Hali Abahebburaniya 7:1-28
7 Habwokuba Merekizedeki onu, omukama wa Saalemu, nyakatagara wa Ruhanga owa Haiguru Muno, akatangaana Ibburahimu naaruga kwita abakama yamuha omugisa,
2 kandi Ibburahimu yamuha* kimu kya ikumi eky’ebintu byona. Eky’okubanza, ibara lye obu lihindurwa limanyisa “Omukama ow’Okuhikirra,” kandi omukama wa Saalemu ekirukumanyisa, “Omukama ow’Obusinge.”
3 Habwokuba akaba ataine ise, ataine nyina, ataine rukarra rw’obuzaale bwe, kandi taine entandiko y’ebiro bye noobu kwakuba empero y’obwomeezi bwe, baitu yafoorwa nk’Omwana wa Ruhanga, aikara ali nyakatagara ebiro byona.
4 Rora omulingo omusaija onu akaba ali mukuru, Ibburahimu omutwe gw’eka, ou yahaire kimu kya ikumi ha minyago erukukirayo oburungi.
5 Ky’amananu ngu kusigikirra ha Biragiro,* abo abanyakuli abaana ba Leevi abafooka banyakatagara baragirwa kusorooza kimu kya ikumi* kuruga omu bantu, kandi abo nubo bagenzi baabo noobu kiraaba ngu banu na bo baijukuru ba* Ibburahimu.
6 Baitu omusaija onu ow’akaba atarukuruga omu ruganda rwa Leevi akaikiriza kimu kya ikumi kuruga hali Ibburahimu, kandi yaha emigisa ogu ow’akaba ahairwe emirago.
7 Ky’amananu ngu ogu owa hansi aheebwa omugisa ogu arukumukiraho.
8 Ha rubaju orumu, abatunga kimu kya ikumi nubo abantu abafa, baitu harubaju orundi, ogu ebyahandiikirwe ou biheera obwakaiso ngu mwomeezi nuwe yakitungire.
9 Kandi nikisobora kugambwa ngu na Leevi weenyini ow’atunga kimu kya ikumi, na uwe akakisasura kuraba omuli Ibburahimu
10 habwokuba akaba atakazairwe nk’omwijukuru wa Ibburahimu,* Merekizedeki obu yamutangaine.
11 Obu kiraaba ngu okuhikirra kwatungwaga kuraba omu bwanyakatagara bw’Abaleevi,* (Ebiragiro ebyahairwe abantu byatwarramuga n’obwanyakatagara), mali kyakwetaagisize kutunga nyakatagara ondi ow’arukubazibwaho kuba omu mulingo gwa Merekizedeki hatali omu mulingo gwa Aroni?
12 Nkooku obwanyakatagara buliyo nibuhinduka, nikyetaagisa n’Ebiragiro kuhinduka.
13 Habwokuba omuntu arukubazibwaho ebintu binu akaruga omu ruganda orundi, orutakarugamuga omuntu ayaakaheerezaaga ha kyoto.
14 Nikyeyolekera kimu kurungi ngu Mukama waitu akaruga omu ruganda rwa Yuda,* baitu Musa atabazeeho ekintu kyona ngu oruganda oru rwakurugiremu banyakatagara.
15 Kandi kinu kyeyongera kweyoleka kurungi obu haijaho nyakatagara ondi anyakuli nka Merekizedeki,
16 atarakomerwe kuraba omu rukarra rw’obuzaale nkooku ebiragiro bigamba, baitu kuraba omu maani agamusobozesa kuba n’obwomeezi obutasobora kuhwerekerezebwa.
17 Habwokuba haroho ekyahandiikirwe ekimubazaaho kiti: “Oli nyakatagara ebiro n’ebiro omu mulingo gwa Merekizedeki.”
18 Nahabweki, ekiragiro ekyabandize kikaihwaho habwokuba kikaba kiceke kandi kitaine mugaso.
19 Habwokuba Ebiragiro bitafoole kintu kyona ekihikiriire, baitu okunihira okurukukiraho okwaleeserweho, kwabireetera kuba ebihikiriire, kandi kuraba omu kunihira kunu, nitwirra haihi na Ruhanga.
20 Kinu noobu kiraaba kyakozerwe hataroho kirahiro kyona,
21 (amananu gali, haroho abasaija abaafookere banyakatagara hataroho kirahiro, baitu ogu afookere nyakatagara kuraba omu kurahira kw’Ogu ayagambire ati: “Yahwe* arahiire, kandi tarukwija kuhindura ekiteekerezo kye,* ‘Oli nyakatagara ebiro n’ebiro’”),
22 Yesu afookere ekirukugumya ekiragaano* ekirukukirayo oburungi.
23 Ekindi, baingi baafookaga banyakatagara nibagaruka omu kiikaro ky’abandi, habwokuba okufa kwabalemesaaga kugumizaamu nibaheereza nka banyakatagara,
24 baitu habwokuba uwe aikara ali mwomeezi habw’ebiro n’ebiro, obwanyakatagara bwe, tibugwetwa abantu abandi.
25 Nahabweki, naasobora kujunira kimu abo boona abaija hali Ruhanga kuraba omuli uwe, habwokuba aikara ali mwomeezi naayesengereza habwabo.
26 Habwokuba kitusemeriire kuba na nyakatagara omukuru* nk’ogu omwesigwa, ataine musango, ayeziibwe, ayahukaniziibwe hali abasiisi, kandi anyumiziibwe kukira iguru.
27 Kwahukanaho na banyakatagara abakuru abo, tikirukumwetaagisa kuhayo ebihongwa buli kiro, okubanza habw’ebibi bye, hanyuma habw’eby’abantu, habwokuba kinu akakikora omurundi gumu yamara obu yayehaireyo.
28 Habwokuba Ebiragiro bikoma banyakatagara abakuru abaine obuceke, baitu ekigambo eky’ekirahiro ekyarahiirwe hanyuma y’Ebiragiro, kikoma Omwana, ayafookere ahikiriire ebiro n’ebiro.
Obugambo Obuli Hansi
^ Nkooku kiri, “yamubaganirizaaho.”
^ Rora, Kusoborra Ebigambo; “Ebiragiro.”
^ Rora, Kusoborra Ebigambo.
^ Nkooku kiri, “bakaruga omu nda ya.”
^ Nkooku kiri, “akaba akyali omu nda ya Ibburahimu.”
^ Rora, Kusoborra Ebigambo; “Leevi.”
^ Rora, Kusoborra Ebigambo.
^ Rora, Ebyong. A5.
^ Rundi, “kweyijukya.”
^ Rundi, “ogu ow’ahairweyo nk’omusimbo gw’ekiragaano.”
^ Rora, Kusoborra Ebigambo.
