Hali Abahebburaniya 11:1-40
11 Okwikiriza nukwo kukigumiza kimu ngu ebirukunihirwa nibiija kuhikirra, nubwo obwakaiso oburukwoleka* ngu eki orukwikiriza kiroho kwo noobu kiraaba kitarukurorwa.
2 Habwokuba abasaija aba ira* bakaba baine okwikiriza nk’oku, Ruhanga akakyoleka ngu akaba naabasiima.
3 Habw’okwikiriza, nitukyetegereza ngu enteekaniza ez’ebintu* zikateekwaho kuraba omu kigambo kya Ruhanga, nukwo kyaba ngu ebintu ebirukurorwa bikakorwa kuruga omu bintu ebitarukurorwa.
4 Habw’okwikiriza, Abberi akahayo hali Ruhanga ekihongwa eky’omuhendo kukira ekya Kaini, kandi kuraba omu kwikiriza oku, akatunga obwakaiso oburukugumya ngu w’okuhikirra, habwokuba Ruhanga akasiima* ebisembo bye, kandi noobu kiraaba ngu akafa, naakyabaza kuraba omu kwikiriza kwe.
5 Habw’okwikiriza, Enoka akatwarwa nukwo atarora okufa kandi atasangwe hantu hoona habwokuba Ruhanga akaba amutwaire; kandi obu akaba atakatwairwe, akatunga obwakaiso oburukugumya ngu akaba asemiize Ruhanga.
6 Ekindi, omuntu ataine okwikiriza tasobora kusemeza Ruhanga, habwokuba weena anyakwija hali Ruhanga, asemeriire kwikiriza ngu aroho kwo kandi ngu aha empeera abarukwekamba muno okumuserra.
7 Habw’okwikiriza, Nuha obu yatungire okuhaburwa kuruga hali Ruhanga okurukukwata ha bintu ebitakarozerwe, akooleka ngu naatiina Ruhanga kandi yayombeka eryato ery’okujuna ab’omuka ye; kandi kuraba omu kwikiriza kunu akacwera ensi omusango kandi yafooka omugwetwa ow’okuhikirra okuruga omu kwikiriza.
8 Habw’okwikiriza, Ibburahimu obu yayeserwe, akahuliiriza yagenda omu kiikaro eki akaba naagenda kutunga nk’obugwetwa; akagenda, noobu kiraaba ngu akaba atamanyire nambere arukugenda.
9 Habw’okwikiriza, akaikara omu nsi eyamuraganiziibwe ali nk’omunyamahanga omu nsi endi, obu naikara omu heema na Isaka na Yakobbo, abanyakuli bagwetwa hamu na uwe ab’omurago nugwo gumu.
10 Habwokuba akaba alindiriire orubuga orunyakwine emisingi yonyini, orwateekaniziibwe kandi rwayombekwa* Ruhanga.
11 Habw’okwikiriza, Saara na uwe akaheebwa amaani yatwara enda* noobu kiraaba ngu akaba ahingwize emyaka ey’okuzaara, habwokuba akaba naakigumya ngu Ogu ayamuraganiize mwesigwa.
12 Habw’ensonga enu, omusaija ow’akaba naatwarwa nk’ow’afiire, akarugwamu abaana baingi nk’enyunyuuzi ez’omu iguru kandi abatasobora kubarwa nk’omusenyi ogwa ha nyanja.
13 Banu boona bakafa baine okwikiriza, noobu kiraaba ngu ebi baaraganiziibwe bitahikirre omu kasumi kaabo; baitu bakabirorra hara baabitangirra n’okusemererwa kandi baarangirra omu rwijwire ngu bagenyi kandi baikazi ab’akasumi kake omu nsi egi.
14 Kandi abo ababaza omu mulingo ogu, bakyolekera kimu ngu nibeekamba kuserra ekiikaro ekyabo habwabo.
15 Baitu kakuba baikaire nibaijuka ekiikaro nambere baarugire, baakutungire omugisa ogw’okugarukayo.
16 Kandi hati nibeekamba kutunga ekiikaro ekirukukira oburungi, kandi eki nikyo eky’omu iguru. Nahabweki, Ruhanga tarukukwatwa ensoni kwetwa Ruhanga wabo, habwokuba abateekaniriize orubuga.
17 Habw’okwikiriza, Ibburahimu obu yalengerwe, akasisana nk’ow’ahaireyo Isaka—omusaija ow’akaba atungire emirago n’okusemererwa, akalengaho kuhayo omwana we omu wenka—
18 noobu kiraaba ngu akaba agambiirwe ati: “Ogu alyetwa oruzaaro rwawe* aliraba omu Isaka.”
19 Baitu akaba naakigumya ngu Ruhanga akaba naasobora kumuhumbuura kuruga omu bafu, kandi akamutunga kuruga omu kufa omu mulingo ogw’akokurorraho.
