Hali Abahebburaniya 8:1-13
8 Enu niyo ensonga enkuru ey’ebi turukubazaaho: Twine nyakatagara omukuru* nk’ogu kandi aikaliire ha mukono gw’obulyo ogw’ekitebe ky’obukama eky’Ogu Ow’ekitiinisa Ekingi Muno omu iguru,
2 omuheereza* omu kiikaro ekirukwera n’omu heema ey’amananu, eyatairweho Yahwe,* hatali omuntu.
3 Habwokuba buli nyakatagara omukuru akomwa kuhayo ebisembo hamu n’ebihongwa; nahabweki kikaba nikyetaagisa n’ogu na uwe kugira eki yahayo.
4 Obu yaakubaire omu nsi, tiyaakubaire nyakatagara, habwokuba haroho abasaija abarukuhayo ebisembo kusigikirra ha Biragiro.*
5 Abasaija banu bahikiiriza obuheereza oburukwera, kandi obuheereza obu kiri kisisani* kandi kiituuru eky’ebintu eby’omu iguru; nkooku Musa, obu akaba ali haihi kwombeka eheema, akaheebwa ekiragiro kuruga hali Ruhanga ekirukugamba kiti: “Kigumye ngu wakora ebintu byona nkooku byakwolekerwe ha rusozi.”
6 Baitu hati Yesu ahairwe obuhereeza oburukukirayo oburungi, habwokuba omu mulingo nugwo gumu, nuwe muteeraniza w’ekiragaano* ekirukukirayo oburungi, ekyatairweho omu biragiro, nikisigikirra ha mirago erukukirayo oburungi.
7 Kakuba ekiragaano eky’okubanza kyali kitaine kamogo, tikyakwetaagisize ekiragaano ekya kabiri.
8 Habwokuba ajunaana abantu obu agamba ati: “‘Dora! Ebiro nibiija,’ agambire Yahwe,* ‘obu ndikora ekiragaano ekihyaka n’enju ya Isaleeri hamu n’enju ya Yuda.
9 Tikiriba nk’ekiragaano eki nakozere na baisenkurubo ha kiro obu nabakwasire ha mukono kubaiha omu nsi ya Misiri. Habwokuba bakacwa ekiragaano kyange, na nyowe nkaleka kubarolerra,’ agambire Yahwe.*
10 “‘Kinu nikyo ekiragaano eki ndikora n’enju ya Isaleeri hanyuma y’ebiro ebi,’ agambire Yahwe.* ‘Ndita ebiragiro byange omu biteekerezo byabo, kandi ndibihandiika omu mitima yabo. Ndiba Ruhanga wabo, kandi na bo baliba bantu bange.
11 “‘Kandi buli omu hali bo, talyongera kwegesa omwikazi mutaahi we hamu na mugenzi we, naagamba ati: “Manya Yahwe!”* Habwokuba boona baliba bammanyire, kurugira kimu hali ogu ow’arukukirayo kuba owa hansi, kuhikira kimu hali ogu ow’arukukirayo kuba ow’ekitiinisa.
12 Habwokuba ndibaganyira ebikorwa byabo eby’okutahikirra kandi tindyongera kwijuka ebibi byabo.’”
13 Nahabweki, obu agamba ati: “Ekiragaano ekihyaka,” eky’okubanza aba akidibize. Hati eki ekidibire kandi ekikuzire, kiri haihi kuhwaho.
Obugambo Obuli Hansi
^ Rora, Kusoborra Ebigambo.
^ Rundi, “ow’arukuheereza habw’abantu boona.”
^ Rora, Ebyong. A5.
^ Rora, Kusoborra Ebigambo; “Ebiragiro.”
^ Rundi, “kiri kyokurorraho.”
^ Rora, Kusoborra Ebigambo; “Ekiragaano.”
^ Rora, Ebyong. A5.
^ Rora, Ebyong. A5.
^ Rora, Ebyong. A5.
^ Rora, Ebyong. A5.
