu muhanda ogurukutaaha omu kiikaro ekirukwera, 20  ogu yatukinguliire* nk’omuhyaka kandi omwomeezi ogurukuraba omu rutimbi, kandi ogu nugwo omubiri gwe, 21  kandi nkooku twine nyakatagara arukukirayo arukurolerra enju ya Ruhanga, 22  leka tuhikirre Ruhanga n’omutima ogw’amananu n’okwikiriza okwijwire, hanyuma y’emitima yaitu kumiisirwa ekeezebwa ekaihwaho omuntu w’omunda omubi, n’emibiri yaitu kwogebwa n’amaizi ameecumi. 23  Leka tugumire ha kwatura okunihira kwaitu omu rwijwire tutarukugaruukirra, habwokuba ogu ayaraganiize mwesigwa. 24  Kandi leka buli omu hali itwe ateekerezeehoga* mutaahi we nukwo amwekambise kugonza n’okukora ebikorwa ebirungi, 25  kandi tutaleka kusorrokanaga hamu nk’abamu oku bakora, baitu tugarremungana amaani, kukira muno nkooku murukurora ekiro nikirra haihi. 26  Kakuba tukora ekibi tukigenderiire hanyuma y’okutunga okumanya okuhikire okw’amananu, tihakyaroho ekihongwa eky’okuhayo habw’ebibi byaitu, 27  baitu haroho okutiina okw’okucwera omusango hamu n’ekiniga eky’amaani ekirukugenda kuhwerekereza abo abarukuhakaniza. 28  Ogu weena ayayangaga kworobera Ebiragiro bya Musa, yaitwaga atagiriirwe embabazi obu haabaga haroho obwakaiso bw’abantu babiri rundi basatu. 29  Nimuteekereza omuntu ow’arubatiriire Omwana wa Ruhanga kandi ataratwaire esagama ey’ekiragaano eyamwereze nk’ey’omuhendo kandi ayagayire omwoyo ogw’embabazi enyingi muno, tarukwija kuheebwa ekifubiro ekirukukiraho? 30  Habwokuba tumanyire Ogu ayagambire ati: “Okuhoora enzigu kwange; nyowe ndisasura.” Kandi ati: “Yahwe* alicwera abantu be omusango.” 31  Kiri kintu eky’okutiinisa muno kufubirwa* Ruhanga omwomeezi. 32  Baitu mwikale nimwijuka ebiro ebyarabireho hanyuma y’okutunga ekyererezi, mukagumiisiriza okutalibana okw’amaani hamu n’okubonabona. 33  Obwire obumu mwateekwaga omu maiso g’abantu omu rwijwire nibabaswaza, nibababonabonesa, kandi obwire obumu mwabaga hamu n’abo* abarukuhikwaho ebintu nk’ebi. 34  Habwokuba mukasaalirirwa abo abali omu nkomo kandi n’okusemererwa mukaikiriza kunyagwaho ebintu byanyu, habwokuba inywe inywenka mukimanyire ngu mwine eky’obuguuda ekirukukirayo oburungi kandi eky’ebiro n’ebiro. 35  Nahabweki, mutajwaha kuba n’obumanzi* habwokuba nikiija kubahaisa empeera ey’amaani. 36  Nimwetaaga okugumiisiriza nukwo hanyuma y’okukora Ruhanga ebi agonza, musobole kutunga eki yaraganiize. 37  Habwokuba hasigaireyo “akacu kake,” kandi “ogu arukwija, aije kandi tarukwija kukeerererwa.” 38  “Baitu omuntu wange ow’okuhikirra alyomeera habw’okwikiriza,” kandi “kakuba agaruukirra, tindukwija kumusemerererwa.”* 39  Nahabweki, itwe tituli abo abagaruka enyuma omu kuhwerekerra, baitu tuli abo abaine okwikiriza okurukusobora kujuna obwomeezi bwaitu.

Obugambo Obuli Hansi

^ Rundi nikisobora n’okuhindurwa, “abantu tibasobora.”
^ Rundi, “abarukuheereza omu buheereza oburukwera.”
^ Rora, Kusoborra Ebigambo; “Ekihongwa ekyokeze.”
^ Nkooku kiri, “omu muzingo gw’ekitabu.”
^ Rora, Kusoborra Ebigambo; “Ekihongwa eky’ekibi.”
^ Nkooku kiri, “ogu yatongoize.”
^ Rundi, “ateho omutima.”
^ Nkooku kiri, “kugwa omu mikono ya.”
^ Rundi, “mwayemerraga ha rubaju rw’abo.”
^ Nkooku kiri, “kubaza mutarukutiina.”
^ Rundi, “obwomeezi bwange tibumusemererwa.”

Obujunanizibwa bwaitu ha Kitabu Kinu