Hali Abahebburaniya 12:1-29
12 Nahabweki, nkooku twehinguliriziibwe ekitebe* ekikooto eky’abakaiso, leka tweiheho* ekirukulemeera kyona, n’ekibi ekyanguha kutwezingaho, kandi leka twiruke n’okugumiisiriza akaliitango akatutairwe omu maiso,
2 obu nitwikaza amaiso gaitu hali Yesu, anyakuli Omwebembezi Omukuru,* kandi Omuhikiiriza w’okwikiriza kwaitu. Habw’okusemererwa okwamutairwe omu maiso, akagumiisiriza omuti,* tiyaswara, kandi hati aikaliire ha mukono gw’obulyo ogw’ekitebe ky’obukama ekya Ruhanga.
3 Mali muteekerezeeho muno ogu ayagumiire ebigambo ebirukuhakaniza kuruga hali abasiisi kandi ebirukubasingisa omusango, nukwo mutajwaha kandi mukabirugaho.*
4 Omu kurwanisa ekibi eki, timukahikaga ha rulengo orw’okuseesa esagama yanyu.
5 Kandi mwebiirwe kimu ebigambo ebirukubateererra nk’abaana, ebirukugamba ngu: “Mwana wange otagaya okuhanwa okuruga hali Yahwe,* kandi otahwamu amaani obu arukuba akutereekeriize;
6 habwokuba ogu weena Yahwe* ou agonza nuwe ahana, kandi afubira buli omu weena ou atwara kuba mwana we.”
7 Nimwetaaga kugumiisiriza, nka gumu ha mulingo ogw’okuhanwa* kwanyu. Ruhanga naabatwaza nk’abaana be. Mwana ki atahanwa ise?
8 Baitu obu mutahanwa nk’abandi boona oku barukuhanwa, timuli baana mali, baitu muli bitwekano.
9 Ekindi, baisiitwe ab’omu nsi* baatuhanaga, kandi twabatamuga ekitiinisa. Hati, titusemeriire kukiraho kworobera Isiitwe ow’obwomeezi bwaitu obw’eby’omwoyo, nukwo tusobole kuba aboomeezi?
10 Habwokuba bakatuhana habw’akasumi kake, nibasigikirra hali eki ekikaba nikizooka kuba kirungi hali bo, baitu uwe atuhana habw’okutugasira nukwo tusobole kubagana ha burukwera bwe.
11 Ky’amananu ngu okuhanwa kwona okuheebwa tikuleeta okusemererwa omu kasumi ako, baitu kusaaliza, baitu hanyuma, abo abatendekwa okuhanwa oku, baana ekyana eky’obusinge eky’okuhikirra.
12 Nahabweki, mugumye emikono erukulengiija n’amaju amaceke,
13 kandi mwikale nimutereekereza omuhanda gw’ebigere byanyu, nukwo ekiramaire kitaihwa omu ngiga, baitu kikizibwe.
14 Mwekambe kuba omu businge n’abantu boona, kandi mwekambire okwezebwa* habwokuba nambere kutali, busaho muntu weena asobora kurora Mukama waitu.*
15 Mwerinde hatabaho n’omu ayalemwa kutunga embabazi enyingi muno* eza Ruhanga, nukwo hataimuka omuhama ogw’obutwa ogurukuleetaho akabi, gukasiisa baingi;
16 kandi mwerinde, omuli inywe hatabaho n’omu anyakuli omusiihani* rundi omuntu weena atarukusiima ebintu ebirukwera, nka Esau ayahaireyo obugwetwa bwe obw’okuba omuzigaijo habw’ekiihuro kimu.
17 Mukimanyire ngu hanyuma, obu yagondeze kugwetwa omugisa, akangirirwa* noobu kiraaba ngu akalengaho muno kuhindura enteekereza ya ise obu narra amaziga, atasobole kugihindura.
18 Baitu inywe timwiriire haihi n’orusozi orusobora kukwatwaho, orurukwaka omurro, oruroho ekicu ekikwasire, omwirima ogw’amaani, n’ekiyaga,
19 n’okuhirra kw’iraka erikooto ery’engwara, n’iraka ery’ebigambo abantu eri baahuliire, baayesengereza nibagamba ngu hatagira ekyayongera kubagambirwa.
20 Habwokuba bakaba batasobora kugumira ekiragiro kinu: “Ekisoro noobu kyakwija ha rusozi runu, kiteerwe amabaale.”
21 N’ebyarozerwe bikaba nibitiinisa muno, kandi Musa yagamba ati: “Ntiinire muno kandi nintukumira.”
22 Baitu inywe, mwiriire haihi n’Orusozi Sayuni* orubuga rwa Ruhanga omwomeezi, Yerusaalemu y’omu iguru, kandi emitwaro n’emitwaro ya bamalaika
23 abeesoroize hamu, kandi n’ekitebe eky’emizigaijo abahandiikirwe omu iguru, na Ruhanga Omucwi w’Emisango ow’abantu boona, n’obwomeezi obw’eby’omwoyo obw’ab’okuhikirra abafoirwe abahikiriire,
24 na Yesu omuteeraniza* ow’ekiragaano ekihyaka, hamu n’esagama eyamiisirwe, ey’erukubaza kukira esagama ya Abberi.
25 Mwerinde kurora ngu timwayanga kuhuliiriza* ogu arukubaza. Habwokuba abo abaayangire kuhuliiriza ogu arukuha obuhabuzi omu nsi, oburukuruga hali Ruhanga, obu baraaba batarakizire, itwe turaakira tuta kakuba twanga kuhuliiriza ogu arukubaza kuruga omu iguru?
26 Omu kasumi ako, iraka lye likatengeesa ensi, baitu hati araganiize ati: “Omurundi ogundi gumu tinditengeesa ensi yonka baitu n’iguru.”
27 Hati, ebigambo “omurundi ogundi gumu,” nibimanyisa kwihwaho kw’ebintu ebitengeesebwa, kandi ebi nibyo ebintu ebikozerwe, nukwo ebintu ebitatengeesebwa bisobole kwikaraho.
28 Nahabweki, nkooku niturora ngu nitugenda kutunga Obukama obutasobora kutengeesebwa, leka tugumizeemu kutunga embabazi enyingi muno, kandi kuraba omuli zo tusobole kuheereza Ruhanga omu buheereza oburukwera twine okutiina kandi nitumutamu ekitiinisa.
29 Habwokuba Ruhanga waitu ali murro ogurukuhwerekereza.
Obugambo Obuli Hansi
^ Nkooku kiri, “ekicu.”
^ Rundi, “tunage.”
^ Rora, Kusoborra Ebigambo.
^ Rora, Kusoborra Ebigambo.
^ Rundi, “mukahwamu amaani.”
^ Rora, Ebyong. A5.
^ Rora, Ebyong. A5.
^ Rundi, “ogw’okutendekwa.”
^ Nkooku kiri, “baisiitwe ab’omubiri.”
^ Rundi, “oburukwera.”
^ Rundi, “Mukama.”
^ Rora, Kusoborra Ebigambo.
^ Rora, Kusoborra Ebigambo; “Obusiihani.”
^ Nkooku kiri, “akangwa.”
^ Rora, Kusoborra Ebigambo.
^ Rora, Kusoborra Ebigambo.
^ Rundi, “timwayehugya.”