20 Habw’okwikiriza, na Isaka akaha Yakobbo na Esau omugisa ogurukukwata ha bintu ebirukwija.
21 Habw’okwikiriza, Yakobbo obu akaba ali haihi kufa, akaha omugisa buli omu ha batabani ba Yusufu kandi yaramya Ruhanga aigamiire entuli y’omwigo gwe.
22 Habw’okwikiriza, Yusufu obu akaba ali haihi kufa, akabazaaho abaana ba Isaleeri kuruga Misiri, kandi yaha oburagirizi oburukukwata* h’amagufa ge.*
23 Habw’okwikiriza, Musa obu yazairwe, bazaire be bakamusereka kumara emyezi esatu, habwokuba bakarora omwana ogu omuto ali murungi kandi batatiine ekiragiro ky’omukama.
24 Habw’okwikiriza, Musa obu yakuzire, akanga kwetwa mutabani wa muhara wa Faraaho,
25 yacwamu kubonabonesebwa hamu n’abantu ba Ruhanga, omu kiikaro ky’okwegondeza omu kusemererwa okw’ekibi, habw’akacu kake,
26 habwokuba okujumwa kwa Kristo* akakutwara kuba kw’obuguuda bwingi kukira eby’obuguuda ebya Misiri, habwokuba amaiso akagaikaza ha mpeera ei akaba naija kuheebwa.
27 Habw’okwikiriza, Musa akaruga Misiri atarukutiina ekiniga ky’omukama, habwokuba akaikara agumire ali nk’arukurora Ogu atarukurorwa.
28 Habw’okwikiriza, akakwata Okuhingurwaho kandi yamiisa esagama nukwo omuhwerekereza atahikyaho akabi* abaana baabo ab’emizigaijo.
29 Habw’okwikiriza, bakaraba omu Nyanja Erukutukura nk’abarukuraba ha itaka eryomere, baitu Abamisiri obu baakirengereho, baamirwa amaizi.
30 Habw’okwikiriza, ebisiika bya Yeriko bikagwa hansi, hanyuma y’abantu kubyetoroora kumara ebiro musanju.
31 Habw’okwikiriza, Rahabbu malaaya, atahwerekerre hamu n’abo abaajeemere, habwokuba akatangirra entasi omu businge.
32 Hati ndaagamba ki ekindi? Obwire nibwija kumpwaho obu ndaatandika kubazaaho ebirukukwata ha Gidiyooni, Bbaraka, Samusooni, Yefuta, Daudi, Samwiri hamu na banabbi abandi.
33 Habw’okwikiriza bakasingura obukama, baaleetaho okuhikirra, baatunga ebyaraganiziibwe, baigara eminwa y’entale,
34 baazimya amaani g’omurro, baakira obwogi bw’empirima, abaceke baafoorwa b’amaani, baafooka basinguzi omu bulemu, baasingura amahe agaabataahirraga.
35 Abakazi bakatunga abantu baabo abaahumbwirwe, baitu abasaija abandi bakabonabonesebwa habwokuba bakaba batasobora kwikiriza kucungurwa, nukwo basobole kutunga okuhumbuuka okurukukiraho oburungi.
36 Mali, abandi bakalengwa kuraba omu kubasekeereza n’okubateera, kandi ekirukukira hali eki, baabohwa omu njegere kandi baateekwa omu nkomo.
37 Bakateerwa amabaale, baalengwa, baasarwamu kabiri n’emisumeeni, baitwa n’empirima, baagendaga bajwaire ebisaato eby’entaama n’eby’embuzi, obu baabaga bali omu bwetaago, omu mihito, n’omu kutwazibwa kubi;
38 kandi ensi ekaba etabasemeriire. Baagendagendaga omu irungu, omu nsozi, omu bwingira, n’omu biina eby’omu nsi.
39 Noobu kiraaba ngu banu boona, Ruhanga akabooleka ngu naabasiima habw’okwikiriza kwabo, batatunge eki akaba abaraganiize,
40 habwokuba Ruhanga akateekereza kutuha ekintu ekirukukirayo oburungi, nukwo batafoorwa abahikiriire nambere tutali.
Obugambo Obuli Hansi
^ Rundi, “obwakaiso oburukunanura.”
^ Rundi, “baisenkuruitwe.”
^ Rora, Kusoborra Ebigambo; “Enteekaniza ey’ebintu.”
^ Rundi, “akaha obwakaiso obu naikiriza.”
^ Rundi, “ayatiire pulaani yarwo kandi yarwombeka ni.”
^ Nkooku kiri, “embibo.”
^ Nkooku kiri, “embibo yaawe.”
^ Rundi, “ekiragiro ekirukukwata.”
^ Rundi, “ha kuziikwa kwe.”
^ Ogu Ayaseeserweho Amagita.
^ Nkooku kiri, “atakwata.”
